By: Ifraz Ali
އެއް ފަހަރު ވެސް ބޭވަފާތެރި ވެއްޖެ ނަމަ އިތުރު ފުރުސަތެއް ދޭން ޖެހިލުންވާނެ އެވެ. ނުވަތަ ދޭން ބޭނުމެއް ވެސް ނުވާނެ އެވެ. ނުވެސް ދޭނެ އެވެ. މިއީ ވެސް އެ ކަހަލަ ކެހިވެރި ލޯބީގެ ވާހަކައެއްގެ ފެށުމެއް ކަމަށް ބަލާށެވެ. ތިޔަ ބޭވަފާގެ ޖަވާބަކަށް މުޅި އުމުރަށް ސޮރީއޭ ބުނެފި ނަމަ ދޭހަވަނީ ވެސް މިހެންނެވެ. އެކަމަކު މީގެ ފަހަތުގައި އޮތީ އެހެން ހަގީގަތެއް ނޫން ކަމެއް ވެސް ނޭނގެ އެވެ. ޔަގީންވާ ކަމަކީ މިއީ ވެސް ލޯބީގެ އަސަރުގަދަ ވާހަކައެއްގެ ފެށުން ކަމެވެ.
މިއީ ލޯބީގެ ފިލްމުތައް ގެނެސްދިނުމުގައި އަރާހުރި، އެފަދަ ދެ ވަނައެއް ނެތް ޑައިރެކްޓަރު ފާތިމަތު ނަހުލާގެ "ސޮރީ" އެކެވެ. މި ވެސް އޭނާގެ އަމިއްލަ ވާހަކައެކެވެ. އެހެންވެ މީގައި މީހަކު ރޮއްވާލާ ވަރުގެ އަސަރު ހުންނާނެ ކަމާ މެދު ސުވާލެއް ވެސް ނުއުފެއްދޭނެ އެވެ. އަންނަ އަހަރު ގެންނާނެ ކަމަށް ބުނާ މި ފިލްމުގެ ހިލަމެއްގެ އިންތިޒާރުގައި ފޭނުން ތިއްބައި އެންމެފަހުން މި ފިލްމުގެ މަސައްކަތް ކުރިއަށް ދާ ކަމުގެ ފެހި ސިގުނަލެއް މިހާރު ނަހުލާ ވަނީ ދީފަ އެވެ.
އިންސްޓަގްރާމަށް ނަހުލާ އަޕްލޯޑްކުރި މިނެޓެއް ހާއިރުގެ ވީޑިއޯކޮޅުގައި ފެންނަނީ މި ފިލްމުގެ ލަވައެއް ރެކޯޑްކުރާ ތަނެވެ. އިބްރާހިމް ޒައިދު އަލީ (ކުޑައިއްބެ) ކިޔާފައިވާ މި ލަވައިގައި ވެސް ބުނަނީ "ތިޔަ ބޭވަފާގެ ޖަވާބަކީ މުޅި އުމުރަށް ދެން ސޮރީ!" އެވެ. ފިލްމާ ގުޅޭ މާ ބޮޑު ތަފްސީލެއް އަދި ހާމަނުކުރި ނަމަވެސް މިއީ މި ފިލްމުގެ ޓައިޓަލް ލަވަ އަށް ވެދާނެ އެވެ. އެއީ މިފަހުން ނިކުތް ނަހުލާގެ ހުރިހާ ފިލްމުތަކާއި ޑްރާމާތަކުގެ ޓައިޓަލް ލަވަ ވެސް ކުޑައިއްބެ ކިޔާފައި ވާތީ އެވެ.
ނަހުލާ އަޕްލޯޑްކުރި "ސޮރީ" ގެ ލަވައިގެ ތަންކޮޅެއް.
ނަހުލާގެ ފިލްމުތަކާ އެއްވަރަށް، އޭނާގެ ފިލްމުތަކުގެ ލަވަތަކަށް އަބަދު ވެސް ވަރަށް ގިނަ ބައެއްގެ ލޯބި ލިބެ އެވެ. އެންމެފަހުން ބޭއްވި ދިވެހި ފިލްމު އެވޯޑްސްގައި ވެސް ނަހުލާގެ "ބޮސް" ގެ ލަވަ އަކަށް، ތިން އެވޯޑެއް ލިބުނެވެ. އެއީ މޯލްޑިވިއަން އައިޑޮލް އިން ވިދާލި، އަހްމަދު ނަބީލް މުހައްމަދު ކިޔާފައިވާ "ހިތް އަވަސްވާ ގޮތް ވެޔޭ" އެވެ. އެ ލަވަ އަށް ލިބުނީ އެންމެ މޮޅު އޮރިޖިނަލް ލަވަ، އެންމެ މޮޅު ލިރިކްސް އަދި އެންމެ މޮޅު ފިރިހެން ލަވަކިޔުންތެރިޔާގެ އެވޯޑެވެ.
މީގެ ކުރިން ދިން އިންޓަވިއުތަކުގައި ނަހުލާ ބުނީ "ސޮރީ" ގައި އަމިއްލަ ރާގުގެ ހަތް ލަވައެއް އިންނާނެ ކަމަށެވެ. އެއީ މިދިޔަ އަހަރު ޖޫން މަހުގެ ތެރޭގަ އެވެ. އެ ލަވަތަކުގެ މަސައްކަތް އޭރު ވެސް ކުރަމުންދާ ކަމަށް ބުންޏެވެ. ނުފެށި އޮތީ ޝޫޓިންނެވެ.
ސޮރީ" ގެ ވާހަކަތައް ދެއްކުމަށް ނަހުލާ ޔޫއްޕެއާއެކު ލަންޗެއްގައި.
ފިލްމު ޑައިރެކްޓުކުރަނީ ކާކުކަން އަދި ޔަގީނެއްނުވެ އެވެ. އެކަމަކު އެންމެފަހުން ޚަބަރު ލިބުނު ގޮތުގައި މި ފިލްމު ޑައިރެކްޓުކުރާނީ ނަހުލާގެ ބައެއް ފިލްމުތައް ކުރިން ވެސް ޑައިރެކްޓުކުރި ޔޫސުފް ޝަފީއު (ޔޫއްޕެ) އެވެ. "މިހާރު" ނޫހަށް ކުރިން ދިން އިންޓަވިއުއެއްގައި ޔޫއްޕެ އެކަހަލަ އިޝާރާތެއް ވެސް ދިނެވެ. ނަހުލާގެ އެންމެ ކާމިޔާބު ފިލްމުތަކުގެ މޫނަކީ ވެސް ޔޫއްޕެވެ. މި ފިލްމުގައި ވެސް ޔޫއްޕެ އުޅޭނެ އެވެ. ޔޫއްޕެއާއެކު ކޯ-ސްޓާރުންގެ ގޮތުގައި މަރިޔަމް އައްޒަ އަދި މުޅިން އާ އެކްޓަރެއް ވެސް ފެންނާނެ ކަމަށްވެ އެވެ.