ޖާނަލިންގް އަކީ އަމިއްލަ ހިޔާލުތަކާއި ކަންބޮޑުވުންތަކާއި އިހުސާސްތަކާއި އެ މީހެއްގެ ދިރިއުޅުމުގައި ހާސިލްކުރަން ބޭނުންވާ ކަންކަމާއި މި ކަންކަމާ ހަމައަށް ވާސިލުވާން ކުރާ މަސަތްކަތްތައް ލިޔެ ރައްކާކުރުމެވެ. މި ލިޔާ ފޮތަކީ އެމީހަކު ބޭނުންވާގޮތަކަށް އެއްވެސް ޖަޖްމަންޓަކާއި ނުލައި ފަސޭހައިން ލިޔެލެވޭނެ ނުވަތަ ކުރަހާލަން ބޭނުންވިއަސް މިކަން ކުރެވިދާނެ ގޮތަށް ބާއްވާ ފޮތެކެވެ.

ޖާނަލް ކުރުމަށް އެކި ކަހަލަ އެޕްތައް ބޭނުންކުރި ނަމަވެސް އަދިވެސް ހަމަ އެންމެ ރަނގަޅީ ގަލަމަކާއި ގަނޑެއް ބޭނުންކޮށްގެން ލިޔުން ކަމަށް ބުނާ މީހުން ގިނަ އެވެ. ޖާނަލް ކުރުމުގެ އާދަ ދަމަހައްޓާ ނަމަ ލިބޭ ފައިދާތަކެއް ހުރެ އެވެ.

އެމެރިކަން ސައިކޮލޮޖިކަލް އެސޯސިއޭޝަންގެ އާޓިކަލްއެއްގައި ބުނެފައިވާ ގޮތުގައި، ގަވައިދުން ޖާނަލް ކުރުމުން ސިކުނޑީގައި ހިޔާލުތަކެއް ނުވަތަ މައްސަލަތަކެއް އެނބުރޭ ނަމަ ތިމާގެ ޓެންޝަން ކުޑަކޮށްދިނުމަށާއި ދަތި ކަންކަމާ ކުރިމަތިލައި މެނޭޖުކުރާނެ ގޮތްތައް ހޯދުމަށް ފަސޭހަވެ އެވެ. ގިނަ ފަހަރަށް، މިގޮތަށް ފޮތެއްގައި ލިޔެލުމުން ބޮޑު މައްސަލައެއް ކަމުގައި ހީވެފައި ހުރިކަންކަން އާދައިގެ ކަމެއްގެ ގޮތުގައި އިހްސާސްވެ އެވެ. އެކަމާ ދޭތެރޭ ދެކޭ ގޮތް ބަދަލުކޮށްދީ ކަންކަމާ ކުރިމަތިލުމުގެ އާ ހިތްވަރެއް ލިބުމަށް އެހީއަކަށްވެ މެނޭޖުކުރަން އެނގެ އެވެ. މިއީ އިހުސާސްތައް ޕްރޮސެސް ކޮށްލަން ރަނގަޅު ގޮތެކެެވެ.

ކޮންމެ ދުވަހެއްގެ ޒިންމާތައް ގިނަވެ އަދި ގިނަ މީހުންނާ ދިމާވާ ނަމަ، ކުރަންޖެހޭ ކަންކަމަށް ފޯކަސް ގެއްލި ހާސްކަން ބޮޑުވެ ވަރުބަލިވެ އަދި ހަނދާން ބަލިވުމަކީ ދިމާވާ މައްސަލައެކެވެ. ވިސްނަން ޖެހިފައި ހުރި ކަންކަން ނުވަތަ ކުރަން ހުރި ކަންކަމާއި އުނދަގޫތަކާއި މިކަންކަންކަމާ މެދު ދެކޭ ގޮތް ފޮތެއްގައި ލިޔެލުމުން އޯގަނައިޒްކޮށްލަން ފަސޭހަވެ ކޮންމެ ކަމަކަށް ދެވޭ ފޯކަސް އިތުރުވެ އެވެ.

