ސެލެބްރިޓީ ސްޓާރު، މަރިޔަމް އައްޒަގެ ޗާލު އެޕާޓްމަންޓުް އިންސްޓަގްރާމްގައި ދައްކާލުމުން އެންމެން ކެކިއެރީ އެވެ. މީހުންނަށް ނޭނގި އޮތް ކަމަކީ ލޮކްޑައުންގައި އެ އެޕާޓްމަންޓަށް އައި ބަދަލެވެ.

އެޕާޓްމަންޓްގައި އަމިއްލަ އަތުން ފަރުމާނުކުރާ ހަމަ އެންމެ ތަންކޮޅެއް ވެސް ނީންނާނެ ކަމަށް އޭނާގެ ފިރިމީހާ އަބްދުﷲ މުއާޒް (މުއާ) ބުންޏެވެ. މުއާ އެހެން ބުނީ، ވިލިމާލޭގައި އެ މީހުން ދިރިއުޅޭ މި އެޕާޓްމަންޓްގެ ރެނޮވޭޝަންގެ ވާހަކަތައް އަހާލަން އަހަރެމެން ގުޅުމުންނެވެ. މުއާ ފަރުމާކުރީ މިތަނުން ކޮން އެއްޗިއްސެއްތޯ އެހުމުން، އެންމެ ފުރަތަމަ ވެސް ބުނީ މި އެޕާޓްމަންޓުގައި "ނުހަދާ ހުރީ ކޯއްޗެއްސެއްތޯ އަހާބަލާށޭ" އެވެ.

މިއީ މިދިޔަ ލޮކްޑައުންގައި ގޭގައި ބަންދުވެފައި ތިބިއިރު، "މުއާއްޒަ" ކުރި މަސައްކަތެވެ. މިއި މުއާގެ އަމިއްލަ ވަޑާމެވެ.

ބޭރުން މީހަކު ގެނެސްގެން މި އެޕާޓްމަންޓުގެ އެއްވެސް މަސައްކަތެއް ނުކުރުވަ އެވެ. މުއާ ބުނީ އައްޒަގެ ބައްޕަ ކުރިން ހަދައިދީފައި ހުރި މި ކޮޓަރީގެ އިންޓީރިއާ ބަދަލުކުރީ، ގިނައިން އައްޒަގެ ހިޔާލުތަކަށް ކަމަށެވެ. އިންޓީރިއާގެ ކަންކަމަށް އައްޒަ މޮޅެވެ. ފިންޓްރެސްޓުންނާއި ޔޫޓިއުބުން، ތަފާތު ހިޔާލުތައް ހޯދައިގެން މި ހުރިހާ މަސައްކަތް ކުރީ، މުއާގެ ދެމަފިރިންނާއި އައްޒަގެ ބައްޕަ އަދި އެ ގޭގައި ދިރިއުޅޭ އައްޒަމެންގެ ރައްޓެއްސެކެވެ.

"ތަފާތުކޮށް ކޮޓަރި ހަދަން ބޭނުންވެފައި ތިބީ ކުރިން ވެސް. ކުއްލިއަކަށް މެރީ ކުރީ ވެސް، ރޫމާ އެއްޗެހި އެހާ ބޮޑަށް ނުހަދަ. އެކަމަކު ކޮވިޑް އައިމަ ޑިސައިޑްކުރީ މުޅި ގެ އެއްކޮށް ރިނޮވޭޓްކުރާނީއޭ. ކޮންމެހެން ރޫމް އެކަންޏެއް ނޫން،" މުއާ ބުންޏެވެ.

"ސްޓްރަކްޗާ މަސައްކަތަށް ވުރެ އިންޓީރިއާގެ މަސައްކަތް ރާއްޖޭގައި ވެސް އެންމެ އަގުބޮޑީ. ކުރިން ވެސް ކޮންމެސް ވަރަކަށް މިކަން ކޮށް އުޅެން. ދެން ބައްޕަގެ ފަރާތުން ކޮންމެސް ވަރަކަށް ދަސްވެފައި ހުރީ މި ކަހަލަ [ވަޑާންކުރަން] ކަންކަން ކުރަން. އެހެންވެ ބޭނުންނުވީ ބަޔަކަށް ދީގެން ކުރަން،" މުއާ އިތުރަށް ކިޔައިދިނެވެ.

