ބޮލުގައި ހަމަ ރިއްސާއިރަށް ބޭސް ކަން ހެއްޔެވެ؟ އަދި އެ ބޭސް ކެއުމުން ބޮލުގެ ރިހުން އިތުރަށް ގަދަވާހެން ހީވޭ ހެއްޔެވެ؟

މިއީ ވެސް ވެދާނެ ކަމެކެވެ.

މާޔޯ ކްލިނިކުން ބުނާ ގޮތުގައި މައިގްރޭން ފަދަ ބޮލުގައި ރިހުމުގެ މައްސަލަ ދިމާވާ މީހުންނަށް، ތަދު ކެނޑުވުމަށް ބޭނުންކުރާ ގިނަ ބޭސްތަކުން އެފަދަ އަސަރެއް ކޮށްފާނެ އެވެ. އެކަމަކު، ބޮލުގައި ނުރިއްސާ މީހުންނަށް އެހެން ދިމާވުމުގެ ފުރުސަތެއް ނެތެވެ. ނަމަވެސް، އާއްމުކޮށް ބޮލުގައި ރިއްސާ މީހުން، އާތުރައިޓިސް ފަދަ އެހެން ބައްޔަކަށް، ތަދުކަނޑުވާ ބޭސް އާންމުކޮށް ބޭނުންކުރުމަކީ ބޭސް ގިނައިން ބޭނުންކުރުމުގެ ސަބަބުން ބޮލުގައި ރިހުން ދިމާވެދާނެ ހާލަތެކެވެ.

ގިނައިން ބޭސް ކެއުމުގެ ސަބަބުން ކުރިމަތިވާ ބޮލުގައި ރިހުން އާންމުކޮށް ރަނގަޅުވަނީ ވެސް ތަދުކަނޑުވާ ބޭސް ބޭނުންކުރުން ހުއްޓާލުމުންނެވެ.

"މިކަމުގެ ސަބަބުން، ކުރު މުއްދަތަކަށް ތަދު ކޮންޓްރޯލްކުރުމަށް ދަތިތަކާ ކުރިމަތިވެދާނެ. ނަމަވެސް، ބޭސް ގިނައިން ބޭނުންކުރުމުގެ ސަބަބުން އަންނަ ބޮލުގައި ރިހުން ހުއްޓުވަން ސިއްހީ އެހީތެރިއަކަށް މަގުދައްކައިދެވިދާނެ،" އެމެރިކާގައި ހޮސްޕިޓަލުތަލާއި ސިއްހީ ދާއިރާގެ އެކި ދިރާސާތައް ހަދާ ސެންޓަރުން ބުނެފައިވެ އެވެ.

ގިނައިން ބޭސް ބޭނުންކުރުމުގެ ސަބަބުން އަންނަ ބޮލުގައި ރިހުމުގެ އަލާމާތްތައް ހުންނަނީ ފަރުވާކުރެވޭ ބޮލުގައި ރިހުމުގެ ބާވަތާއި ބޭނުންކުރާ ބޭހުގެ މައްޗަށެވެ. އެފަދަ ބޮލުގައި ރިހުންތަކުގައި އާންމުކޮށް؛

• ކޮންމެ ދުވަހަކު ނުވަތަ އަބަދު ބޮލުގައި ރިހުން ހުރޭ. މިފަދަ ރިހުމުގެ ސަބަބުން މީހާ ނިދިން ހޭލެވޭ.
• ތަދު ކަނޑުވާ ބޭހުން ތަދު ކުޑަވިއަސް ބޭހުގެ އަސަރު ކެނޑުމުން އަލުން ތަދު އެނބުރި އާދޭ

އެހެނިހެން އަލާމާތްތަކުގެ ތެރޭގައި:

• މޭނުބައިކުރުން.
• އަރާމުކުރިއަސް މީހާއަށް ހަމަޖެހުމެއް ނުލިބުން.
• ސަމާލުކަން ދޭން އުނދަގޫވުން.
• ހަނދާނުގެ މައްސަލަތައް.
• ރުޅިއަންނަގޮތްވުން ނުވަތަ ފޫހިވުން.

ބައެއް ފަހަރު ބޮލުގައި ރިހުމަކީ އާންމު ކަމެކެވެ. އެކަމަކު، ބައެއް ބާވަތުގެ ބޮލުގައި ރިހުމަކީ ފުރާނައަށް ނުރައްކާވެދާނެ ކަމަކަށް ވާތީ ސަމާލުވާށެވެ.

