ހެނދުނު ހޭލައިގެން ވެސް އެންމެ ފުރަތަމަ ބަލައިލެވޭނީ ފޯނަށް އައިސްފައި ހުންނަ ނޮޓިފިކޭޝަންތަކަށެވެ. އޮފީހަށް ގޮސް ވެސް ސްނެޕްކޮށްލައި، ފޭސްބުކް ފީޑް ހާވާލައި، ހުސްވަގުތެއް ލިބޭ ނަމަ ޔޫޓިއުބް ނުވަތަ ރޭ ބެލި ފިލްމުގެ ބާކީ ބައި ބަލައިލުމުގަ އެވެ. ކުޑަކުއްޖެކޭ އެއްވަރަށް، ބަތް ސުވާއެއް ދިރުވާލެވޭނީ ވެސް ކޮންމެވެސް ކަހަލަ ސްކްރީނަކަށް ބަލަން އިނދެގެންނެވެ. ވަކި ގަޑިއިރެއް ކަނޑައެޅިފައިނެތެއް ކަމަކު، ބޮޑެތި މީހުންގެ ސްކްރީންޓައިމް ވެސް ކޮންމެވެސް ވަރަކަށް މަދުކުރަންޖެހެ އެވެ.

އުމުރުން 16 އަހަރާއި 64 އަހަރާއި ދެމެދުގެ މީހުންގެ ސްކްރީން ޓައިމަކީ އެވްރެޖުގޮތެއްގައި ހަ ގަޑިއިރެވެ. އެކަމަކު ފިލްމާއި ނެޓްފްލިކްސްގައި ގިނަ ވަގުތުތަކެއް ހޭދަކުރާ ނަމަ މި އަދަދު ނުވަ ގަޑިއިރަށް ނުވަތަ 12 އަށް ވެސް އަރާފާނެ އެވެ.

ދުވަހެއްގެ ތިންބައިކުޅަ އެއްބަޔަށްވުރެ ގިނަ ވަގުތު އަހަރެމެންނަށް މި ހޭދަކުރެވެނީ ސްކްރީނަށް ބަލަހައްޓައިގެން ތިބެ އެވެ.

އެމެރިކަން އެކެޑަމީ އޮފް ޕީޑައިޓްރިކްސް އިން ބުނާގޮތުން އުމުރުން ފަސް އަހަރުން މަތީގެ ކުދިންނަށް، ވަކި ޓައިމް ލިމިޓެއް ކަނޑައެޅުމާ އެކު މުހިންމީ، އެ ކުދިން ބަލާ ތަކެއްޗަކީ އެކަށީގެންވާ ރަނގަޅު އަދި ފައިދާހުރި އެއްޗެއްކަން ޔަގީންކުރުމާއި ކޮންޓްރޯލް ކުރުމެވެ. ސަބަބަކީ އަހަރެެމެން ބަލާ މަންޒަރުތަކާއި އިވޭ އަޑުތަކާއި ބަސްމަގަކީ ދިރިއުޅުމަށާއި ވިސްނުމަށް އަސަރު ފޯރުވާ އެއްޗަކަށް ވުމެވެ. އެހެންކަމުން ކޮންމެ އުމުރެއްގެ މީހެއް ކަމުގައިވިޔަސް، މި އަސަރުތައް ތަބީއީ ގޮތުން އަހަރެމެންނަށް ކުރާނެ އެވެ.

