ކްރީމް ބަން، ކްރީމް ބަނަސް ނުވަތަ ކިރިމި ޖެހި ބަނަހޭ ކިޔަސް މިއީ ހަމަ އެކައްޗެކެވެ. މިއީ ދިވެހި އުފެއްދުމެކޭ ވެސް ބުނެވޭކަށް ނެތެވެ. ހޮން ކޮންގުން އުފަންވި މި ލުއި ކެއުން، އެކި ގައުމުތަކުގެ މީހުންގެ އަމިއްލަ ނަމެއްގައި، އެކި ގޮތް ގޮތަށް ހަދައިގެން ކައި އުޅެ އެވެ. ފަހަރެއްގައި އަހަރެމެން ދިވެހިން މި ކައި އުޅޭ "ކިރިމި ޖެހި ބަނަސް" އަކީ ވެސް މީގެ ވައްތަރަކަށް ވުމީ ހަމަ ވެދާނެ ކަމެކެވެ. އެކަމަކު ޔަގީންކޮށް ބުނާކަށް ނޭނގެ އެވެ.
ކިރިމި ޖެހި ބަނަސް ދިވެހިންގެ ތެރެއަށް ތައާރަފުވެ، ދިވެހިންގެ ހިތާ އެހާ ގާތް ގުޅުމެއް އޮންނަ އެއްޗަކަށްވީ ކޮން ޒަމާނުކަމެއް ސާފުވާކަށް ނެތެވެ.
އަބަދު ވެސް ވަރަށް ފަސޭހައިން އަހަރެމެން ކުޅުދިޔާކޮށްލި، ހަދާލަން ފަސޭހަ، ކާލަން އެހާމެ އަރާމު އެއްޗަކަށްވެފައި، މި ފަހުން ކިރިމި ޖެހި ބަނަހުގެ އެ ދަރަޖަ ދިވެހިންގެ މެދުގައި އޮތީ ވަރަށް މަތިވެފަ އެވެ. މި ސަބަބާ ހެދި ކިރިމި ޖެހި ބަނަސް ލިބޭނެ މީރު ތަންތަނުގެ ލިސްޓެއް ހަދާކަށް އަހަރެމެންނަކަށް ފަސޭހައެއް ނުވި އެވެ. މިފަހަރު އަހަރެމެން ލިސްޓެއް ނުހަދާ މި ދޫކޮށްލާނީ ކިޔުންތެރިންނަށެވެ. މިކަން ކޮށްދީބަލާށެވެ.
