ކައި ނިމުމަށް ފަހު އަނގައިގެ ވަސް ކަނޑުވާލުމަށް ނު ދުފާ ދިވެއްސެއް ވަރަށް މަދުވާނެ އެވެ. އަދި ރެސްޓޯރަންޓާއި ހޮޓާތަކުގައި ވެސް ކައި ނިންމާލުމާ އެކު ނަޓްސް ގެންނަންވީހޭ ނުބުނާ ތަންތަން މަދެވެ.

މީގެ އިތުރުން އަޑަފިކޮޅެއް ނުވަތަ މަޑިސީލައެއް ނުހުންނަ ގެއެއް، ދޯންޏެއް ވެސް މަދުވާނެ އެވެ. އަދި ދުފާލުމަށް މި ބޭނުންކޮށް އުޅޭ ފޯއް އެކި ގޮތްގޮތަށް ބޭނުންކުރެ އެވެ. ކިއްލި، ސުޕާރީ، އަދި މިހާރަކަށް އައިސް މޮޑާން ވެގެން ޓަޓަސް ކިއްލި، ޓަސްޓަސް ކިއްލި، އަދި ޖަބުލާނީގެ ގޮތުގައި ވެސް ބޭނުން ކުރެއެވެ. ސުޕާރީ ޕެކެޓެއް، ފޯއް ޕެކެޓެއް، ކިތަންމެ މޮޑާން ވެގެން އުޅުނަސް ސުޕާރީ ޕެކެޓެއް ނޯންނަ ކުއްޖަކު މަދެވެ. ޕާޓީ ނުވަތަ ވޯކްޝޮޕެއްގެ ބިލަތް މީރުކޮށްލުން ނިންމާލެވެނީ ދުފާލުމަކުންނެވެ.

އަޅުގަނޑުމެން މި ބޭނުންކޮށް އުޅޭ ފޯއް، އިނގިރޭސި ބަހުން ނަމަ އެރީކާ ނަޓަކީ އެ ބޭނުން ކުރުމުން އޭގައި ހުންނަ މާއްދާއެއްގެ ސަބަބުން ވަގުތީ ހިތްހަމަޖެހުމެއް ގެނެސްދޭ އެއްޗެކެވެ. ދުފާލުމުން ހިތުގެ ހިނގުމަށް ބަދަލު އާދެ އެވެ. ދުފަން އާދަވެފައި ހުންނަ މީހެއް ނަމަ ނުދުފާ ގިނައިރު ހުރުމުން ވިތްޑްރޯވަލް ސިމްޕްޓަމްސް ނުވަތަ ބޭނުން ނުކުރުމުގެ ސަބަބުން ވާ އުނދަގޫތަކުގެ ތެރޭގައި ހިތަށް ނުތަނަވަސްކަން ވެރިވުން، ބޮލުގައި ރިއްސުން އަދި ރުޅިގަދަވުން ފަދަ ކަންކަން ކުރިމަތިވެއެވެ.

ފޯކަކީ ސިއްހީ ގޮތުން އެހާ ރަނގަޅު އެއްޗެއް ނޫނެވެ. ފޯކަކީ ގްރޭޑް އޭ ކާސިނޯޖަން، ކެންސަރުޖެހުމުގެ ފުރުސަތު އެންމެ ބޮޑު އެކައްޗެވެ. އާންމުކޮށް ދުފާ އުޅޭ މީހެއް ނަމަ އަނގަތެރޭގެ ކެންސަރާއި ގޮހޮރުގެ ކެންސަރު ޖެހުމުގެ ފުރުސަތު ބޮޑުވެގެން ދެއެވެ. ދުފާފައި ހައްޕުނޑުގަނޑު އުކާލުމަކުން ވަކި ސަލާމަތެއް ނެތެވެ. އަޅުގަނޑުމެން ދިވެހިންގެ ކެންސަރާ ބެހޭގޮތުން އަދި ދިރާސާއެއް ކުރެވިފައި ނެތަސް ދިމާވާ މީހުންނަށް ބަލާފައި އަނގަތެރެއާއި ގޮހޮރުގެ ކެންސަރު މަދެކޭ ނުބުނެވޭނެއެވެ.

ދެން އަނެއް ކަމަކީ މި ބޭނުންކޮށް އުޅޭ ކިއްލީގެ ބާވަތްތަކަކީ ހަކުރު އަޅައިގެން ތައްޔާރު ކުރާ ތަކެއްޗަށް ވާތީ ބަރުދަން އިތުރުވުމުގެ ފުރުސަތު ބޮޑުވާނެ ކަމެވެ. ކިއްލި ފަދަ ތަކެއްޗަށް ހުންނީ ހަކުރުގެ އިތުރުން ކޯން ސިރަޕް ނުވަތަ ގްލޫކޯޒް ސިރަޕްވެސް އަޅާފައެވެ. މީގެ ސަބަބުން ބަރުދަން އިތުރުވުމާއި ހަކުރު ކޮންޓްރޯލް ކުރަން އުނދަނގުވުން ކުރިމަތިވެދާނެއެވެ.

ފޯކުން ލިބޭ އަދި އެތައް ބައިވަރު ގެއްލުންތައް ދިރާސާތަކުން ދައްކައެވެ. ބައެއް ދިރާސާތަކުން ދައްކާގޮތުގައި ހިތުގެ ބަލި ޖެހުމުގެ ފުރުސަތު ބޮޑުވުން، ހޯމޯން މައްސަލަ ޖެހުން ފަދަ ކަންކަން މެދުވެރިވެއެވެ. ނަމަވެސް މި ދިރާސާތަކުގެ ވަރުގަދަ ނަކަލް ދިރާސާތަކެއް ފެންނަން ނެތުމުން މިކަމަށް އެހާ ބޮޑަކަށް ނުބަލާނަމެވެ. ނުބެލި ކަމުގައި ވިޔަސް ކެންސަރުފަދަ ވޭން ގަދަ ބައްޔަކަށް މަގުފަހިވުމުގެ ފުރުސަތު ބޮޑުކަމުން ކޮށްލެވޭ ސުވާލަކީ މި ފޯއްތަކާއި ސުޕާރީ އާއި ޖަބުލާނީ އާއި ކިއްލި ކެއުން ހުއްޓާލާކަށް ނުވޭހެއްޔެވެ؟ ވޯކްޝޮޕްތަކުގެ ބިލަތްމީރުކޮށްލުމާއި ޕާޓީތައް ކަރަންފުލާއި ކާފޫރުތޮޅި، އަދި ފޮނިތިށިފަދަ ތަކެތިން އެކަނި ހަމަޖައްސާކަށް ނުވޭ ހެއްޔެވެ.