މޫނުގައި ބިއްސެއް ނެގުމުން އެއީ ސީދާ ހަމުގެ މައްސަލައެކޭ ހީކޮށް އާ ކްރީމެއް ހޯދަން އުޅެންޖެހޭ ހެއްޔެވެ؟ ނުވަތަ މާ ބޮޑު ކަމެއް ނުކުރިޔަސް އަބަދު ވަރުބަލިވާތީ، އެއީ ލޭ ދަށްވުން ނުވަތަ ނިދި މަދުވުން ފަދަ ކަމަކުން ދިމާވާ ކަމެކޭ ވެސް ހީވެދާނެ އެވެ.

މިއީ ހަގީގަތުގައި ވެސް މިފަދަ ކަންކަން ދިމާވާ މުހިންމު ސަބަބުތަކެކެވެ. އެކަމަކު، ގިނަ ފަހަރަށް އަހަރެމެންނަށް އޮޅުންފިލާފައި ނޯންނަ މުހިންމު އަނެއް ސަބަބަކީ ބަނޑާއި ގޮހޮރުގެ ދުޅަހެޔޮކަމެވެ.

ހަޖަމުކުރުމުގެ ނިޒާމުގެ މަސައްކަތްތައް ރަނގަޅުކޮށްލައިގެން މިފަދަ އުނދަގޫތަކަށް ބޮޑު ލުޔެއް ހޯދިދާނެ އެވެ. ބަނޑާއި ގޮހޮރުގެ ދުޅަހެޔޮކަން ދަށްވުމުން، އާންމުކޮށް ބަނޑު ފުއްޕުމާއި ގޭހުގެ އުނދަގޫ ދިމާވުމާއި، ބަނޑުހިކުމާއި، ބަނޑުދިޔާވުން ނުވަތަ މޭ އެންދުން ފަދަ ކަންކަން ކުރިމަތިވެ އެވެ.

ބަނޑާއި ގޮހޮރުގެ ނިޒާމަކީ ސިކުނޑި އަދި ހަށިގަނޑުގެ ދިފާއީ ނިޒާމާ ވަރަށް ބޮޑަށް ގުޅިފައިވާ ބަޔެކެވެ.

އަހަރެމެންގެ ލޮލަށް ނުފެނުނަސް، ހަޖަމުކުރުމުގެ ނިޒާމު ނުވަތަ ގޮހޮރު މި އޮންނަނީ  މައިކްރޯއޯގަނިޒަމްތަކުން ފުރިފަ އެވެ. އޭގެ ތެރޭގައި އެންމެ ގިނައިން ހިމެނެނީ ފައިދާހުރި ބެކްޓީރިއާ އެވެ. "މައިކްރޯބަޔޯމް" ގެ ނަން ދީފައިވާ މި ނިޒާމުގައި ގާތްގަނޑަކަށް، ތަފާތު ވައްތަރުގެ 1,000 ބެކްޓީރިއާ އުޅެ އެވެ.

މި ނިޒާމުގައި ހުންނަ ފައިދާހުރި ޖަރާސީމުތަކަށް އަންނަ ބަދަލެއްގެ ސަބަބުން މުޅި ހަށިގަނޑަށް އޭގެ ނޭދެވޭ އަސަރު ފޯރަ އެވެ:

• އަބަދު ވަރުބަލިވުމާއި ނިދަން އުނދަގޫވުން
• މޫނުގައި ބިހިނެގުމާއި ހަމުގެ އެކި މައްސަލަތައް
• މިޒާޖަށް ނޭދެވޭ ބަދަލުތައް އައުން

ސިއްހީ ދިރާސާތައް ހަދާ މަޔޯ ކްލިނިކުން ބުނާ ގޮތުގައި، ދުޅަހެޔޮ މައިކްރޯބަޔޯމްއެއްގެ ސަބަބުން ހަށިގަނޑުގެ ދިފާއީ ނިޒާމު ވަރުގަދަވެ، ހަށިގަނޑުގެ ބަރުދަން އެއްވަރެއްގައި ހިފެހެއްޓުމަށް އެހީތެރިވެދެ އެވެ.

މައިކްރޯބަޔޯމްގެ ދުޅަހެޔޮކަމަށްޓަކައި، އަހަރެމެން ކާ އެއްޗިއްސަށް ސަމާލުވުން މުހިންމެވެ. ސިއްހީ އިތުރު މައްސަލައެއް ނެތް ނަމަ ކޮންމެ މީހަކަށް ވެސް ކެއުމުގައި "ޕްރީބަޔޮޓިކްސް" އަދި "ޕްރޯބަޔޮޓިކްސް" ހިމެނިދާނެ އެވެ.

