ފޯލިކް އެސިޑަކީ މާބަނޑު އިރު އެންމެ ގިނައިން އަހަރެމެން ކާންޖެހޭ އެއް ބޭހެވެ. ގާތްގަނޑަކަށް 400 މައިކްރޯގްރާމްސްގެ ފޮލިކް އެސިޑް ހިމެނޭ ޕްރީނޭޓަލް ވިޓަމިނެއް ނެގުމަކީ މައިމީހާގެ ބަނޑުގައި ހެދިބޮޑުވަމުން އަންނަ ތުއްތު ދަރިފުޅުގެ ސިކުނޑި އާއި ސްޕައިނަލް ކޯޑުގައި އެއްވެސް ކަހަކަ އުނިކަމެއް މެދުވެރިވުމުން ރައްކާތެރިކުރުމަށް އެހީވެދޭ މުހިންމު މާއްދާއެކެވެ. މިއީ މާބަނޑުވުމާ ގުޅޭ ގޮތުން އެންމެ ގިނައިން މީހުން މައުލޫމާތު ހޯދާ އެއް މައުޟޫ ވެސް މެ އެވެ.
ފޮލިކް އެސިޑަކީ ކޮބާ؟
ފޯލިކް އެސިޑަކީ ބީ ވިޓަމިންގެ ބާވަތެއް ކަމަށްވާ ފޮލޭޓް އެވެ. މިއީ ގުދުރަތީ މާއްދާއެއް ނޫނަސް، ފޮލޭޓްގެ ސަބަބުން ދަރިފުޅުގެ ރެޑް ބްލަޑް ސެލްސް އުފެދި، ސިކުނޑި އަދި ސްޕައިނަލް ކޯޑު ހެދުމަށް އެހީވެދެ އެވެ. ހަމަ އެޔާ އެކު، ދުވަސްނުފުރާ ވިހެއުމާއި، ވިހާއިރު ބަރުދަން ލުއިވުމާއި، ބައިގެން ދިއުމާއި އަދި ރަހިމުގައި ރަނގަޅަށް ހެދިބޮޑުވުމަށް ވެސް އެހީވެދެ އެވެ.
މި ނޫނަސް، ފޯލިކް އެސިޑަކީ ހިތުގެ މައްސަލަތަކުން ވެސް ދުރުކޮށްދޭ މާއްދާއެކެވެ. މިގޮތުން، ބްލަޑް ޕްރެޝަރު ދަށްކޮށްދީ ލޭދައުރުވާ މިންވަރު އިތުރުކޮށްދެ އެވެ. ދިރާސާތަކުން އެނގޭ ގޮތުން ސަޕްލިމެންޓްގެ ގޮތުގައި ފޯލިކް އެސިޑް ގަވާއިދުން ނަގާ ނަމަ، އެކި ކަހަލަ ހިތުގެ ބަލިތަކުން ހަތަރު ޕަސެންޓް ދުރުކޮށްދީ، ސްޓްރޯކް ޖެހުމުގެ ފުރުސަތު 10 ޕަސެންޓް ކުޑަކޮށްދެ އެވެ.
ފޯލިކް އެސިޑް ކާންވީ ކޮންއިރަކު؟
އުފެދުމުގައި ހުންނަ އުނި ކަންކަމަކީ މާބަނޑުވުމުގެ އެންމެ ފުރަތަމަ 4-3 ހަފްތާގައި ހިނގާ ކަންކަމެވެ. އެހެންވެ، މި މުއްދަތުގައި ހަށިގަނޑުގައި ފޮލޭޓް ހުރުން ކޮންމެހެން ވެސް މުހިންމެވެ.
ހާއްސަކޮށް ބަނޑުބޮޑުވުމުގެ ކުރިން އެކަމަށް ހަށިގަނޑު ތައްޔާރުކުރުމަށްޓަކައި، ފޯލިކް އެސިޑް ނެގުމަކީ ވެސް މުހިންމުކަމެކެވެ. ދިރާސާއަކުން ދައްކާ ގޮތުން ބަނޑުބޮޑުވުމުގެ އަހަރެއް ކުރިން ފޯލިކް އެސިޑް ނަގަން ފަށައިފި ނަމަ ދުވަސްނުފުރާ ވިހެއުމުގެ ފުރުސަތު 50 ޕަސެންޓް ދަށްކުރެވެެ އެވެ.
އެމެރިކާގެ ސެންޓަރ ފޯ ޑިޒީސް ކޮންޓްރޯލް (ސީޑީސީ) އިން ލަފާދޭގޮތުގައި މާބަނޑުވުމުގެ އެއް މަސް ދުވަސްކުރިންނާއި އަދި ބަނޑުބޮޑުވުމަށް ފަހު ވެސް ކޮންމެ ދުވަހަކު ފޯލިކް އެސިޑް ނެގުން މުހިންމެވެ.
ކެއުމުގައި ފޯލިކް އެސިޑް އިތުރު ކުރާނީ ކިހިނެއް؟
ސަޕްލިމެންޓެއްގެ އިތުރަށް، ކާނާގެ ގޮތުގައި ވެސް ފޯލިކް އެސިޑް އިން މުއްސަނދި ބައެއް ބާވަތްތައް ބޭނުންކުރެވިދާނެ އެވެ. ނާސްތާގެ ގޮތުގައި ބޭނުންކުރާ އެކި ކަހަލަ ސީރިއަލްތަކާއި، ބީފް ލިވަ، މުގުގެ ބާވަތްތައް، ސްޕިނެޗް ފަތް، ބިސް، އެވަކާޑޯ ފަދަ ބާވަތްތައް ހިމެނެ އެވެ.
