ރާއްޖޭގެ ފުރަތަމަ ޖުމްހޫރިއްޔާގެ ފުރަތަމަ ރައީސް މުހައްމަދު އަމީން ދީދީގެ ބޭފުޅުންގެ ތެރެއިން ދުނިޔޭގައި ހުންނެވި ހަމައެކަނި ބޭފުޅާ އަމީނާ މުހައްމަދު އަމީން، އުމުރުފުޅުން 85 އަހަރުގައި އަވަހާރަވީ އިއްޔެ އެވެ. އެކަމަނާ ވަނީ ވަރަށް ގިނަ އަހަރުތަކެއް ވަންދެން ސަރުކާރަށް ހިދުމަތްކުރައްވައިފަ އެވެ. އެގޮތުން ކުރީގެ ރައީސް އިބްރާހިމް ނާސިރުގެ ޕާސަނަލް ސެކްރެޓަރީންގެ ތެރޭގައި މަސައްކަތް ކުރެއްވި އެވެ. ކުރީގެ ރައީސް މައުމޫން އަބްދުއްގައްޔޫމްގެ ވެރިކަމުގައި ހެލްތު މިނިސްޓްރީގައި މަސައްކަތްކުރެއްވި އެވެ. އަދި ރައީސުލްޖުމްހޫރިއްޔާގެ މެމްބަރެއްގެ ގޮތުން 1980 އިން 1985 އަށް ރައްޔިތުންގެ މަޖިލިހުގައި ވެސް މަސައްކަތްކުރައްވައިފައިވެ އެވެ.

އެ ކަމަނާ އަށް ދެ ކައިވެނިފުޅުން ފިރިހެން ދެ ބޭފުޅުންނާއި އަންހެން ދެ ބޭފުޅުން ލިބިވަޑައިގަތެވެ. އޭގެ ތެރެއިން އަމީން ފައިސަލަކީ، އެމްޑީޕީގެ ކުރީ ސަރުކާރުގެ ޑިފެންސް މިނިސްޓަރެވެ. ޑރ. ފަރަހަނާޒު ފައިސަލް އަކީ، މިވަގުތު އިނގިރޭސި ވިލާތުގައި ހުންނެވި ރާއްޖޭގެ ސަފީރެވެ. އެ ކަމަނާގެ ހަތަރު ބޭފުޅަކާއި ފިރިކަލުން ދުނިޔޭގައި އެބަހުންނެވި އެވެ. އަމީނާގެ ބޭފުޅުންގެ ތެރޭގައި އިނގިރޭސި ވިލާތުގައި ހުންނަވާ ރާއްޖޭގެ ސަފީރު ފަރަހަނާޒް ފައިސަލާއި ކުރީގެ ޑިފެންސް މިނިސްޓަރު އަމީން ފައިސަލް ހިމެނިވަޑައިގަންނަވަ އެވެ.

އަމީނާ އަވަހާރަވެވަޑައިގެންނެވި ޚަބަރާއެކު އިއްޔެ ސޯޝަލް މީޑިއާގައި އެ ކަމަނާގެ ކުޑަ އިރުގެ ދުވަސްތަކާއި ޒުވާން އުމުރުގެ ބައެއް ހަނދާނީ ތަސްވީރުތައް ދައުރުވި އެވެ. މިއީ އޭގެ ތެރެއިން ބައެއް ތަސްވީރުތަކެވެ؛