By: Ifraz Ali
ސެލެބްރިޓީ ކަޕުލް، އަބްދުﷲ މުއާޒް (މުއާ) އާއި މަރިޔަމް އައްޒަ ނުވަތަ "މުއާއްޒަ"، އައްޒަ ރަން ކީ ދުވަހުގެ ފޮޓޯތައް ބަރިބަރިއަށް މިހާރު ސޯޝަލް މީޑިއަށް އަޅަމުން އަންނައިރު، އެންމެ ގިނަ ބަޔަކަށް އެންމެ "ލޯބިވީ" މަތީގައި އެވާ ފޮޓޯ އެވެ. އެ ދެ ތަރިންގެ "ބިގް ޑޭ" ގައި ނަގާފައިވާ މި ފޮޓޯގައި ފެންނަނީ މުއާ އަދި އައްޒަ އެ ދެމީހުންގެ ކުރީގެ ކައިވެންޏަށް ލިބުނު ކުދިން އުރާލައިގެން ވަރަށް ލޯބިން ތިބި ތަނެވެ. މުއާ އެ ހުރީ އައްޒަގެ ދަރިފުޅު އުރާލައިގެންނެވެ. އަދި އައްޒަ އެ ހުރީ މުއާގެ ދަރިފުޅު އުރާލައިގެންނެވެ.
އެ ދުވަހުގެ ބައިވަރު ފޮޓޯތަކުގެ ތެރެއިން، ދެ ތަރިން އެކީގައި ނަގާފައިވާ ފޮޓޯއަކަށް އެންމެ ފުރަތަމަ ވެސް ދެމީހުން އިންސްޓަގްރާމްގައި ޝެއާކުރީ މި ފޮޓޯ އެވެ.
އާއިލާ އާއި ރައްޓެހިންނާ އެކު، މި ދެތަރިންގެ ރަން ކިޔުން އޮތީ ވިލިމާލެ ބީޗުގައި، މިދިޔަ ހޯމަ ދުވަހު އެވެ. ރަން ކީ ހަފުލާ ބޭއްވީ، މިހާރު ރަން ކިޔުމުގައި ގިނަ ބަޔަކު ގެންގުޅޭ ސްޓައިލެއް ކަމަށްވާ، ދިވެހިވަންތަކަން ދައްކުވައިދޭ ގޮތަކަށެވެ. އެންމެން ތިބީ ދިވެހި ސަގާފީ ހެދުމުގަ އެވެ. އައްޒަ ހުރީ ހުދު ކުލައިގެ ކަސަބު ލިބާހެއްގައި، ފައްޓަރު ބައެއް ވެސް އަޅައިގެންނެވެ. އަދި މުއާ ހުރީ ހުދު ގަމީހާއި މުންޑުގަ އެވެ. ދެ ފަރާތު އާއިލާގެ އަންހެނުން ތިބީ ރަތް ލިބާހުގަ އެވެ. އަދި ފިރިހެނުން ތިބީ ހުދު ގަމީހާ/ޓީޝާޓާއި ފޭލީގަ އެވެ.
މުއާއާ އިންނަން އައްޒަ ރަން ކީ 30ރ. އަށެވެ.
އައްޒަ އާއި މުއާ އެ ދެމީހުންގެ ކުރީގެ ކައިވެންޏަށް ލިބުނު ކުދިންނާ އެކު.
މުއާ ކަކޫ މައްޗަށް ތިރިވެ، އައްޒަގެ އަތަށް ބޮސް ދެނީ. އަދި އެ ދެމީހުންގެ ފަހަތުގައި، ރަތް ލިބާހުގައި ތިބި، ދެ ފަރާތު އާއިލާގެ އަންހެނުން އެތުރިލައިގެން.
އައްޒަ ދެ އަތް މައްޗަށް އުފުއްލާލައިގެން ހެވިފައި. އަދި އޭނާގެ ފަހަތުގައި، ރަތް ލިބާހުގައި ތިބި، ދެ ފަރާތު އާއިލާގެ އަންހެނުން އެތުރިލައިގެން.
މުއާ، އައްޒަ އުރާލައިގެން. އަދި އެ ދެމީހުންގެ ފަހަތުގައި، ރަތް ލިބާހުގައި ތިބި، ދެ ފަރާތު އާއިލާގެ އަންހެނުން އެތުރިލައިގެން.
ރަތް ލިބާހުގައި ތިބި، ދެ ފަރާތު އާއިލާގެ އަންހެނުންނާ އެކު އައްޒަ.
މުއާ އާއި އައްޒަ ދެ ފަރާތު އާއިލާގެ އެންމެންނާ އެކު ފޮޓޯއަކަށް ހުއްޓިގެން.
މުއާ އާއި އައްޒަ: ދެ ތަރިން ރައްޓެހިވެގެން އުޅޭތާ އަހަރެއް ވެއްޖެ.
މިފަހުން ދިވެހި ސެލެބްރިޓީ ކަޕުލްއެއްގެ ކައިވެންޏަށް ލިބޭނެ އެންމެ ބޮޑު ސަމާލުކަން މުއާއްޒައަށް ލިބޭނެ އެވެ. ދެން އޮތީ ދެ ތަރިންގެ "ބިގް ފެޓް ވެޑިން" އަށް އިންތިޒާރުކުރުމެވެ. ރަން ކީ ހަފުލާ މިހާ ތަފާތުކޮށްލީމަ، ކައިވެނީގެ ހަފުލާއަށް ފޭނުން ކުރާ އިންތިޒާރު އަދި ވަކިން ބޮޑުވެއްޖެ އެވެ. މުއާއްޒަ ކައިވެނި ކުރާނީ މި މަހު 20 ވަނަ ދުވަހު އެވެ.
މުއާ އާއި އައްޒަ ޑޭޓުކުރާ ކަމަށް ބުނެ އެންމެ ފުރަތަމަ އަޑުތައް ފެތުރުނީ 2018 ވަނަ އަހަރު ކުރީކޮޅު އެވެ. އެކަމަށް އޭރު ދެ ތަރިން އެއްވެސް އެއްޗެއް ބުނާކަށް ބޭނުމެއް ނުވި އެވެ. އަދި އެކަން ދޮގެއް ވެސް ނުކުރެ އެވެ. ސޯޝަލް މީޑިއާގައި ފޮޓޯތަކެއް ވެސް ހިއްސާއެއް ނުކުރެ އެވެ. އައްޒަ، މުއާއާ ޑޭޓުކުރަން ފަށައިފައި ވަނީ ގިނަ ދުވަސްތަކެއް ވަންދެން ސިންގަލްކޮށް ހުރުމަށް ފަހު އެވެ.
ނަމަވެސް މިދިޔަ އަހަރެއްހާ ދުވަހުގެ ތެރޭގައި މި ދެ ތަރިންގެ ލޯބި ފޮޓޯތަކާއި ވީޑިއޯކޮޅުތައް އަދި އެކަކު އަނެކަކަށް ފޮނުވާ ކުރުކުރު ލޯބީގެ މެސެޖުތައް ވެސް ސޯޝަލް މީޑިއާ އިން އަންނަނީ ފެންނަމުންނެވެ. އައްޒަ ލީޑު ރޯލު ކުޅުނު މުއާގެ "ލީނާ"ގެ ޕްރިމިއާ ހަފުލާގައި ވެސް. މުއާ ވަނީ އައްޒަ ދެކެ ވަރަށް ލޯބިވާ ކަމަށް އެންމެން ކުރިމަތީގައި ބުނެފަ އެވެ.