ކުޑައިރު ނިދީގައި ހުރެ ދަންވަރު ގޭތެރޭގައި ހިނގިން ހެއްޔެވެ؟ އެއީ ވީކަމެއްކަން ހަނދާން ވެސް ނުހުރެދާނެ އެވެ. އެކަމަކު މަންމަމެން އެ ވާހަކަ ކިޔައިދިންދޯ އެވެ.

ނިދީގައި ހިނގުން ނުވަތަ ސްލީޕް ވޯކް ކުރުމަކީ ވަރަށް އާންމުކޮށް ދިމާވާ ހާލަތެކެވެ. މިކަން އާންމުކޮށް ދިމާވަނީ ފުން ނިންޖަކުން މަޑު ނިންޖަކަށް ނުވަތަ ހޭލެވުމާ ހަމައަށް ދާ ވަގުތު އެވެ. ނިދީގައި ހިނގާއިރު ހޭވެރިކަމެއް ނުހުރެ އެވެ. އަދި ފަހުން އެކަން ހަނދާނެއް ވެސް ނުހުންނާނެ އެވެ. ނިދީގައި ހިނގުމުގެ މައްސަލަ އާންމުކޮށް ދިމާވަނީ އުމުރުން 4-8 އަހަރާ ދެމެދުގެ ކުޑަކުދިންނަށެވެ. ނަމަވެސް ބޮޑެތި މީހުންނަށް ވެސް މިކަން ދިމާވެ އެވެ.

ނިދީގައި ހިނގާ މީހެއް ނުވަތަ ކުއްޖަކު ގޭގައި އުޅޭ ނަމަ، ގޭތެރޭގެ މާހައުލު ރައްކާތެރި ގޮތަކަށް ބަދަލުކުރުން މުހިންމެވެ. ހާއްސަކޮށް ގޭގެ ދޮރުތައް ތަޅުލުމާއި، ތޫނު އެއްޗެހި ފެންނަ ގޮތަށް ނުބެހެއްޓުމާއި ސިޑި ހުންނަ ނަމަ ގޭޓް ހަރުކުރުން ފަދަ ކަންތައްތައް ކުރަންޖެހެ އެވެ. މާ ގިނައިން ނިދީގައި ހިނގޭ ނަމަ، އަދި އަމިއްލަ ނަފްސަށާއި އެހެން މީހުންނަށް ގެއްލުން ލިބިދާނެ ކަންކަން ކުރިމަތިވާ ނަމަ ވީއެންމެ އަވަހަށް ސިއްހީ މާހިރެއްގެ ލަފާ ހޯދުން މުހިންމެވެ.

- ކޮޓަރިތެރޭގައި މަޑުމަޑުން ހިނގުން

- ވަކިކަމަކުން ސަލާމަތްވާން އުޅޭހެން ދުވުން ނުވަތ ހިނގުން

- ލޯ ހުޅުވައިގެން ވަކި ތަނަކަށް ގެއްލިފައި ހުންނަ ގޮތަކަށް ހުރުން

- ސުވާލުތަކަށް ޖަވާބު ދިނުމަށް ލަސްވުން ނުވަތަ ޖަވާބު ނުދިނުން

- ނިދީގައި ހިނގިކަމުގެ ހަނދާނެއް ނެތުން

މިއީ އާއިލީ ކަމަކަށް ވެދާނެ އެވެ. އަދި ހާއްސަކޮށް "އައިޑެންޓިކަލް ޓްވިންސް" އެއް ނަމަ ނިދީގައި ހިނގުމުގެ މައްސަލަ ކުރިމަތިވުން ގާތެވެ. އާއިލާގެ އެއްވެސް މެންބަރަކަށް މިކަން ކުރިމަތިވާ ނަމަ، ތިމާއަށް މިކަން ކުރިމަތިވުމުގެ ފުރުސަތު އެފަދަ ކަމެއް ނެތް އާއިލާއެއްގެ މީހަކާ އަޅާ ބަލާއިރު ދިހަ ގުނަ އިތުރުވެ އެވެ. ބައެއް ދިރާސާތަކުން ދައްކާގޮތުން، އުމުރުން 4 އަހަރާއި 5 އަހަރާ ދެމެދުގެ ކުދިންގެ ތެރެއިން ރަނގަޅަށް ނިދި ހަމަނުޖެހޭ ކުދިންނަށް މިކަން ދިމާވާލެއް އިތުރެވެ. މީގެ އިތުރުން ރަނގަޅަށް ނިދި ހަމަނުވުމާއި ސްޓްރެސް އަދި ނިންޖާ ގުޅުންހުރި ބޭސް ބޭނުންކުރުމަކީ ވެސް މިކަން ކުރިމަތިވެދާނެ ކަމެކެވެ.

ނިދީގައި ހިނގުމާ ގުޅުން ހުރި ސިއްހީ ބައެއް ހާލަތްތައް:

- ހިތުގެ ރިދަމްގެ މައްސަލަތައް ހުރުން

- ހުން އައުން

- މެއިން ދިލަނެގުން

- އެސްމާ (ރޭގަނޑަށް ބޮޑަށް ބަލި ބޮޑުވާ)

- އޮބްސްޓްރަކްޓިވް ސްލީޕް އެޕްނިއާ

- ބައެއް ކަހަލަ ނަފްސާނީ މައްސަލަތައް (ޕެނިކް އެޓޭކްސް، ޕީޓީއެސްޑީ، މަލްޓިޕަލް ޕާސަނަލިޓީ ޑިސްއޯޑާ)

މިއީ ވަަރަށް ފަސޭހައިން ޑައިގްނޯޒްކުރެވޭ ހާލަތެކެވެ. އެ މީހެއްގެ މެޑިކަލް ހިސްޓްރީ ނެގުމަށް ފަހު، ހަދާ ބައެެއް ހާއްސަ ތަހުލީލުތަކުން މި ކޮންޑިޝަން ހުންނަކަން ދެނެގަނެވޭނެ އެވެ.

ނިދީގައި ހިނގުމަކީ ގިނަފަހަރު ސިއްހީ ފަރުވާއެއް ބޭނުންވާކަމެއް ނޫނެވެ. މިއީ ގިނަފަހަރު ހަށިގަނޑަށް ބޭނުންވާ މިންވަރަށް ނިދި ނުލިބުމާ ގުޅިފައިވާ ކަމަކަށް ވުމުން، ރަނގަޅަށް ނިދި ހަމަވުމުން ގިނަފަހަރު ބޮޑު ލުއެއް ލިބިދެ އެވެ. މި ހާލަތުން ރައްކާތެރިވެ ތިބުމަށް ރަނގަޅު ނިދުމުގެ ޝެޑިއުލެއް ގެންގުޅުން މުހިންމެވެ. އަދި ވަކި ކަހަލަ ބޭހެއް ބޭނުންކުރާ ނަމަ މިއީ އެ ބޭހާ ގުޅުންހުރި ކަމެއްތޯ ނުވަތަ ނޫންތޯ ވެސް ޔަގީންކުރަން ވާނެ އެވެ.

މައުލޫމާތު: ވެބްއެމްޑީ