ލޯބިވެ ކޮންމެވެސް މީހަކަށް ހިތް ދެވެނީ އެވެ. ދެން އެ ހިސާބުން ބުނާނީ "މި ހިތުގެ ވިންދަކީ ތިއީ" ކަމަށެވެ. އެކަމަކު ޑރ. މުހައްމަދު އަލީ ފޭސްބުކްގައި ކުރެއްވި ޕޯސްޓުގައި ވިދާޅުވެފައިވާ ގޮތަށް، މިއީ ބައިވެރިޔާއާ ގުޅުން ހުރި ކަމެއް ނޫނެވެ. 

ކޮންމެ މިނެޓަކު 60-100 ފަހަރު ހިތް ތެޅެނީ އަމިއްލަ ނަފްސަށްޓަކަ އެވެ. އެހެންވެ މިއަދު ފާހަގަކުރާ ދުނިޔޭގެ ހިތުގެ ދުވަހު ޑޮކްޓަރު އެދުނީ ލޯބިވެގެން ގޮސް "ހިތުގެ ވިންދެއް ބޭކާރު" ނުކުރުމަށެވެ. 

"ތިބާގެ ހިތް އަަހަރަކު 35 މިލިއަން ފަހަރު، ތެޅެނީ ތިބާއަށް. އާދަނަށް ކާސިމަކަށް ހައްވައަކަށް ދޮންދީދީއަކަށް ނޫން. ހިތަށް އަޅާލާތި." 

ހަޔާތުގެ ބައިވެރިއަކު ހުއްޓަސް ނޫނީ ނެތަސް، ބޮޑު މީހެއްގެ ހިތް އެވްރެޖްކޮށް ދުވާލަކު 100،000 ފަހަރު ތެޅެ އެވެ. 

 ހިތުގައި ވިންދު ޖަހަނީ ވަކި މީހަކަށްޓަކައެއް ނޫނެވެ. ތިމާގެ ދިރިހުރުމަށްޓަކައި މަހަކު ތިން މިލިއަން ފަހަރު، އަހަރަކު 36 މިލިއަން ފަހަރު ތެޅެ އެވެ.

ހިތުގެ ދުޅަހެޔޮކަމަށް އަހަރެމެން މަސައްކަތް ކުރަން ޖެހެނީ ހަމަ ތިމާއަށްޓަކަ އެވެ. މާ ބޮޑު ނޫނަސް ދިރިއުޅުމަށް ކޮންމެވެސް ވަރެއްގެ ބަދަލެއް ގެނެސްގެން ހިތުގެ ދުޅަހެޔޮކަމަށް ބޮޑު ބަދަލެއް ގެނެވިދާނެ އެވެ. 

• ކޮލެސްޓްރޯލް، ލޭގެ ޕްރެޝަރު އަދި ހަށިގަނޑުގައި ހަކުރު ހުންނަ މިންވަރަށް ސަމާލުކަން ދިނުން
• ލޭގެ ޕްރެޝަރު ދެނެގަތުން. ލޭގެ ޕްރެޝަރު މައްޗަށް ދިއުމަކީ ހިތުގެ ބައްޔަށް ހުރި އެންމެ ބޮޑު ރިސްކު. ކުއްލި ގޮތަކަށް މަރުވާން ދިމާވާ އެންމެ ބޮޑު އެއް ސަބަބަކީ ވެސް ލޭ މައްޗަށް ދިއުން

• ގަވައިދުން ޑޮކްޓަރަށް ދައްކައި ލޭގައި ކޮލެސްޓްރޯލް ހުރި މިންވަރު ދެނެގަތުން
• އިސްކޮޅާ އެކަށީގެންވާ ވަރަށް ބަރުދަން ބެހެއްޓުން
• ކެއުމުގައި ތަރުކާރީ އާއި މޭވާ އަދި ޕްރޮޓީންސް ހިމެނުމާއި ސަރުބީ އާއި ކޮލެސްޓްރޯލް ހިމެނޭ ކާނާ މަދުކުރުން
• ދުންފަތާ ދުރުވުން

ދިރާސާތަކުން ދައްކާގޮތުގައި ހިތުގެ ދުޅަހެޔޮކަމަށް ކުރެވޭނެ އެންމެ މުހިއްމު ކަމަކީ ކަސްރަތުކުރުމެވެ. ކޮންމެ ހަފުތާއަކު، މަދުވެގެން 150 މިނެޓު ކަސްރަތުކުރުން މުހިންމެވެ. ހިނގުމާއި ފެތުން ނޫނީ ބައިސްކަލް ދުއްވުން ފަދަ އެރޮބިކް ކަސްރަތުތައް ކުރުމަކީ އަތުން އިތުރު ހަރަދެއް ނުކޮށް ކުރެވޭނެ ކަމެކެވެ. 

ހެލްތު ޕްރޮޓެކްޝަން އެޖެންސީ (އެޗްޕީއޭ) އަދި ގައުމީ ޔުނިވާސިޓީ ގުޅިގެން ހެދި ސްޓެޕް ސާވޭ ދައްކާގޮތުން ރާއްޖޭގެ 15-65 އަހަރާ ދެމެދުގެ 4.7 ޕަސެންޓް މީހުންނަކީ ހިތުގެ ބައްޔާއި ސްޓްރޯކް އަދި އެންޖީނާ ފަދަ ބަލިތައް ޖެހިފައިވާ މީހުންނެވެ.

އޭގެ ތެރެއިން 27.7 ޕަސެންޓް މީހުންނަކީ އެ ބަލިތަކަށް ދިގު މުއްދަތަށް ބޭސް ބޭނުންކުރާ މީހުންނެވެ.

އެ ދިރާސާގެ 40-69 އަހަރާ ދެމެދުގެ 2.3 ޕަސެންޓް މީހުންނަކީ 10 އަހަރުގެ ތެރޭގައި ހިތުގެ ބަލި ޖެހުމުގެ ފުރުސަތު އޮތް މީހުންނެވެ. އަދި 7.7 ޕަސެންޓު މީހުންނަށް ހިތުގެ ބަލި ޖެހުމުގެ ފުރުސަތު 10-20 ޕަސެންޓަށް އޮންނަ ކަމަށް، 2020-2022 ވަނަ އަހަރު ހެދި ދިރާސާގައި ވެ އެވެ.

އެހެންވީމަ، ޑޮކްޓަރު ވިދާޅުވާ ގޮތަށް ހިތަށް އަޅާލާށެވެ. އެއީ އާދަނަށް ކާސިމަކަށް ނޫނީ ހައްވައަކަށް ޖަހާ ވިންދެއް ނޫނެވެ. އެއްވެސް ވިންދެއް ބޭކާރުކޮށް ނުލާށެވެ.