މަޝްހޫރު ލަވަކިޔުންތެރިޔާ ޝަލަބީ އިބްރާހީމާއި ލަވަކިޔުންތެރިޔާ ޝިފާ އިބްރާހީމް ކައިވެނިކޮށްފި އެވެ.

ދެ ތަރިން ކައިވެނިކޮށްފައިވަނީ މިއަދު ވީޑިއޯ ކޮންފަރެންސް މެދުވެރިކޮށެވެ. ދިވެހި ސަގާފީ ހެދުމުގައި ކައިވެނި ކުރި އިރު އާއިލާ އާއި ގާތް ރައްޓެހިންނަށް ކުޑަ ހަފްލާއެއް މިއަދު ބާއްވާނެ އެވެ.

ޝަލަބީ އާއި ޝިފާ ކައިވެނިކޮށްފައިވަނީ ލޯބީގެ ގޮތުން ގުޅިގެން އުޅޭތާ ދޮޅު އަހަރު ފަހުންނެވެ. ނަމަވެސް ކައިވެނި ކުރުމާ ހަމައަށް ދެތަރިންގެ ގުޅުން ވަނީ އާންމުންނަށް ސިއްރުކޮށްފަ އެވެ.

ޝަލަބީ އަދި ޝިފާގެ އިންސްޓަގްރާމްގައި ދެތަރިންނަށް މަރުހަބާ ކިޔައި އެހެން މީހުން ޕޯސްޓުކޮށްފައިވާ ސްޓޯރީތައް އަންނަނީ ރީޕޯސްޓުކުރަމުންނެވެ.

ޝަލަބީގެ އިތުރުން ޝިފާ އަކީ ވެސް މޯލްޑިވިއަން އައިޑޮލްގެ ފުރަތަމަ ސީޒަނުން ވިދާލި ތަރިއެކެވެ. ސީޒަންގެ ކުރީކޮޅުން މުބާރާތާ ވަކިވާން ޖެހުނު ނަމަވެސް މިދިޔަ ދުވަސްތަކުގައި ޝަލަބީ އަދި ހައުސް އޮފް މިއުޒިކާއެކު ގިނަ ޝޯތަކެއް ޝިފާ ވަނީ ދީފަ އެވެ.

މި ފަހުން ޝަލަބީގެ އާ ލަވައެއް ވެސް ވަނީ ދޫކޮށްލާފަ އެވެ. އެގޮތުން މި މަހު ނެރުނު "ލޯބިވާތީ" އަކީ ކައިވެންޏަށް ރަން ކީ ދުވަހު ނެރެފައިވާ ލަވަ އެކެވެ. ނަމަވެސް އެއީ ކައިވެންޏާ ގުޅުވައިގެން ނެރުނު ލަވައެއް ކަމެއް ނޭނގެ އެވެ.