މޫމިން ފުއާދު ލިޔެ، ޑައިރެކްޓުކޮށް ގެނެސްދިން "ހެޕީ ބާތުޑޭ" އަކީ ސިނަމާގައި އެޅުވި ޑާކްރެއިން އެންޓަޓެއިންމަންޓްގެ ފުރަތަމަ ފިލްމެވެ. ސިނަމާގައި ނާކާމިޔާބުވި ނަމަވެސް، އެވޯޑުތަކުގައި އެ ފިލްމު ވަރަށް ފޯރިގަދަކޮށްލި އެވެ. އެއީ ހަމަ މޮޅު ފިލްކެވެ. އޭގެ ކުރިން ޑާކްރެއިނުން ހެދީ ޓީވީ ޑްރާމާތަކެވެ. މިހާރު އޭގެ ފަހުން 13 އަހަރުވެއްޖެ އެވެ. މިދިޔަ އަހަރުތަކުގެ ތެރޭގައި އެކި ވައްތަރުގެ ފިލްމުތައް އެމީހުން ގެނެސްދިންއިރު، ޑާކްރެއިންގެ އިންސްޓަގްރާމް ޕޭޖުގައި އެ މީހުންގެ ކުރީގެ ބައެއް ހަނދާންތައް އަންނަނީ އާކުރަމުންނެވެ.

"ހެޕީ ބާތުޑޭ" ގެ އިތުރުން އެމީހުންގެ އެންމެ ފާހަގަކޮށްލެވޭ އެއް މަސައްކަތަކަށް އޮތީ، ރާއްޖޭގެ ފުރަތަމަ ތްރީޑީ ފިލްމު "ފަތިސްހަނދުވަރުގެ ފެށުން" އެވެ. އޭގެ ފަހުން އަދިވެސް ދިވެހި ސިނަމާ އަށް ތްރީޑީ ފިލްމެއް ނާދެ އެވެ. އެހެން ފިލްމުތަކުގެ ތެރެއިން، "ހުޅުދާން" އާއި "މިކޮއެ ބައްޕަ ބައެބައެ" އަދި "ވޫޑޫ" ފަދަ ފިލްމުތަކަކީ އެމީހުންގެ ސަޅި މަސައްކަތްތަކެވެ.