ޅެމުން ފަރުވާ ހޯދުމުގެ ވާހަކަ ވީ އަހަރެމެންނަށް ބޮޑު ޖޯކަކަށެވެ. އެކަމަކު ގުޅަ ބޭސް އަޅާ ފުޅިތަކާއި ކާޑުތަކުން ފުރިފައިވާ މި ފާމަސީން ދޫކުރަނީ ގުޅަ ބޭހެއް، ސިރަޕެއް ނުވަތަ ފަތްޕިލާވެއްޔެއް ވެސް ނޫނެވެ. ބިއްލޫރި ފުޅިތަކާއި ބޭސްކޮތަޅުތަކުގައި އެ މީހުންދެނީ ޅެމެކެވެ. މިއީ ލަންޑަންގެ އޮކްސްފޯޑު ސްޓްރީޓްގައި ހުންނަ "ޕޮއެޓްރީ ފާމަސީ" އެވެ.
ފާމަސީގައި ވިއްކަންހުންނަ ބޭހުގެ ވާހަކައިގެ ކުރިން ފާމަސީގެ ވާހަކައެވެ. ހިތްގައިމު މި ހާއުލުން ފާމަސީއަށް ވަދެލެވުމާ އެކު އެންމެ ފުރަތަމަ ވެސް ލޮލުގައި އަޅައިގަންނާނީ ފާރުތަކުގައި ހުރި ފޮތް ހަރުގަނޑުތަކެވެ. އަހަރެމެންނަށް ދިމާވެދާނެ ކޮންމެ ފަދަ ހާލަތަކަށް، ނަފްސާނީ ބަލިކަމަކަށް މިތަނުގައި ފޮތެއް ވާނެ އެވެ.
މީގެއިތުރުން މި ހިތްގައިމު މާހައުލުގެ ފުރިހަމަކަން އިތުރަށް ފަޅުފިލުވައިދެނީ ޑިސްޕެންސަރީ ކެފޭއިންނެވެ. އެކި ކަހަލަ ކޮފީ އާއި ސަޔާއި ސަރުބަތުތަކުގެ ވަސް މުޅި މާހައުލުގައި ހިއްޕާލާފައި ހުންނައިރު، ހަމައެކަނި ކެފޭއަކަށްވުރެ ބޮޑަށް ހީވާނީ "ތެރެޕިއުޓިކް" ދަތުރެއްގެ މަތީ އުޅެވެހެންނެވެ.
ދެން ހުރީ ފުޅި ބޭސްތަކެވެ. ދެރަވުން، އުފާވުން، ހަމަޖެހުން، އިމްޕޮސްޓާ ސިންޑްރޮމް މިހެން ގޮސް ކިޔާނެ ކަމެއް ނެތެވެ. ލިޔުންތެރިންނަށް އަންނަ "ރައިޓާސް ބްލޮކް" އަށް ވެސް މި ފާމަސީން ފަރުވާ ލިބެން އެބަހުއްޓެވެ. ނުވިތާކަށް ތަނެއް ކަނޑައިގެން ދިޔުމުން އަޅާލާނެ ބެންޑޭޖްކޮޅެއް ހޯދުން ފަސްޓް އެއިޑް ބޮކްސް ބޭނުންވާހެން، ޖަޒުބާތާއި އިހްސާސްތަކަށް ބޭނުންވާނެ ފަސްޓް އެއިޑް ކިޓްތައް ވެސް ތައްޔާރުކޮށްފައި ހުރެ އެވެ.
އެންމެ ހިތްގައިމު ކަމަކީ ހުރިހާ ޅެމެއް ވެސް ލިޔެ ތައްޔާރުކޮށްފައި ހުންނަނީ ސީދާ ބޭސްގުޅައެއް ގޮތަށް ކަމަށް ވާތީ އެވެ. އަދި އަޅާފައި ހުންނަނީ މި ހިސާބުތަކުގައި ބޭސް ގުޅަތައް އަޅާފައި ހުންނަ ވަރުގެ ކުދި ބިއްލޫރި ފުޅިއަށެވެ. އެހެންވެ މި ފާމަސީއަށް އަންނަ ބަލިމީހަކަށް ހަމަ އަސްލަށް ވެސް މިދެވެނީ ބޭހެއް ނޫނެވެ. ޅެމެކެވެ.