މިސާލަކަށް ނެޓްފްލިކްސް އިން ނޫނީ ޕްރައިމްއިން އެންމެ ފަހު ސީރީޒް ނިންމަން އުޅޭ ނަމަ ކޮންމެވެސް މުހިންމު އެހެން ޒިންމާތަކެއް ނުވަތަ ނިދި ދޫކޮށްލެވެ އެވެ. ސޯފާ ދޮށުގައި ނުވަތަ އެނޫން ވެސް ތަނެއްގައި ފޯނަށް ބަލަހައްޓައިގެން އިނދެވޭވަރު ގިނަނަ ނަމަ، ލޭ މައްޗަށް ދިއުމާއި، އިންސުލިން ރެސިސްޓަންސް، އޮބޭސިޓީ ފަދަ ހިތުގެ ބަލިތަކަށް މަގުފަހިވާ މައްސަލަތައް ދިމާވުމުގެ ފުރުސަތު ބޮޑެވެ. އެއާ އެކު، ކަނދުރާގައި ރިއްސުމާއި، ބޮލުގެ އެކިކަހަލަ ރިހުމާއި، ލޮލަށް ބާރުކުރުމާއި ނިދަން އުނދަގޫވުން މިއީ މުޅިން ވެސް ދިމާވާ މައްސަލަތަކެވެ.

ދެން ހިތަށް އަރާނެ ސުވާލަކީ މި ހިސާބުން ހުރިހާ ސީރީޒްތައް ބެލުން ހުއްޓާލާންވީތޯ އެވެ. ނޫނެކެވެ. މުހިންމީ އަމިއްލަ އަށް ވަގުތުތަކެއް ކަނޑައެޅުމެވެ. ފޯނާއި، ލެޕްޓޮޕާއި ޓީވީ އާއި މި ހުރިހާ އެއްޗެއް ދޮށުގައި އިނދެގެން ވެސް މި ބެލެނީ ހަމަ ސްކްރީނަކަަށް ކަން އެނގުމެވެ. މި ބެލޭ އެއްޗިއްސަކީ ދިރިއުޅުމަށް އެއްވެސް ވަރެއްގެ ފައިދާއެއް ކުރާ އެއްޗެއްތޯ ވަޒަންކޮށްލުމެވެ. އެއްވެސް ސްކްރީނަކަށް މާ ބޮޑަށް ބެލުމަކީ ނަފްސާނީގޮތުން ނުރަނގަޅު އަސަރުތަކެއްކޮށް، ޖިސްމާނީ ސިއްހަތަށްވެސް އޭގެ ގެއްލުން ލިބޭނެ ކަމެކެވެ. އެހެންކަމުން ފޯނު ނަގައި ސްރީން ޓައިމް ޗެކްކޮށްލާށެވެ.

ސްކްރީންޓައިމް މަދުކުރުމަށް އެންމެ މުހިންމީ ފޯނަށް ބަލަހައްޓައިގެން ތި ހުންނަ ބޭކާރު ވަގުތުތައް މަދުކުރުމެވެ. ޓީވީ ދޮށުގައި އަބަދު އިނުމުގެ ބަދަލުގައި ހެލިފެލިިވެ، މީހުންނާ ބައްދަލުވެ، ވާހަކަދައްކާ މުއާމަލާތު ކުރުމެވެ.

- ބޭކާރު ނޮޓިފިކޭޝަންތައް ނުލިބޭ ގޮތް ހެދުން

- ފޯނަށް ހާއްސަ ކާފިއުއެއް ނިދުމުގެ ކުރިން ކަނޑައެޅުން

- ކާ ގަޑިތަކުގައި އެއްވެސް ވަރަކަށް ފޯނަށް ނުވަތަ ޓީވީއަށް ނުބެލުން

- ނިދާކޮޓަރީގައި ޓީވީ ނުބެހެއްޓުން

- ސްކްރީނެއް ދޮށުގައި މަސައްކަތްކުރާނަމަ ކޮންމެ 30 މިނިޓަކުން ކުޑަ ބްރޭކެއް ނެގުން

- ސޯޝަލް މީޑީއާގައި ހޭދަކުރާ ވަގުތު މަދުކުރުން ނުވަތަ ލިމިޓްކުރުން

- ފޯނުން މީހުންނާ ވާހަކަ ދެއްކުމުގެ ބަދަލުގައި ބައްދަލުވެ ވާހަކަދައްކަން އިސްކަންދިނުން