ތުއްތު ދަރިފުޅު ހެދިބޮޑުވުމަށާއި، ހާއްސަކޮށް ފުރަތަމަ 6 މަސްދުވަހު އެންމެ މުހިންމު އެއްޗަކީ މައިމީހާގެ ކިރެވެ. އޭގެފަހުން، އިތުރު ކާނާ ދޭން ފެށުމާއެކު 2 އަހަރުވަންދެން ގާތުން ކިރުދިނުމަކީ ދަރިފުޅަށާއި މައިމީހާއަށް ވެސް ލިބޭ އަގުނުކުރެވޭނެ ފައިދާތަކެކެވެ.

މައިމީހާގެ ކިރުގައި ހިމެނޭ މުހިންމު މާއްދާތައް:

• ދިފާއީ ނިޒާމު: ދަރިފުޅު ބަލިތަކުން ރައްކާތެރިކޮށްދޭ އެންޓިބޮޑީސް
• ހެދިބޮޑުވުން: ހަށިގަނޑު އާލާވުމަށް ބޭނުންވާ އެންޒައިމްސް އާއި ހޯމޯންސް
• ސިކުނޑި ތަރައްގީވުން: ސިކުނޑި އުފެދުމަށް މުހިންމު އޮމެގާ-3 އާއި ލެކްޓޯސް
• ނާރުތަކުގެ ރައްކާތެރިކަން: ނާރުތަކުގެ ވަށައިގެންވާ ޓިޝޫތައް އުފެދުމަށް ބޭނުންވާ ކޮލެސްޓްރޯލް

ދިރާސާތަކުން ދައްކާގޮތުގައި، ގާތުން ކިރުދިނުމުގެ ބަދަލުގައި ތައްޔާރީ ކިރު (ފޯމިއުލާ) ދިނުމުން، އުމުރުގެ ފަހުކޮޅުގައި ކުއްޖާ މާބޮޑަށް ފަލަވުމާއި ދާއިމީ ބަލިތައް ޖެހުމުގެ ފުރުސަތު އިތުރުވެ އެވެ. އެހެންކަމުން ގާތުންދޭ ކިރަކީ ކުއްޖާއަށް އެންމެ ފުރިހަމަ ކާނާއެވެ.

• އަވަސް ފެށުމެއް: ވިހެއުމަށްފަހު އަވަހަށް ގާތުން ދޭން ފެށުމުން ކިރު އުފެދޭ މިންވަރު އިތުރުވެ، ދަރިފުޅަށް ފަސޭހައިން ކިރު ލިބޭނެ އެވެ.

• ރީނދޫ ކިރު (ކޮލޮސްޓްރަމް): ފުރަތަމަ އަންނަ އޮލަ ރީނދޫ ކިރުގައި ގިނަ އަދަދަކަށް އެންޓިބޮޑީސް އާއި ބޭނުންތެރި މާއްދާތައް ހިމެނޭ.

• ބަލިތަކުން ރައްކާތެރިކަން: ނިއުމޯނިޔާ އާއި ނޭވާލާ ނިޒާމުގެ ބަލިތަކުން ދިފާއުކޮށްދޭ.

• ސިކުނޑި: ސިކުނޑި އާއި ވިސްނުން ތަރައްގީވުމަށް އެހީތެރިވެދޭ.

• އަވަސް ޝިފާއެއް: ރަހިމު ކުރިން ހުރި މިންވަރަށް ކުޑަވެ، ވިހެއުމާ ގުޅިގެން ބޭރުވާ ލޭ މަދުކޮށްދޭ.

• އުރަމަތީގެ ސިއްހަތު: ގާތުން ދިނުމުން އުރަމަތީގައި ކިރު ގަނޑުވުމުން ރައްކާތެރިކޮށްދޭ.

• ބަރުދަން ލުއިވުން: ވިހެއުމުގެ ކުރިން ހުރި ބަރުދަނަށް އިއާދަވުމަށް އަވަސްވޭ.

• އާއިލާ ރޭވުން: ހަމައެކަނި ގާތުން ކިރުދޭ ދުވަސްވަރު ބަލިވެއިނުމުގެ ފުރުސަތު ކުޑަކޮށްދޭ.

• ދާއިމީ ރައްކާތެރިކަން: ރަހިމުގެ ކެންސަރާއި އުރަމަތީގެ ކެންސަރުން ރައްކާތެރިކޮށްދޭ.

