ޕެރިހަކީ ފެޝަންގެ ދުނިޔޭގައި އެންމެ ނަން ހިނގާ އެއް ގައުމެވެ. ފެޝަން ޝޯޯތަކާއި މުނިފޫހި ފިލުވުމުގެ ހަފްލާތަކުން އެންމެ ވިދުން ގަދަ ހެދުންތައް އުފަންވާ ތަނަކީ ވެސް މިއީ އެވެ. ނަމަވެސް މިފަހަރު ފެޝަން ކްރިޓީކުންގެ އަމާޒުތައް މި ހުއްޓުނީ ފެޝަން ޝޯއެއްގެ ބަދަލުގައި އޮލިމްޕިކް ހަފްލާ އިފްތިތާހު ކުރި އިރު ގައުމުތައް ތަމްސީލުކޮށްދޭން ދިޔަ އެތުލީޓުންގެ ރީތި ޔުނިފޯމްތަކަށެވެ.

ގައުމުތަކުގެ ސަގާފަތް މި ޔުނިފޯމްތަކުން ދައްކުވައި ދޭ އިރު ބައެއް ހެދުންތަކުގައި ހުރި މީގެ ކުރިން ނުފެންނަ ރީތި އަތްތެރިމަސަތްކަތްތަތްވަނީ ދުނިޔޭގެ ފެޝަން މެޕަށް އަަރައިފަ އެވެ.

ތިރީގައި މި ލިސްޓު ކޮށްލަނީ ދުނިޔޭގެ ސަމާލުކަން ދަމައިގަތް ތިން ޔުނިފޯމާއި އޭގޭ ބައެއް ތަފްސީލަށެވެ.

މީގެ ކުރިން 2020 ވަނަ އަހަރުގެ ޓޯކިޔޯ އޮލިމްފިކް ގޭމްސްގައި ވެސް ހުނަރު ދައްކާލާފައިވާ ޖަސްޓިން ޝޫ އަކީ މިއަހަރުގެ އޮފިޝަލް ޔުނިފޯމް ފަރުމާ ކުރުމުގެ ފަހަތުގައިވާ ޑިޒައިނަރެވެ. ނަލަކޮށް ފަހާލާފައި ހުރި ގަދަ ނޫ ކުލައިގެ ސޫޓާއި ފަޓުލޫނުން އެ ގައުމުގެ އެކި ފެހުންތެރިންގެ މަސަތްކަތް ފެނުނެވެ. މީގެ އިތުރުން ޔުނިފޯމް ފަހާފައި ހުރި ފޮތިގަނޑުގައި ދައްކައިދިނީ ޕައުލް ޗިއަންގް ނަމަކަށް ކިޔާ އާޓިސްޓެއްގެ "މައުންޓަން ރޭންޖް އޮފް ޓައިވާން" ގެ ނަން ދީފައިވާ ކުރެހުމެއްގެ މަންޒަރުތަކެވެ.

ޝޫ ވަނީ ސޫޓުގެ މޭމަތީގައި ހުރި ޕިންތަަކާއި އަރައިގެން ތިބި ބޫޓަށް ވެސް އިސްކަންދީފަ އެވެ. ޓައިވާންގެ ގައުމީ މާ ރަމްޒުކޮށްދޭ ޕިންތަކާއި ބެލްޓު އަދި ބޫޓުގެ ފޮތި ވަނީ ޓައިވާންގައި ޒަމާނުއްސުރެއް ގެންގުޅޭ އުކުޅުތަކުން، ދޮންކޭލުގެ ބައިތައް ބޭނުންކޮށްގެން ހަދައިފަ.

ދުނިޔޭގެ އެންމެ ވަރުގަދަ ފެޝަން ކްރިޓީކުން އަދި ސޯޝަލް މީޑިއާގައި އުޅޭ އެންމެ ގިނަ މީހުންގެ ލޯބި މިފަހަރު ލިބުނީ މޮންގޯލިއާގެ ޔުނިފޯމަށެވެ. މިޝެލް އެންޑް އެމަޒޮންކާ ކިޔާ މި ލޭބަލް އިން މި ފަހަރުގެ އޮލިމްޕިކްސް ފެޝަން ޝޯ އިން އެއްވަނަ ހޯދީއޭ ބުނެވިދާނެ އެވެ. މި މަހުގެ ކުރީކޮޅު ސޯޝަލް މީޑިއާގައި ޑިޒައިންތައް ފުރަތަމަ ދައްކާލި ދުވަހުން ފެށިގެން މީހުންގެ ލޯތްބާއި ތައުރީފުތަކުން ކޮމެންޓު ސެކްޝަން ބަނޑުންންވި އެވެ.

މޮޑާން ސްޓައިލަކަށް ހުރި ވެސްޓުތަކުގައި ހުރީ އެ ގައުމުގެ އެކި ވާހަކަތައް ރަން ރޮދިން ކިޔައިދީފަ އެވެ. ގިރުވާނާއި، އަތުން ހިފައިގެން ތިބި އަތްދަބަހަށް ބެލިޔަސް މޮންގޯލިއާގެ ފްލޯކް ވާހަކަތަކުގެ ބައިތަކާއި ގައުމުގެ ރަސްމީ މަންޒަރުތައް ވަނީ އެމްބްރޮއިޑަރީން ދައްކާލާފަ އެވެ.

ހެއިޓީގެ ރީތި ޔުނިފޯމުތަކުން ގިނަ މެސެޖުތަކެއް ދިނެވެ. އެ ގައުމުގައި ހިނގާ ހަމަނުޖެހުންތަކަށް ނިސްބަތްކޮށް އާ އަޒުމަކާއި ހިތްވަރުގެ މެސެޖެކެވެ. މި ޑިޒައިން އަސްލަކަށް ގެނެސްދީފައިވަނީ ހެއިޓީ އަދި އިޓަލީއަށް ނިސްބަތްވާ ހުނަރުވެރި ސްޓެލާ ޖީން އެވެ. އޭނާ ވަނީ އެ ގައުމުގެ އާޓިސްޓެއް ކަމަށްވާ ފިލިޕް ޑޮޑާޑްގެ "ޕެސެޖް" ނަމަކަށް ކިޔާ ކުލަގަދަ ކުރެހުމުގެ މަންޒަރުތައް މި ޔުނިފޯމުގެ ސްކާޓް އަދި ފަޓުލޫނުގައި ހިމަނައިފަ އެވެ. މީގެ އިތުރުން ހެއިޓީގައި ޒަމާނުއްސުރެއް ކަފައިން އުފައްދަމުން އަންނަ ފޮތިން ހަދާފައި ހުރި ނޫ ކުލައިގެ ގަމީސްތަކުގެ އިތުރުން އަޅަައިގެން ތިބި ބެލްޓާއި ބްލޭޒާ ފަރުމާކޮށްފައި ހުރީ ރީސައިކަލް ކޮށްފައިވާ ފޮތިންނެވެ. ހަމަ އެއާ އެކު ފިރިހެން އެތިލީޓުންގެ ފީލްޑު ޖެކެޓުގައި ހެއިޓީގެ އޮލިމްޕިކް ކުޅުންތެރިން ރަމްޒުކޮށްދޭ އެމްބްލަމް ވެސް ޖަހާލާފައި ހުއްޓެވެ.