އެހެންވެ، ކުއްލިއަކަށް އަދި ވަރަށް ބޮޑަށް ބޮލުގައި ރިހުމާ އެކު ހުން އައުމާއި ކަރު ހިކުމާއި ވާހަކަދައްކަން އުނދަގޫވުން އަދި ގައިން ބާރު ދެރަވުމަކީ ސިއްހީ މާހިރެއްގެ އެހީ ހޯދަން ޖެހޭ ހާލަތެކެވެ. އޭގެ އިތުރުން؛

• ބޮލަށް ލިބުނު އަނިޔާއަކަށްފަހު ބޮލުގައި ރިހުން.
• އަރާމުކުރުމާއި ތަދުކަނޑުވާ ބޭސް ބޭނުންކުރިއަސް އިތުރަށް ގޯސްވުން.
• ނޭވާކުރުވުމާ އެކު ބޮލުގައި ރިހުން.
• އިށީނދެ އިންނައިރު ބޮލުގައި ރިއްސައި އަދި އޮށޯތުމުން ތަދު ކެނޑުން.

• ހަފުތާއަކު ދެ ފަހަރު ނުވަތަ އެއަށްވުރެ ގިނައިން ބޮލުގައި ރިހުން.
• ބޮލުގައި ރިއްސާއިރު ހަފުތާއަކު ދެ ފަހަރަށް ވުރެ ގިނައިން ތަދުކަނޑުވާ ބޭސް ބޭނުން ކުރުން.
• ޑޮކްޓަރުގެ ސިޓީއާ ނުލައި ގަންނަން ލިބޭ، ތަދުކަނޑުވާ ބޭސްތައް ބޭނުންކުރަންޖެހޭ މިންވަރަށް ވުރެ އިތުރަށް ބޭނުންކުރަންޖެހޭނަމަ.
• ބޮލުގައި ރިހޭ ގޮތަށް/އާދައަށް ބަދަލެއް އައުމުން.

ބޭސް ގިނައިން ބޭނުންކުރުމުގެ ސަބަބުން ބޮލުގައި ރިހުން ދިމާވާ ސީދާ ސަބަބެއް ތަޖުރިބާކާރުންނަށް ވެސް އަދި ސާފެއްނުވެ އެވެ. އެކަމަކު، މި ފަދަ ބޮލުގެ ރިހުމުގައި ނުރައްކާ ބިނާވަނީ ބޭނުންކުރާ ބޭހުގެ މައްޗަށެވެ. 

• އާދައިގެ ތަދުކަނޑުވާ ބޭސް: އެސެޓަމިނޯފެން އަދި އައިބިއުޕްރޯފެން އަދި ނެޕްރޮކްސެން ސޯޑިއަމް ފަދަ އާދައިގެ ތަދުކަނޑުވާ ބޭހުން ބޮލުގެ ރިހުން ކުޑަވުމުގެ ނުރައްކާ ކުޑަ. އެކަމަކު، ދުވަހުން ދުވަހަށް ބޭނުންކުރަންޖެހޭ މިންވަރަށް ވުރެ އިތުރަށް ބޭނުންކުރާނަމަ ނުރައްކާ ބޮޑުވޭ

• މައިގްރެއިން ބޭސްތައް: މައިގްރޭންއަށް ފަރުވާކުރަން އާއްމުކޮށް ބޭނުންކުރާ ޓްރިޕްޓޭންސްއަކީ އެ ފަދަ ބޮލުގައި ރިހުން އުފެދުމުގެ ނުރައްކާ ބޮޑު ބޭސްތައް. އަދި އާގޮޓް ޑައިހައިޑްރޯއާގޮޓަމީން އިން ބޮލުގައި ރިހުން އުފެދުމުގެ ނުރައްކާ ކުޑަ

ބޭސް ގިނައިން ބޭނުންކުރުމުން އަންނަ ބޮލުގައި ރިހުން އުފެދުމުން ރައްކާތެރިވާން ޑޮކްޓަރުގެ އިރުޝާދާ އެއްގޮތަށް ބޭސް ބޭނުންކުރުން މުހިއްމެވެ. އޭގެ އިތުރުން

• ހަފުތާއަކު ދެ ފަހަރަށްވުރެ ގިނައިން ބޮލުގައި ރިހުމުގެ ބޭސް ބޭނުންކުރަންޖެހޭ ނަމަ ސިއްހީ އެހީތެރިއެއްގެ ލަފާ ހޯދުން.
• ޑޮކްޓަރުގެ ބޭސް ސިޓީއާ ނުލައި ގަންނަން ލިބޭ ތަދުކަނޑުވާ ބޭސްތައް މަހަކު 14 ދުވަހަށް ވުރެ ގިނައިން ބޭނުން ނުކުރުން.
• ޓްރިޕްޓޭންސް ނުވަތަ އެއްކޮށްފައިވާ ތަދުކަނޑުވާ ބޭސްތައް މަހަކު ނުވަ ދުވަހަށް ވުރެ ގިނައިން ބޭނުން ނުކުރުން.