"ދިރިއުޅޭ ތަނެއް އަމިއްލަ ހެދުމަކީ ތިމާއަށް ލިބޭނެ ވަރަށް ބޮޑު ހިތްހަމަޖެހުމެއް ދޯ."

މުއާ ބުނީ އަމިއްލައަށް މި މަސައްކަތް ކުރުމުން، އަތުން ކުރަން ޖެހުނު ހަރަދުތައް ވެސް ވަރަށް ބޮޑަށް ލުއިވި ކަމަށެވެ. އަދި ބަޔަކު ލައްވާ ކުރުމުން ރަނގަޅަށް މަސައްކަތް ނިންމާނެ ކަމުގެ އިތުބާރު ވެސް ގިނަ ފަހަރަށް ނޯންނަ ކަމަށް ބުންޏެެވެ.

"އެމީހުން އިސްކޫރެއް ކިހާވަރަކަށް ކަމެއް ނޭނގޭނެ އިންނާނީ ބާރުކޮށްފައެއް. ބޮލަށް ވެއްޓުނީމަ އެނގޭނީ. އެކަމަކު އަހަންނަށް އެނގޭ އަހަރެން ޖަހާ އިސްކޫރެއް، އަހަރެންގެ އަނބިދަރިން އުޅޭ ތަނެއްގައި، ބޮލަށް ނުވެއްޓޭނެ ވަރު ކުރަން،" އެނގެންޏާ އެންމެ ރަނގަޅުވާނީ އަމިއްލައަށް މި މަސައްކަތް ކުރުން ކަމަށް މުއާ ބުންޏެވެ.

"ތަންކޮޅެއް ލަގްޒަރީ ސްޓައިލަށް ތަނެއް [ބަޔަކު ލައްވާ] ހެދުމަކީ އެއީ ވަރަށް ހަރަދު ދާ ކަމެއް."

މިތަނުގައި ގިނަ ވާނީ މުއާ ވެސް އަލަށް ހަދައިފައި ހުރި އެއްޗެހި ކަމަށް ބުންޏެވެ. އެގޮތުން ގޭގެ ސިޓިންގްރޫމްގައި ބައިންދާފައި އިން ސޯފާ އަކީ ވެސް އަމިއްލަ ހެދި އެއްޗެކެވެ. އައްޒަ ބޭނުންވި ކަހަލަ ސޯފާއެއް މާލެ އިން ނުލިބުމާއި އަދި އެހެން ސޯފާތައް މާ އަގުބޮޑުވުމުން އަމިއްލައަށް ޑިޒައިންކުރީ އެވެ. ވޮޝްރޫމާއި ހެދުން އަލަމާރި އާއި ޑްރެސިން ޓޭބަލް ވެސް ހެދީ އަމިއްލަ އަށެވެ.

މުއާ ބުނީ މިހާރު އިންޓަނެޓް ހަވާލުމުން މި އެއްޗެހި ހަދާނެ ތަފާތު ފަސޭހަ ގޮތް ކިޔައިދީފައި ހުންނާތީ، ކުރަން ބޭނުންވާ މީހަކަށް މިއީ މާ ބޮޑު ކަމަށް ނުވާނެ އެވެ.

ކޮޓަރި އާއި ސިޓިންގްރޫމްގެ ގިނަ ތަންތަން ހެދީ މާބުލް ތީމަކަށެވެ. އަދި ގިނައިން ބޭނުންކުރި ކުލަތަކަކީ ކަޅާއި ހުދާއި އަދި އަޅި އެވެ.

