އޮންލައިން ސްޓްރީމިން ސާވިސްތަކުގެ ވާދަވެރިކަން ދެން ވަރަށް ބޮޑުވާނެ އެވެ. މި ހިދުމަތް މިހާރު ވެސް ދެމުން އަންނަ ނެޓްފްލިކްސް އާއި އެމެޒޯން އަށް، ނޮވެމްބަރު މަހު 12 ގައި ނުކުންނަ ޑިޒްނީ ޕްލަސްގެ ބިރު ވެސް އޮތީ ބޮޑުވެފަ އެވެ. އެކަމަކު އިއްޔެ ބޭއްވި އެޕަލް އިވެންޓަށް ފަހު ނެޓްފްލިކްސް، އެމެޒޯން އަދި ޑިޒްނީ އަށް ވެސް ވަނީ ވާދަވެރިކަން ބޮޑުވެފަ އެވެ.

އެޕަލް އިން އެމީހުންގެ އޮންލައިން ސްޓްރީމިން ހިދުމަތް، އެޕަލް ޓީވީ ޕްލަސް އެ އިވެންޓުގައި ވަނީ ލޯންޗުކޮށްފަ އެވެ. އަންނަ ނޮވެމްބަރު މަހު އެކެއްގައި ލިބެން ފަށާނެ މި ހިދުމަތުގެ އަގު، ނެޓްފްލިކްސް، އެމެޒޯން އަދި ޑިޒްނީ ޕްލަސްއާ އަޅާބަލާއިރު، އަގު ކުޑަ އެވެ.

އެޕަލް ޓީވީ ޕްލަސް އަށް މަހަކު ދައްކަން ޖެހޭނީ 4.99 ޑޮލަރެވެ. ނެޓްފްލިކްސް އަށް މަހަކު ދައްކަން ޖެހެނީ 11.99 ޑޮލަރެވެ. ޑިޒްނީ ޕްލަސް އާއެކު ޑިޒްނީގެ އިތުރު ސްޓްރީމިން ސާވިސްތައް ކަމަށްވާ އީއެސްޕީއެން ޕްލަސް އަދި ހުލޫ އާ އެކު މަހަކު ދައްކަން ޖެހޭނީ 12.99 ޑޮލަރެވެ.

ޑިޒްނީ ޕްލަސްއާ ހިލާފަށް، މި ހިދުމަތް ހަމަ ދޫކޮށްލާ ދުވަހު، 100 އަށް ވުރެ ގިނަ ގައުމަކަށް ލިބޭނެ އެވެ. ޑިޒްނީން އެ ހިދުމަތް ފުރަތަމަ ދުވަހު ހުޅުވާލަނީ ދެތިން ގައުމަކަށެވެ. އަދި ދުނިޔޭގެ އެކި ހިސާބުތަކަށް އެ ހިދުމަތް ފޯރުކޮށްދިނުމަށް ދެ އަހަރެއްހާ ދުވަސް ނަގާނެ ކަމަށް އެމީހުން އޮތީ ބުނެފަ އެވެ. އެހެންވީމާ މިހާރު އެންމެ ގިނަ ގައުމުތަކުގައި ހިދުމަތް ދެމުން އަންނަ ނެޓްފްލިކްސްގެ އެންމެ ބޮޑު ވާދަވެރިއަކަށް މިވީ އެޕަލް އެވެ.

އެޕަލްގެ އިވެންޓަށް ފަހު، އެޕަލްގެ ކޮންމެ އާ ޕްރޮޓަކްޓެއް ގަންނަ މީހަކަށް، އެޕަލް ޓީވީ ޕްލަސްގެ ސަބްސްކްރިޕްޝަން އެއް އަހަރަށް ހިލޭ ދޭން ވެސް ވަނީ ނިންމައިފަ އެވެ.

- ހެލްޕްސްޓާސް

- ސްނޫޕީ އިން ސްޕޭސް

- ގޯސްޓްރައިޓާ

- ދި އެލެފެންޓް ކުއީން

- އޯޕްރާ ވިންފްރީ

- ސާވެންޓް

- ޓުރުތު ބީ ޓޯލްޑް

- ލިޓްލް އެމެރިކާ

- ދި ބޭންކާ