ރާއްޖޭގައި އުފެދުނު އެންމެ މޮޅު ކޮމީޑިއަނުންނަކީ ކޮން ބައެއްހޭ ބުނެފިނަމަ ހާޖަރާ އާއި ސިއްތިފުޅުގެ ނަން އަންނާނެ އެވެ. މި ތަރިން ވަނީ އެތައް ބަޔަކު ހެއްވާލައިފަ އެވެ. ހާޖަރާ އަދި ސިއްތިފުޅަކީ މީގެ އަހަރުތަކެއް ކުރިން ކޮމެޑީ ފިލްމުތައް ކުޅެފައިވާ ދެ ތަރިންނެވެ. އަނެއްކާ ފިލްމުތަކުން އެމީހުންގެ ގަދަ ރުޅިގަނޑާއި ނުފޫޒު ވެސް ނިކަން ރަނގަޅަށް ދައްކާލާފައިވާ ދެ ތަރިންނެވެ. އެ ވާހަކަތައް ބަހައްޓާފައި ކޮމެޑީ ފިލްމުތަކުގެ ވާހަކަ ދައްކަން ހިނގާށެވެ. މިއަދުގެ މައުލޫއަކީ އެއީ އެވެ. މިއަދު އަހަރެމެންނާ ވަކިވެފައިވީ ނަމަވެސް އެ ތަރިންގެ ހަނދާންތައް އަބަދުވެސް އާކުރަމުން ދާނެ އެވެ. ސޯޝަލް މީޑިއާގައި އެ ފިލްމުތަކުގެ ވަކިވަކި މަންޒަރުތަކުން މީމް ހަދައިގެން މަޖާ ނަގަމުން ދިއުމަކީ އޭގެ އެއް ހެއްކެވެ. އޭގެ އިތުރުން އަދިވެސް އެ ފިލްމުތައް ބަލާ މީހުން އެބައުޅެ އެވެ. ހާޖަރާ އާއި ސިއްތިފުޅު ވަރުގެ ކޮމޭޑިއަނުންތަކެއް ނުއުފެދޭނެ ކަމަށް ނިންމައިގެން ތިއްބާ ދެން އެންމެން ހެއްވަން ފެށީ މިހާރުގެ އިހަވަންދޫ ދާއިރާގެ މެންބަރު މުހައްމަދު އަބްދުﷲ (މުހައްމާ) އެވެ. މީހުން ހެއްވުމުގައި މުހައްމާ ވަނީ ކާމިޔާބު މަސައްކަތްތަކެއް ކޮށްފަ އެވެ.

އެ ޖީލަށް ފަހު ކޮމެޑީ ފިލްމުތައް އޮތީ ދިވެހި އިސްކިރީނުން ވަރަށް ބޮޑަށް މަދުވެފަ އެވެ. އެތައް އަހަރަކަށްފަހު ދެން ހެއްވީ ރޮމޭންޓިކް ކޮމެޑީއިންނެވެ. މިދިޔަ ދެތިން އަހަރު ތެރޭގައި ކޮމެޑީ މަދު ފިލްމެއް ނުކުތެވެ. ބައެއް މީހުންނަށް އެ ފިލްމުތައް ކަމުދިޔައިރު އަނެއް ބަޔަކަށް އެ ފިލްމުތައް ކަމަކު ނުދިޔަ އެވެ. ހާޖަރާ ނުވަތަ ސިއްތިފުޅު ނުވަތަ މުހައްމާމެންނާ ނުލައި އޯޑިއަންސް ނުހެއްވޭނެ ކަމަށް އެމީހުން ބުންޏެވެ. އޭރުގެ އެންމެންގެ ފޭވަރިޓަކަށްވީ މި ތިން ތަރިންނެވެ. މި ތިން ތަރިން އެކުގައި ފެނިގެން ދިޔަ ފިލްމު "މަޖުބޫރު ލޯބި" ވީ ވެސް އެންމެންގެ ފޭވަރިޓަކަށެވެ. އެ ތިން ތަރިން އެކުގައި ފެނިގެން ގޮސްފައިވާ ހަމައެކަނި ފިލްމަކީވެސް އެއީ އެވެ.

"ސިއްތިފުޅާއި ހަޖާރާ އާ އެކުގައި ވަރަށް ކުރިން ކުޅެފައި އިންނާނެ "މަޖުބޫރު ލޯބި". އެއީ އެންމެ ކުރިން މި ދާއިރާގައި ކުރެވުނު މަސައްކަތްތަކުގެ ތެރެއިން ކަމެއް. ދެން ވަރަށް ތަފާތު އެކްސްޕީރިއަންސެއް އެއީ." ނިކަން ދުރު ހަނދާނެއް އާކުރަމުން މުހައްމާ ބުންޏެވެ. "އެއީ ވަރަށް ތަފާތު އެކްސްޕީރިއަންސެއް. ވަރަށް މޮޅު ދެ ބޭފުޅުން އެއީ، ދެން ހާޖަރާ އަކީ ވަރަށް ކުޅަދާނަ ބޭފުޅެއް ގޮތަށް ސިފަކުރެވެނީ ދެން ސިއްތިފުޅުވެސް، މި ބުނީ މީހުން ހެއްވާލުމުގައި ސިއްތިފުޅުވެސް ވަރަށް މޮޅު، ހާޖަރާގެ ސީރިޔަސް އެކްޓިން އާ މި ހުރިހާ ކަމަކަށް ބަލާއިރު ގިނަ ރޯލުތަކަށް ހާޖަރާ މާބޮޑަށް ފިޓުވާ ކަމަށް އަޅުގަނޑަށް ފެންނަނީ. އެކަމަކު ސިއްތިފުޅަކީވސް ވަރަށް މޮޅު ބޭފުޅެއް. ކޮމެޑީ ރޯލުތަކަށް ސިއްތިފުޅަކީ ހަމަ ދޫކުރާނެ ބޭފުޅެއް ނޫން." މުހައްމާ ބުނީ އެކުގައި އޭރު ކުޅުނު ކޮންމެ ސީން އަކީ ވެސް މަޖާ ސީން އެއް ކަމަށެވެ. އަދި އެއީ އެކުގައި މަސައްކަތްކޮށްލަން ވަރަށް ބަރާބަރު ދެ ތަރިން ކަމަށް ބުންޏެވެ.

