ފެވަރިޓް އާޓިސްޓެއްގެ ލައިވް ޕާފޯމަންސެއް ބަލައިލަން ލިބުމަކީ ތަފާތު ތަޖުރިބާއަކަށް ވާނެ އެވެ. ގިނަ އާޓިސްޓުންނަކީ އާއްމުކޮށް އެ ބައެއްގެ ގައުމުގައި ޝޯތައް ދޭ ބައެކެވެ. ވޯލްޑް ޓުއާއެއްގައި ވެސް ގިނަ ފަހަރު މި ރީޖަނުން އަހަރެމެން އާއްމުކޮށް ގޮސް އުޅޭ ގައުމުތަކަށް އާޓިސްޓުން ޕާފޯމްކުރަން ނުދާތީ އެ ފަދަ ޝޯއެއް ތަޖުރިބާކުރުމުގެ ފުރުސަތު ވަރަށް މަދު ފަހަރަކު ނޫނީ ނުލިބޭނެ އެވެ.

މި އާޓިސްޓުންގެ ޝޯތައް އަހަރެމެންނަށް ހާއްސަ ވަނީ އެހެންވެ އެވެ. ބަލައިލަން ދެވިދާނެ ހިސާބަށް މި އާޓިސްޓުން އަންނާތީ އެވެ. ޗުއްޓީގައި އާއްމު މަންޒިލްތަކަށްވެފައިވާ އިންޑިއާ, މެލޭޝިއާ އަދި އިންޑޮނީޝިއާ ފަދަ ގައުމުތަކަށް އަހަރުމެންގެ ފެވަރިޓް ލިސްޓުގައި ނަން ހިމެނޭ އާޓިސްޓުން އެބަ އާދެ އެވެ.

ޔޫކޭގެ މަޝްހޫރު ލަވަކިޔުންތެރިޔާ އެޑް ޝީރަން އަކީ ރާއްޖޭގައި ގިނަ ބަޔަކު ވެޑިންތަކުގައި ޖަހާ ޕާފެކްޓް އާއި ތިންކިން އައުޓް ލައުޑް ފަދަ ލަވަތައް ގެނެސްދީފައިވާ ފަންނާނެކެވެ.

އެޑް ޝީރަންގެ "ދަ މެތަމެޓިކްސް ޓުއާ" ގައި އަންނަ ޖެނުއަރީ 30 އިން ފެށިގެން ފެބްރުއަރީ 15 އާ ހަމައަށް އިންޑިއާގެ އެކި ސިޓީތަކުގައި ޓުއާކުރުމަށް ވަނީ ހަމަޖެހިފަ އެވެ. އެޑް ޝީރަންގެ ކޮންސެޓުތައް ޗެންނާއި ބެންގަލޫރު އަދި ހައިދަރުއާބާދާއި ދިއްލީ ހިމެނޭ ގޮތަށް ހަ ސިޓީއެއްގައި ޕާފޯމް ކުރާނެ އެވެ.

ކޯލްޑްޕްލޭ އަކީ ދިވެހިންގެ މެދުގައި ވަރަށް މަގުބޫލު ބޭންޑެކެވެ. މިއީ ރެސްޓޯރަންޓުތަކުން މިހާރު ވެސް އިވޭ ސައިންޓިސްޓް އާއި ފިކްސް ޔޫ އަދި ޔެލޯ ފަދަ މަގުބޫލު އެތައް ލަވަތައް އަހަރުމެންނާ ހަމައަށް ގެނެސްދިން ބޭންޑެވެ.

މި ބޭންޑުން 2022 ވަނަ އަހަރު ފެށި "މިޔުޒިކް އޮފް ދަ ސްފިއާސް" ޓުއާގައި އޭޝިއާގެ ގައުމުތަކުގައި ވަނީ ޕާފޯމްކޮށްފަ އެވެ. މި ޓުއާގައި އަދިވެސް އެކި ގައުމުތަކުގައި މި ބޭންޑުން ޓުއާ ކުރަމުން ދާއިރު އަންނަ އަހަރު މި ސަރަހައްދުގެ އެކި ގައުމުތަކުގައި ޓުއާކުރަން ނިންމައި ކޮންސެޓު ޑޭޓުތައް ވަނީ އިއުލާނުކޮށްފަ އެވެ.

ކޯލްޑް ޕްލޭއިން މި ޓުއާގައި އަންނަނީ އަބޫދާބީ އާއި އިންޑިއާ އަށެވެ. އަންނަ މަހު ދިނުމަށް ހަމަޖެހިފައިވާ މި ޝޯތަކުގައި އަބޫދާބީގައި 4 ޝޯ އަދި އިންޑިއާގެ އެކި ހިސާބުތަކުގައި 5 ޝޯ ކުޅޭނެ އެވެ.

ނުވަދިހައިގެ ފަހުކޮޅުގެ އަހަރުތަކުން ފެށިގެން މިއަދާ ހަމައަށް އައި އިރު ވެސް މި ބޭންޑަކީ އަހަރުމެންގެ ތެރޭގައި އަދިވެސް މަގުބޫލު ބޭންޑެކެވެ. ބޭބީ ބޫމާޒް އާއި މެލެނިއަލްސް އަދި ޖެން ޒީގެ މެދުގައި ވެސް މެރޫން 5ގެ ލަވަތަކަކީ ހިޓެކެވެ. މިއީ "ޝީ ވިލްބީ ލަވްޑް" އާއި "ޕޭފޯން" އާއި "އެނިމަލްސް" އަދި "ގާސްލްސް ލައިކް ޔޫ" ފަދަ ލަވަތައް އަހަރުމެންނާ ހަމައަށް ގެނެސްދިން ބޭންޑެވެ.

މި ބޭންޑުން މީގެ ކުރިން ވެސް މި ރީޖަނުގެ ބައެއް ގައުމުތަކުގައި ޕަފޯމްކުރި އެވެ. މި ބޭންޑުން ފެބްރުއަރީ މަހު އިންޑޮނީޝިއާގެ ޖަކާޓާގައި އަދި ތައިލެންޑުގެ ބެންކޮކްގައި އެއް ޝޯ ކުޅޭނެ އެވެ.