ފެން ހަރުލާ ޕޮޓެއްގައި ނުވަތަ ބިއްލޫރި ފެންބޯ ތައްޓެއްގައި ވިޔަސް، އޭގެ ތެރެއަށް ހައެއްކަ ކަނޑޫވައް ލައިފައި ބޭންދުމުން ވަރަށް ރީއްޗަށް ހެދިލާނެ އެވެ. މާ ބޮޑު ކަމެއް ކުރާކަށް ވެސް ނުޖެހޭނެ އެވެ. މިއަށް އިރުގެ އަލި ވެސް މާ ބޮޑަކަށް ބޭނުމެއް ނުވެ އެވެ. އެކަމަކު އިރުގެ އަލި ގިނައިން ލިބޭ ނަމަ އަވަހަށް ހެދި ބޮޑުވާނެ އެވެ.

މި އުޅެނީ ހަމައެކަނި ކަނޑޫ ހައްދާނެ ގޮތް ކިޔައިދޭކަށެއް ނޫނެވެ. މިހާރު އޮފީސް އޮފީހުގެ މޭޒުތަކުން އެންމެ މަގުބޫލުކަން ހޯދަމުން އަންނަ ގަހަކަށް، ކަނޑޫ ވެފައި ވާތީ އެ ވާހަކަ ވެސް ނުދައްކާ ހަމަ ނުހުރެވިގެންނެވެ.

ތޮއްޖެހިފައި އޮތް މާލޭގައި ގެއަކަސް، އޮފީހަކަސް މި އޮންނަނީ ރަނގަޅަށް ހަމަ ހެލިލާނެ ވަރަށް ވެސް ޖާގަ ނެތިފަ އެވެ. އެ ކުޑަ ތަންކޮޅުގެ ތެރޭގައި ބަންދުވެފައި ތިބޭއިރު، ހިތަށް ފިނިކަމެއް ލިބޭ ކޮންމެ ވެސް ކަމެއް ވެސް ކުރަން އެބަޖެހެ އެވެ. އެހެން ނޫނީ މީހާ ބޯގޮވާފާނެ އެވެ.

އޮފީހެއްގައި ނަމަ ހޭބޯނާރާ އޮފީސް މޭޒު ދޮށުގައި މަސައްކަތް ކުރަން އިންނައިރު، ކުރިމަތިން ގަހެއް ފެންނަން އިންނަ ނަމަ އެއޮތް ލިބޭ ހިތްހަމެޖުހުމެއް ދޯ އެވެ؟!

މިހެން އޮފީސް މޭޒު މަތީގައި އެކި ވައްތަރުގެ ގަސްތައް އަތުރަލައިގެން ތިބޭ މީހުން އުޅޭނެ އެވެ. ކެކްޓަސް، ޕީސް ލިލީ، ސަންސެވީރިއާ، ކެކްޓި އަދި މިހެން ގޮސް ނަން ހުސް ނުވާވަރަށް އެކި ފާޑާފާޑުގެ އިންޑޯ ޕްލާންޓްތައް ހުރި ތި ކަލެކްޝަނަށް މީގެ ކަނޑޫ ވަތްކޮޅެއް ވެސް އިތުރުކޮށްލަން އުޅޭށެވެ.

ކަނޑުލަކީ ކުޅީގައި ނުވަތަ ޗަސް ބިމުގައި ހެދޭ އެއްޗެކެވެ. އެހެންވީމަ އެ ފެނުގައި ބެހެއްޓީމަ މޫލައިގެން ހެދި ބޮޑުވަނީ އެވެ.

ސްކޫލް ބަންދަށް މިހާރު ރަށްރަށަށް ގޮސް އުޅޭ މީހުނަށް މި ދެނީ ހަމަ ރަނގަޅު ހިޔާލެކެވެ. ގޮސް ތި އުޅޭ ރަށުގައި ކަނޑޫފަލެއް އޮތް ނަމަ އެނބުރި މާލެ އަންނައިރު، ކަނޑޫ ވަތްކޮޅެއް ފެނަށް ލައިގެން ގެންނާށެވެ. އަދި ޗުއްޓީ ނިންމާލައިފައި އެނބުރި އަންނައިރު، ރައްޓެއްސަކަށް ހަދިޔާއަކަށް ވެސް ގެންނަން މި ހަމަ ވަރަށް ކަމުދާނެ އެވެ.