ބޮކްސް އޮފީހުގެ މި ހަފުތާގެ ގަދަ ފަހަކަށް މިވަނީ ކުރީ ހަފުތާއާ އަޅާބަލާއިރު ކޮންމެވެސް ވަރެއްގެ ބަދަލުތަކެއް އައިސްފަ އެވެ.
1. ޑަން ކާކް
މި ހަފުތާގެ އެއްވަނައިގައި މިވަނީ ޖުލައި މަހުގެ 13 ވަނަ ދުވަހު ރިލީޒް ކުރި ޑަން ކާކް އެވެ. އިގިރޭސިވިލާތާއި އެމެރިކާ އަދި ފްރާންސް ގުޅިގެން އުފެއްދި މި ފިލްމަށް މިހާތަނަށް ވަނީ 50.5 މިލިއަން ޑޮލަރުގެ ފައިދާއެއް ލިބިފަ އެވެ. ދެވަނަ ބޮޑު ހަގުރާމައިގެ ތެރޭގައި ހިނގިި ޑަން ކާކް އިވެކުއޭޝަންގެ މައްޗަށް ބިނާކޮށް އުފައްދާފައިވާ މި ފިލްމްގެ ޝޫޓިން ފެށީ މިދިޔަ އަހަރުގެ މެއި މަހު، ފްރާންސްގެ ޑަން ކާކްގަ އެވެ. އަދި ޝޫޓިން ނިމުނީ އެމެރިކާގެ ލޮސް އެންޖަލިސްގަ އެވެ. މި ފިލްމުގެ މަންޒަރުތައް ނެގުމަށް 50 ސްޓަންޓްމަނުންނާއި އިތުރު 6000 މީހުން ބޭނުންކޮށްފައިވެއެވެ. ތާރީހާއި ހަގުރާމަމަތީ ފިލްމުތަކަށް ލޯބިކުރާ ފަރާތްތަކަށް މި ފިލްމު ޔަގީނުންވެސް ކަމުދާނެ އެވެ.
2. ގާލްސް ޓްރިޕް
މިއީ އަންހެން ހަތަރު ރަހުމަތްތެރިންގެ ހަޔާތުގެ މައްޗަށް ބިނާކޮށް ހަގީގީ ހާދިސާތަކެއް އެކުލެވޭ އެމެރިކަން ކޮމެޑީ ފިލްމެކެވެ. މިހާތަނަށް 31.2 މިލިއަން ޑޮލަރުގެ ފައިދާއެއް ލިބިފައިވާ މި ފިލްމް ރިލީޒްކޮށްފައިވަނީ ޖުލައި 21 ގައެވެ. ހެއްވާ މަޖާ ކަންތައްތަކާއި ލޯބީގެ ހާދިސާތަކެއް ދައްކުވައިދޭ މި ފިލްމަކީ ޔުނިވާސަލް ޕިކްޗާސް ގެ އުފެއްދުމެކެވެ.
3. ސްޕައިޑަމޭން ހޯމް ކަމިން
ސްޕައިޑަ މޭން ހޯމް ކަމިން މިފަަހަރު މިވަނީ މިދިޔަ ހަފުތާގެ ދެވަނައިން މި ހަފުތާގެ ތިން ވަނައަށް ވެއްޓިފަ އެވެ. މީގެ ތިން ހަފުތާ ކުރީން ރިލީޒް ކުރެވިފައިވާ މި ފިލްމަށް މިހާތަނަށް ލިބިފައިވަނީ 251.9 މިލިއަން ޑޮލަރުގެ ފައިދާއެެކެވެ.
4. ވޯ އޮދް ދި ޕްލެނެޓް އޮފް ދި އޭޕްސް
މިދިޔަ ހަފުތާގެ ބޮކްސް އޮފީހުގެ އެއްވަނައިގައި އޮތުމަށްފަހު، މި ފިލްމް މިވަނީ މި ހަފުތާގެ ހަތަރުވަނަ އަށް ވެއްޓިފަ އެވެ. ފިލްމް ރިލީޒް ކުރިތާ ދެ ހަފުތާ ވެފައިވާއިރު، ޖުމްލަ ލިބިފައިވަނީ 98.2 މިލިއަން ޑޮލަރުގެ ފައިދާ އެކެވެ. މެޓް ރީވްސްގެ މި ޑައިރެކްޝަންގައި އެކްޝަން އާއި ފިކްޝަން އަދި ޑްރާމާ ވެސް އެކުލެވެ އެވެ.
5. ވެލޭރިއަން އެންޑް ދަ ސިޓީ އޮފް އަ ތައުސަން ޕްލެނެޓްސް
މިއީ މި މަހު 21 ގައި ރިލީޒް ކުރި ފްރެންޗް ސައިންސް ފިކްޝަން އެކްޝަން އެޑްވެންޗާ ފިލްމެކެވެ. ފްރެންޗް ސައިންސް ފިކްޝަން އެއް ކަމުގައިވާ ވެލޭރިއަން އެންޑް ލޮއޮރީންގެ މައްޗަށް ތައްޔާރު ކުރެވިފައިވާ މި ފިލްމުން ދައްކުވައިދެނީ، ޕްލެނެޓް އަލްފާގެ މައްޗަށް ވެރިވެގަންނަ އަނދިރި ބާރަކުން އެ ތަން ސަލާމަތްކުރުމަށް ކުރާ މަސައްކަތެވެ. ފިލްމް ކްރިޓިކްސްގެ ފަރާތުން ކަމުދާ އަދި ކަމުނުދާ ކޮމެންޓްތައް މި ފިލްމަށް ލިބެމުން ދެ އެވެ. ގިނަ ބަޔަކަށް ފިލްމްގެ ވިޝުއަލްސް ކަމުދާއިރު ޕްލޮޓް އަށާއި ކާސްޓިން އަށް ގިނަ ފާޑުކިޔުންތަކެއް ދަނީ އަމާޒުވަމުންނެވެ. މި ފިލްމްގެ އެންމެ ޚާއްސަ ކަމަކީ މަޝްހޫރު ލަވަ ކިޔުންތެރިޔާ ރިހާނާ މި ފިލްމުން ފެނިގެންދިޔުމެވެ. އޭނާ ކުޅެފައިވަނީ ޝޭޕް ޝިފްޓިންގް އެންޓަޓެއިނާއެއްގެ ރޯލެވެ.
ގަދަ ފަހެއްގެ ފަހަތުގައި ދެން ހިމެނެނީ މިދިޔަ ހަފުތާގެ ބޮކްސް އޮފީހުގެ ކުރީގައި ހިމެނުނު، ޑެސްޕިކަބަލް މީ 3 ކާއި، ދަ ބިގް ސިކް އަދި ވޮންޑާ ވުމަން އެވެ. އަދި 10 ވަނައިގައި ވަނީ މީގެ ދެ ހަފްތާކުރީން ރިލީޒް ކުރެވުނު ވިޝް އަޕޮން އެވެ.