• ޕްރީބަޔޮޓިކްސް (ޖަރާސީމުތަކުގެ ކާނާ): މިއީ ގޮހޮރުގައި މިހާރުވެސް ހުރި މައިކްރޯބްތައް ބޮޑުވުމަށް، އެ ތަކެތި ގަޔާވާ ކާނާ ފޯރުކޮށްދީގެން އެ އެއްޗެހި އިތުރުވުމަށް އެހީތެރިވެދޭ މާއްދާއެކެވެ. މިއީ ގިނަ އަދަދަކަށް ފައިބަރު ނުވަތަ ކޮމްޕްލެކްސް ކާބޯހައިޑްރޭޓްސް އެކުލެވޭ މޭވާ އާއި ތަރުކާރީން ލިބޭ އެއްޗެކެވެ.ލިބޭނެ ބާވަތްތައް: އާފަލު، ދޮންކެޔޮ، ބެރީސް، ކެރެޓް، ފްލެކްސް ސީޑް، ލޮނުމެދު، އޯޓްސް އަދި ކައްޓަލަ.
• ޕްރޯބަޔޮޓިކްސް (ދިރޭ، ފައިދާހުރި ބެކްޓީރިއާ): މިއީ ހަށިގަނޑަށް ފައިދާހުރި ދިރޭ ބެކްޓީރިއާ ސީދާ ގޮތެއްގައި މައިކްރޯބަޔޯމްއަށް އިތުރުކޮށްދީ، ބެލެންސްކޮށްދޭ މާއްދާއެކެވެ.
• ލިބޭނެ ބާވަތްތައް: ޔޯގަޓް، ބައެއް ބާވަތްތަކުގެ ޗީޒް، ކޮމްބޫޗާ، ކިމްޗީ އަދި އަސާރަ.

ޕްރީބަޔޮޓިކްސް އަދި ޕްރޯބަޔޮޓިކްސް އެކުލެވޭ މޭވާ އާއި ތަރުކާރީ، އޯޓްސް އަދި ޔޯގަޓް ފަދަ ތަކެތި ބޭނުންކޮށްގެން ތައްޔާރުކުރެވޭނެ މީރު ރެސިޕީއެއް ތިރީގައި އެ ވަނީ އެވެ.

• އޯޓްސް (ރޯލްޑް އޯޓްސް): ½ ޖޯޑު
• ހޫނު ފެން: 1 ޖޯޑު
• ތެޔޮ: 2 ސައިސަމުސާ
• ބްރައުން ޝުގާ: 2 ސައިސަމުސާ
• ގޮދަން ފުށް: ½ ޖޯޑު
• އާދައިގެ ފުށް: ½ ޖޯޑު
• ބޭކިން ޕައުޑަރު: 1 ½ ސައިސަމުސާ
• ބޭކިން ސޯޑާ: ¼ ސައިސަމުސާ
• ލޮނު: ¼ ސައިސަމުސާ
• ފޮނިތޮށި ކުނޑި: ¼ ސައިސަމުސާ
• ސްކިމް ކިރު: ½ ޖޯޑު
• ފެޓް ނުހުންނަ ޕްލެއިން ޔޯގަޓް: ¼ ޖޯޑު
• މޮޑެފައިވާ ދޮންކެޔޮ: 1 ދޮންކެޔޮ
• ކުކުޅު ބިސް: 1 ބިސް

1. އޯޓްސް ތައްޔާރުކުރުން:1-2 މިނެޓު.

ބޮޑު ތަށްޓެއްގެ ތެރޭގައި އޯޓްސް އަދި ހޫނުފެން އެއްކޮށްލާށެވެ. އޯޓްސްކޮޅު މަޑުވެ ކްރީމީ ގޮތެއް ވަންދެން 1-2 މިނެޓު ވަންދެން ބަހައްޓާށެވެ. އެއަށްފަހު، ތެލާއި ހަކުރު އަޅައި އެއްކުރުމަށް ފަހު ހިހޫވަންދެން މަޑުކޮށްލާށެވެ.

2. އިތުރު ބާވަތްތައް އެއްކުރުން:3 މިނެޓު.

ވަކި ތައްޓެއްގައި ފުށުގެ ދެ ބާވަތާއި، ބޭކިން ޕައުޑަރު، ބޭކިން ސޯޑާ، ލޮނު އަދި ފޮނިތޮށި ކުނޑި އެއްކޮށްލައި ރަނގަޅަށް ގިރާލާށެވެ. ދެން ކުރިން ތައްޔާރުކުރި އޯޓްސްތަކުގެ ތެރެއަށް ކިރު، ޔޯގަޓް އަދި ދޮންކެޔޮ އަޅައި ރަނގަޅަށް އެއްކޮށްލުމަށްފަހު ބިސް އަޅައި ގިރާލާށެވެ.

3. މިކްސްޗާ އެއްކޮށްލުން:1 މިނެޓު.

ފުށް އެއްކުރި ބާވަތްތައް އޯޓްސް މިކްސްޗާއަށް އަޅައި، ހުރިހާ އެއްޗެއް ރަނގަޅަށް މިކްސްކޮށްލާށެވެ.

4. ޕޭންކޭކު ފިހުން:4-5 މިނެޓު.

ޕޭންކޭކުގެ މަތީ ފަށަލައިގައި ބޮކިޖަހައި، އަރިމަތިތައް ރަން މުށިކުލައަކަށް ބަދަލުވަންދެން ގާތްގަނޑަކަށް 2 މިނެޓު ވަންދެން ފިހެލާށެވެ. އެއަށްފަހު ޕޭންކޭކު އަނެއް ފުށަށް ޖަހައި، އަނެއްކާވެސް 2-3 މިނެޓު ވަންދެން ފިހެލާށެވެ.

ކެއުމުގެ އާދަތަކަށް ގެންނަ މިފަދަ ކުދިކުދި ސިއްހީ ބަދަލުތަކުން، ގޮހޮރުގެ ދުޅަހެޔޮކަން އިތުރުވެ، ހަމުގެ މައްސަލަތަކާއި ވަރުބަލިކަމަށް ބޮޑު ލުޔެއް ލިބިދާނެ އެވެ.