"ފަހުން ކޮމެޑީ ފިލްމު ހެދިއިރު ހުންނާނެ އެ ދެތަރިންނާ ގުޅޭގޮތަށް އެ ވިސްނުމުގައި މީހުން ޗޫޒްކޮށްފައި ވެސް. ދެން ހަމަ އެމީހުން އެ ދެއްކި ޓެލެންޓް ދެއްކޭވަރުގެ މީހުން މިހާރު ވެސް ފިލްމީ ދާއިރާގައި އެބަތިބި. އެގޮތުން އާރިފާ ވެސް އަޅުގަނޑު ބުނާނީ ހަމަ ކުޅޭނޭ ކޮމެޑީ ހަމަ ވަރަށް ސީރިއަސްކޮށް. މިހެން ބުންޏަސް ހުންނާނެ ދެއްތޯ ތަފާތުތަކެއް މިސާލަކަށް އަޅުގަނޑަކަށް ނުވެވޭނެ ދޯ އަމީތާބް ބައްޗަން އަކަށް. އެގޮތަށް ސިއްތިފުޅަކަށް ނުވެވޭނެ އާރިފާއަކަށް އެކަމަކު ހުނަރުގެ ގޮތުން ދުލެއް ނުކުރާނެ."

ކޮމެޑީ ފިލްމުތަކާ ބެހޭގޮތުން މުހައްމާ ކަންބޮޑުވުމެއްވެސް ފާޅުކުރި އެވެ. އެއީ ކުރު ފިލްމު ނުކުންނަ މިންވަރު އެތައް ގުނައެއް މަދުވެފައި އޮތުމެވެ. ދިވެހިންގެ ބިޒީ ޝެޑިއުލާއެކުގައި ވެސް ބަލައިލާނެ މަޖާ ދިވެހި ފިލްމުތަކެއް މިހާރު ނުނުކުތުމެވެ. އެކަމަށް ހައްލެއް ހޯދުމަށް އަދި އަދިވެސް މުހައްމާ ފިލްމީ ދާއިރާދެކެ ވާ ލޯބި ހާމަކޮށްދިނުމަށް ކޮމެޑީ ފިލްމުތަކެއް ހަދަން މިހާރު ވަނީ ނިންމާފަ އެވެ. އަދި ފަހަރުގައި އެއިން ފިލްމަކުން މުހައްމާ ފެނިދާނެ ކަމުގެ އިޝާރާތެއްވެސް ދެއްވި އެވެ.

ފިލްމީ ދާއިރާ އާއި ކުޑަކޮށް ދުރުވެލާ ސިޔާސީ ދާއިރާއަށް ނުކުތުމުގެ ކުރިން މުހައްމާ ކުޅެފައިވާ ދެ ފިލްމެއް ރިލީޒްނުކޮށް އެބައޮތެވެ. ހާޖަރާ ކުޅުނު ފިލްމުތަކުގެ ތެރޭގައި މަޖުބޫރު ލޯބި، ދޮން މަންމަ، ލޯބިވެވޭނީ ފުރާނަ ދީގެން، ލޭކަރުނަ، އިތުބާރު، ކުށްހީ، ޅީދަރިފުޅު އަދި ދަންމަޅި ހިމެނެ އެވެ. ސިއްތިފުޅުގެ ފިލްމު ތަކުގެ ތެރޭގައި ލޯބީގެ އަނިޔާ، މަޖުބޫރު ލޯބި އަދި ދެރިޔާ ހިމެނެ އެވެ. މުހައްމާ ކުޅެފައިވާ ބައެއް ކޮމެޑީ ފިލްމުތަކުގެ ތެރޭގައި ފަޅިސިކުންތުގެ ސިލްސިލާ ކުރު ފިލްމުތައް، ދެކެދެކެވެސް ގެ ސިލްސިލާ ކުރު ފިލްމުތައް، ތޭރަ އަށް ވިސްނާ ދެހާސް އަދި ސިޔާސީ ކޯޅުން ހިމެނެ އެވެ. ހާޖަރާ އާއި ސިއްތިފުޅަކީ ފިލްމީ ދާއިރާގައި ހަރަކާތްތެރިވި އެންމެ މޮޅު އަދި ލެޖެންޑުންގެ ތެރޭގައި ހިމެނޭ ދެ ތަރިންނެވެ. އެފަހުން މުހައްމާ އަކީވެސް ކޮމެޑީ ފިލްމުތައް ގެނެސްދީ ދިވެހިން އެންމެ ގިނައިން ހެއްވި އަނެއް ތަރި އެވެ. އެ ތިން ތަރިން ސްކްރީނުން ގެއްލުމުން މިހާރު ކޮމެޑީ ފިލްމުތަކުން ފެނިގެންދަނީ މިހާރު ފިލްމީ ދާއިރާގައި އެންމެ ސީނިއާ ތަރިންގެ ތެރޭގައި ހިމެނޭ ތަރިންނެވެ. އެހެންވީމަ މިހާރުގެ ކޮމެޑީ ފިލްމުތައް ބަލާއިރު މިތަރިން މިސް ނުވޭ ހެއްޔެވެ؟