• ކިރު އިތުރުވާ ގޮތް: ކިރު އުފެދޭ މިންވަރު އިތުރުވާނީ ކުއްޖާ ބޯ މިންވަރަކުންނެވެ. އެހެންވެ، ފުރަތަމަ ދުވަސްކޮޅު ގިނަގިނައިން ގާތުން ދިނުން މުހިންމެވެ.
• ކިރު ފުދޭކަން ބަލާނެ ގޮތް: ދަރިފުޅު ކުޑަކަމުދާ މިންވަރަށް ބަލައިގެން ދެނެގަނެވޭނެއެވެ.ފުރަތަމަ 2 ދުވަހު: ދުވާލަކު 2-3 ފަހަރު ކުޑަކަމުދިއުން.3 ވަނަ ދުވަހުން ފެށިގެން: ދުވާލަކު 6 ފަހަރު ނުވަތަ އެއަށްވުރެ ގިނައިން ކުޑަކަމުދާނަމަ ދަރިފުޅަށް އެކަށީގެންވާ ވަރަށް ކިރު ލިބޭކަން ޔަގީންކުރެވޭނެ.

ޑަބްލިއުއެޗްއޯ އަދި ޔުނިސެފްގެ އިރުޝާދު: ވިހެއުމަށްފަހު ފުރަތަމަ 1 ގަޑިއިރުގެ ތެރޭގައި ގާތުން ދޭން ފަށާށެވެ. އަދި ފުރަތަމަ ދުވަސްކޮޅު ފުޅިއާއި ތުން ބޭނުންނުކުރުމަށް ލަފާދެ އެވެ.

ވައްގަނޑު ފާރުވުން ނުވަތަ ކަނޑައިގެން ދިއުން: މިއީ އާންމުކޮށް ވިހާތާ 3-5 ދުވަހުގެ ތެރޭގައި، ދަރިފުޅު އުރަމަތީގައި ރަނގަޅަށް ނުހިފެހެއްޓުމުގެ ސަބަބުން ދިމާވާ ކަމެކެވެ.

• ހައްލު:ތަދުވާނަމަ ކުއްޖާ އުރަމަތިން ނައްޓާލުމަށް ފަހު، ރަނގަޅަށް އަނގަ ޖައްސައި އަލުން ހިފައްޓާށެވެ.ކިރުދީ ނިމުމުން، ވައްގަނޑުގައި ކުޑަ ކިރުފޮދެއް އުނގުޅާފައި ބަހައްޓާށެވެ.ބްރެސްޓް ޕެޑް ބޭނުންކުރާ ނަމަ، ޕްލާސްޓިކް ނުހުންނަ ވައްތަރު ބޭނުންކޮށް، ގިނަގިނައިން ބަދަލުކުރާށެވެ.ފެންވަރާއިރު ވައްގަނޑުގައި ސައިބޯނި ނުއުނގުޅާށެވެ. (ހަންގަނޑު ހިކި އިތުރަށް ގޯސްވެދާނެއެވެ).

އުރަމަތި ފުރުން (ކިރު ގަނޑުވުން): ކިރު ގިނަވުމުން އުރަމަތި ހަރުވެ، ތަދުވާގޮތް ވެއެވެ. މިއީ ކިރު އުފެދޭ މިންވަރާއި ދަރިފުޅަށް ބޭނުންވާ މިންވަރު ހަމަހަމަވަންދެން ދިމާވެދާނެ ކަމެކެވެ. (އަދި 6 މަސްވެގެން އިތުރު ކާނާ ދޭން ފެށުމުން ވެސް މިހެން ދިމާވެދާނެއެވެ).

ކުށްހީ: ކިރު ގިނަކުރުމަށްޓަކައި މައިމީހާއަށް ގިނައިން ތެލާއި ހަކުރު ހުންނަ ކާނާ ކާންދިނުން.

ހަގީގަތް: މިފަދަ ކާނާގެ ސަބަބުން ކިރު އިތުރުވުމުގެ ބަދަލުގައި މައިމީހާގެ ބަރުދަން އިތުރުވެ މައްސަލަތައް ދިމާވެ އެވެ. ކިރު އިތުރުކުރުމަށް އޮތް އެންމެ ރަނގަޅު ގޮތަކީ ސިއްހަތަށް ފައިދާހުރި ކާނާ ކެއުމާ އެކު ގިނަގިނައިން ދަރިފުޅަށް ގާތުން ދިނުމެވެ!