މިހާރު އައްޒަގެ ޝޫ ކަލެކްޝަން ހަދައިފައި އެ ހުރި ތަނަކީ ކުރިން އައްޒަގެ ބައްޕަ ވޯކިން ވޯޑްރޮބެއްގެ ގޮތުގައި ހަދައިފައި އިން ތަންކޮޅެކެވެ. މުއާ ބުނީ އައްޒަ އަކީ ވަރަށް "ޝޫސްގެ މީހެއް" ވިމާ އެތަންކޮޅު، އައްޒަގެ ހިތްހަމަޖެހުމަށްޓަކަ ޝޫ ކަލެކްޝަން ބަހައްޓާ ތަނަކަށް ހެދީ ކަމަށެވެ.

"އެތަނުގައި [އެ އެޕާޓްމަންޓްގައި] އެހުރި ހުރިހާ އެއްޗެއްސަކީ އެތަނަށް ހަދައިފައި ހުރި އެއްޗެހި. ވާހަކައަކީ ތަނަކުން އެއްޗެއް ގެނެސްފިއްޔާ އަހަރެމެން އުޅެން ޖެހޭނީ، މީތި މިތާކު ނުބޭންދިގެން، އޭތި އެތާކު ނުބޭންދިގެން،" އެއީ އަމިއްލަ މި މަސައްކަތް ކުރަން ޖެހުނު އިތުރު ސަބަބެއް ކަމަށް ބުންޏެވެ.

ޝޫ ކަލެކްޝަނަށް ފަހު އާންމުންގެ އެންމެ ބޮޑު ސަމާލުކަމެއް ހުއްޓުނީ އެ އެޕާޓްމަންޓްގެ ޓެރަސް އަށެވެ. އެއީ އައްޒަގެ ކޮޓަރީގެ ބޭރަށް ވާ ގޮތަށް އިންނަ ކުޑަ ޓެރަސްއެކެވެ. އެއީ ކުރިން ހަމަ ހުސްކޮށް އޮތް ތަނެކެވެ. މުއާ ބުނީ އެތަން ހިޔާކޮށްފައި ކޮފީ ކޯނާއަކާއި ގަސް ބަހައްޓާނެ ބައެއް ހެދީ ކަމަށެވެ.

މުއާ ބުނީ އެއް ތަނަކުން ހުރިހާ އެއްޗެއް ލިބިފައި، ފަސޭހައިން ޑެލިވަރީ ވެސް ކޮށްދޭތީ ކޮޓަރީގެ ކާޕެޓާއި ދޮރުފޮއްޗާއި އަދި ޓެރަސްގެ ގްރާސް ކާޕެޓާއި އެއްޗެހި ގެނައީ ޕްރޮކްސީން ކަމަށެވެ.

"ބައެއް މީހުން ކުރާ ކަމަކީ ޓެރަސްއެއް ވިއްޔާ ގަސް އިންދާ ފުރާލަނީ. ބުރީތިން ސްޕޭސެއް ނޯވޭ. އެހެންވީމަ ގަސްކޮޅެއް ވެސް ބަހައްޓައިފައި، ކޮފީ ބޯން އިންނާނެ ތަނަކާ އަދި ކޮފީ ހަދަން ބާއެއް ކަހަލަ ކުޑަ ތަންކޮޅެއް ހެދީ،" މުއާ ބުންޏެވެ.

"ވިލިމާލެއަކީ އޭގެ ޒާތުގައި ވަރަށް އަޑުމަޑު ވަރަށް ހިތްފަސޭހަ ތަނެއް. އެ ހިތްފަސޭހަކަމުގެ ތެރެއަށް އިތުރުވާ ބޮޅެއް އެއީ މި ކަހަލަ ތަންކޮޅެއް ރީތިކޮށް ހަދާލުން. ކޮންމެ މީހެއްގެވެސް ހުންނާނެ މިކަހަލަ ކުދި ތަން ކޮޅުކޮޅު. ކޮންމެ ބަޔަކުވެސް ދިރިއުޅޭ ތަން އެ ބަޔަކު ބޭނުންވާ ގޮތަށް ފަރުމާކުރުން ދޯ މީގައި އެންމެ ފައްކާ ކަމަކީ،" ކުރެވުނު މަސައްކަތާއި މެދު އެ ދެމަފިރިން ވެސް ތިބީ ވަރަށް ހިތްހަމަޖެހިފައި ކަމަށް ބުންޏެވެ.