ސައިކޮލޮޖީގެ އެކި ރިސާޗުތަކުން ޖާނަލިންގެ މި ޕޮއިންޓު ފާހަގަވެ އެވެ. ދިރިއުޅުމުގައި ގިނަ ދުވަހުން ހާސިލް ކުރަން ބޭނުންވާ ނުވަތަ ލޯންގް ޓާމް ގޯލްތަކާއި ކޮންމެ ދުވަހެއް ނުވަތަ ހަފްތާއެއް ނިމުމުގެ ކުރިން ހާސިލް ކުރަން ބޭނުންވާ ޝޯޓް ޓާމް ގޯލްތައް ލިޔާށެވެ. ގޯލްތައް ހާސިލް ކުރަން އަޅަން ޖެހޭނެ ކުދިކުދި ފިޔަވަޅުތައް ވެސް ހިމަނާލައި މި ދަތުރު ގަވައިދުން ޑޮކިއުމަންޓު ކުރުމުން އިތުރު ހިތްވަރަކާއި ބޭނުންވާ ހިސާބަށް ދެވޭވަރު ފެނިގެން ދިޔުމުން ލިބޭ ހިތްހަމަޖެހުން ބޮޑުވެ އެވެ.

މިއީ ވަރަށް ގިނައިން ތެރެޕީތަކުގައި ދޭ އެކްސަސައިޒެކެވެ. މިއީ ތިމާގެ ނަފްސު ރަނގަޅަށް ދެނެގަނެ އަމިއްލަ މީހާގެ ހިޔާލުތަކާއި އަހުލާގު ރަނގަޅު ގޮތުގައި ބައްޓަން ކުރަން ފަސޭހަވެގެންދާ ކަމެކެވެ. ނުރަނގަޅު އާދައެއް ނުވަތަ ޕެޓާންއެއް ހުރި ނަމަ މިކަންކަން ދެނެގަނެ އަމިއްލަޔަށް ހައްލު ހޯދާލަން ފަސޭހަކޮށްދީ ޕޮޒިޓިވް ބަދަލެއް ގެނެއުމަށް ފަސޭހަވެ އެވެ.

ކޮންމެ ދުވަހެއްގެ ހަލަބޮލި މާހައުލުގެ ތެރޭގައި އަދި ހާއްސަކޮށް ސޯޝަލް މީޑިއާގެ މި ޒަމާނުގައި އެކަނިވެރިކަން އިހުސާސް ކުރެވުމާއި ޑިޕްރެޝަން އަދި އެންޒައިޓީއާ ކުރިމަތިލާ މީހުން އުޅެ އެވެ. އެހެންވެ، ދުވަސް ނިމިގެން ދާއިރު، ތިމާ އުފާވާކަންކަމާއި ހިތްހަމަޖެހުނު ކިތަންމެ ކުޑަ ނަމަވެސް ކަމެއް އޮތް ނަމަ ލިޔެލުން މުހިންމެވެެ. މިއީ މޫޑު ރަނގަޅުކޮށްދޭ ކަމެކެވެ.

ކޮންމެ މީހެއްގެ ތަޖުރިބާ ތަފާތުވާނެ އެވެ. ޖާނަލިންގްއާ ބެހޭ ހޯދުންތަކާއި މި ޕޮއިންޓުތަކަކީ ވެލްނަަސް، ސައިކޮލޮޖިކަލް އަދި ނިއުރޯސައިންސްގެ ދިރާސާތަކުން ފެންނަން ހުރި ތިމާގެ ސިއްހަތާއި ނަފްސާނީ ދުޅަހެޔޮކަމަށް ކުރެވިދާނެ ރަނގަޅު ޕްރެކްޓިސްއެއް ގޮތުގައި ހާމަކޮށްފައިވާ ކަންކަމެވެ.