އަމިއްލަ ސިއްހަތަށް ބަލައިގެން އުޅުމަކީ ގިނަ ބާވަތްތަކުގެ ބޮލުގައި ރިހުމުން ރައްކާތެރިވުމުގެ އެހީތެރިއެކެވެ.

އެ ހުރިހާ ކަމެއްގައި ވެސް އެންމެ މުހިއްމު ފިޔަވަޅަކީ ބޮލުގައި ރިއްސާ ކަންކަމާ ދުރުވުމެވެ. އެކަމަކު، ރިހުން އުފައްދަނީ ކޮން ކަމެއްކަން ޔަގީން ނުވާނަމަ ޑައިރީއެއް ގެންގުޅުން ނޫނީ ބޮލުގައި ރިއްސާ ކޮންމެ ފަހަރަކު ޑައިރީގައި ލިޔާށެވެ. އޭރުން، ބޮލުގެ ރިއްސުމުގެ ޕެޓާން ދެނެގަންނަން ފަސޭހަވާނެ އެވެ. 

އަމިއްލަ ނަފްސަށް ދެވޭނެ އެންމެ ރަނގަޅު ހަދިޔާއަކީ ރަނގަޅަށް ނިދި ހަމަކުރުމެވެ. ބަންދު ދުވަހަކަށް ވިއަސް، އެއް ވަގުތެއްގައި ނިދައި އެއް ވަގުތެއްގައި ހޭލާށެވެ. 

އިތުރަށް ކުރެވޭނެ ކަންކަން؛

• ކެއުން ރަނގަޅުކުރުން: ސިއްހަތަށް ފައިދާހުރި ހެނދުނުގެ ނާސްތާއަކުން ދުވަސް ފެށުން. ކޮންމެ ދުވަހަކު ވެސް އެއް ވަގުތެއްގައި މެންދުރާއި ރޭގަނޑު ކެއުން. 
• ގަވާއިދުން ކަސްރަތުކުރުން: ހަށިގަނޑު ހެލިފެލިވެ އުޅުމަކީ ތަދުގެ ސިގްނަލްތައް ފޮނުވުން ހުއްޓުވައިދޭ ކެމިކަލްތައް ހަށިގަނޑުން އުފައްދާ ކަމެއް. ޖޮގިންކުރުމާއި ފެތުން ނުވަތަ ބައިސްކަލް ދުއްވުމަކީ ކުރެވިދާނެ ކަމެއް. 
• ބަރުދަން ލުއިކުރުން: މާބޮޑަށް ފަލަވުމަކީ ބޮލުގައި ރިހުން އިތުރުވާ ކަމެއް. ބަރުދަން ލުއިކުރަންޖެހޭނަމަ، އަމިއްލަ މީހާއަށް އެކަށީގެންވާ ފިޓްނެސް ޕްރޮގްރާމެއް ހޯދުން.

• ދުންފަތުގެ އިސްތިއުމާލުކުރުން ހުއްޓާލުން: ދުންފަތުގެ އިސްތިއުމާލުކުރާނަމަ، އެކަން ހުއްޓާލުން. ދުންފަތުގެ އިސްތިއުމާލުކުރުމަކީ ބޭސް ގިނައިން ބޭނުންކުރުމުގެ ސަބަބުން ބޮލުގައި ރިހުމުގެ ނުރައްކާ ބޮޑުވާ ކަމެއް.

ބޮލުގައި ރިއްސާ ކޮންމެ ފަހަރަކު ބޭސް ނުކާށެވެ. އެއީ އާދައަކަށް ހަދައިފިނަމަ ރިއްސާނީ ބޮލުގައި އެކަންޏެއް ނޫނެވެ. ބޭހަށް ވެސް ނުގުޑަފާނެ އެވެ. 

މައުލޫމާތު: މާޔޯ ކްލިނިކް