ރޭޕާއި ޖިންސީ އަނިޔާގެ މައްސަލަތައް ރިޕޯޓްކުރުން މިދުވަސްވަރު އިތުރުވެފައި ވާތީ އެކްޓްރެސް މަރިޔަމް އައްޒަ އޭނާގެ އުދާސްތައް ސޯޝަލް މީޑިއާގައި ބަންޑުކޮށްލައިފި އެވެ. އައްޒަ މި އުދާސްތައް ބޭރުކޮށްލީ، އޭނާގެ ކޯސްޓާރެއްގެ ގޮތުގައި، ކުރިން ދެ ފިލްމެއްގައި މަސައްކަތްކުރި އެކްޓަރު މުހައްމަދު ޖުމައްޔިލް ނިމާލްގެ މައްޗަށް ކުރިން ވެސް ކޮށްފައިވާ ރޭޕްގެ ތުހުމަތު އަލުން އަނެއްކާ ފެންމަތިވެ ހޫނުވެފައި ވަނިކޮށެވެ.
އައްޒަ އިއްޔެ ކުރި ޓުވީޓެއްގައި ބުނެފައި ވަނީ ރޭޕިސްޓުންގެ ދިފާއުގައި އުޅޭނީ ހަމަ އެ މީހަކާ އެއްފެންވަރެއްގެ މީހުން ކަމަށެވެ. އަދި ރޭޕްގެ އަމަލު ހިންގީ އާއިލާގެ މެމްބަރެއް، ރަހުމަތްތެރިއެއް އަދި ހަޔާތުގެ ބައިވެރިޔާ އަށް ވިޔަސް ރޭޕިސްޓަކު ވާނީ ރޭޕިސްޓަކަށް ކަމަށާއި ތަފާތެއް ނޯންނާނެ ކަމަށް ބުނެފައިވެ އެވެ. އަދި އިންސާފާއި އަމާންކަމާއި ރައްކާތެރިކަން ބޭނުންވާ ކަމަށް ވެސް އައްޒަ އެ ޓުވީޓްގައި ލިޔެފައިވެ އެވެ. ފިލްމީ ދާއިރާގެ އެހެން ބައެއް ފަންނާނުން ވެސް މި އިބާރާތް ސޯޝަލް މީޑިއާގައި ޕޯސްޓްކޮށްފައިވެ އެވެ.
"ހެޔޮނުވާނެ... މީގައި އެންމެ މީހަކަށް ވެސް ދޭންޖެހޭ ހައްގު އަދަބު ދީބަލަ ނިކަން. ދެން މިކަން ކުރަން ހިތަށް އަރުވާ މީހާ ވެސް ބިރުން ގޮސް ފިތްކަޑައިގެންދާ ވަރުގެ. ކޮންމެސް އެއް ގޮތަކަށް އެބަޖެހޭ ދޯ މިކަން ނިންމަން،" އިއްޔެ ކ. މާފުށީގައި 10 އަހަރުގެ އަންހެން ކުއްޖަކު ރޭޕްކުރި ކަމުގެ ޚަބަރާ އެކު އައްޒަ އެހެން ޓުވީޓެއްގައި ލިޔެފައިވެ އެވެ.
އައްޒަ ވަނީ ރޭޕާ ގުޅޭ ގޮތުން މި ނޫން ވެސް ވަރަށް ގިނަ އިތުރު ޓުވީޓްތައް ކޮށްފަ އެވެ. އަދި ރޭޕާ ގުޅުންހުރި ބައެއް ޓުވީޓްތައް ރީޓުވީޓް ވެސް ކޮށްފައިވެ އެވެ.
ޖުމައްޔިލްގެ މައްޗަށް ރޭޕްގެ ތުހުމަތު ކުރި ޚަބަރާއި ޑާކްރެއިން އިން ޖުމައްޔިލްއާ އެކު މަސައްކަތް ކުރުން ހުއްޓާލި ޚަބަރު ވެސް އައްޒަ ވަނީ ރިޓުވީޓް ކޮށްފަ އެވެ.
ރޭޕްގެ މައްސަލަތަކާ މެދު ކަންބޮޑުވެ، އެންމެ ފާޅުގައި މިހާރު ސޯޝަލް މީޑިއާގައި މި ވާހަކަ ދައްކަމުން އަންނަ އެއް ތަރިއެއްގެ ގޮތުގައި ވެސް ފާހަގަކުރެވެނީ އައްޒަ އެވެ.
އައްޒަ ޖުމައްޔިލާ އެކު ތިން ފިލްމެއްގައި މަސައްކަތް ކުރި އެވެ. އެއީ ޑާކްރެއިންގެ ލޯބީގެ ފިލްމު "މިއީ ލޯތްބަކީ" އާއި ކޮމެޑީ ފިލްމު "މާމުއި" އަދި ޑައިރެކްޓަރު ފާތިމަތު ނަހުލާގެ ބިރުވެރި ފިލްމު "4426" ގަ އެވެ.
ނަހުލާ 2016 ވަނަ އަހަރު އިއުލާންކުރި "ބީ" ކިޔާ ލޯބީގެ ފިލްމެއްގައި ވެސް އައްޒަ އާއެކު ޖުމައްޔިލް ކާސްޓު ކުރި އެވެ. އެކަމަކު އެ ފިލްމުގެ މަސައްކަތް ކުރިއަށް ނުގެންގޮސް މަޑުޖައްސާލުމަށް ފަހު، ނަހުލާ ވަނީ އައްޒައާއެކު އާ ތަރިއެއް (އަހްމަދު ޔުނާން)، ލައިގެން "ބޮސް" ގެ ނަމުގައި އެހެން ލޯބީގެ ފިލްމެއް އިއުލާންކޮށް، އެ ފިލްމު ސިނަމާތަކުގައި ވެސް އަޅުވާފަ އެވެ.
"ބީ" މަޑުޖައްސާލަން ޖެހުނު ސަބަބެއް ކަމަށް ވަނީ އެ ފިލްމު އިއުލާންކުރި ފަހުން ހަމަ އެ ނަމުގައި އެހެން ބަޔަކު ފިލްމެއް ރަޖިސްޓްރީކޮށްފައިވާކަން އެނގުނު ހިސާބުންނެވެ. ނަމަވެސް ފަހުން ނަހުލާ ވަނީ އެ ނަން އަނބުރާ ހޯދައިފަ އެވެ. އެ ފިލްމުގެ ޚަބަރެއް އޭގެ ފަހުން ނުވެ އެވެ.