އިމާރާތްތަކަށް އަރައި ފައިބަން ލިފްޓް ބޭނުންކުރުމުގައި އުޅެންވީ ރީތި ގޮތް އެންމެންނަށް ވެސް އެނގޭނޭ އެއީ "ކޮމަން ސެންސް" އޭ ބުންޏަސް ހަގީގަތް ތަފާތެވެ. އެހެން މީހުން އުޅޭ ގޮތުން އުނދަގޫވުމާއި ލަދު ގަންނަން ޖެހޭ ކަންކަމާ ދިމާވުމާއި ރުޅި ގަދަވާނެ ކިތަންމެ ކަމެއް ލިފްޓްގައި ހިނގަ އެވެ.

ތަނަކަށް ދާން ލަސްވެގެން ލިފްޓަށް އަރަން އައިކަމުގައި ވިޔަސް އޭގެ އެތެރޭގައި ތިބޭ މީހުން ނުކުތުމަށް ފުރުސަތު ނުދީ އެންމެ އަވަހަށް ލިފްޓަށް އެރެން އޮތް ދިމާލަކުން ދެމިގަންނަން އުޅޭ މީހުންނާ ދިމާވެ އެވެ. ލިފްޓުގެ އަރިމަތީގައި ޖެހިގަނެގެން ނުވަތަ އެއިން ނުކުންނަން އަންނަ މީހާ ގައިގާ ޖެހިގެން ވިޔަސް އަރަން އުޅޭ ގޮތުން މި އުޅެނީ މުބާރާތެއްގައޭ ހީވާ ފަހަރު ވެސް އާދެ އެވެ. ލިފްޓު ހުޅުވޭ ވަގުތު ދޮރު ބްލޮކް ކޮށްލައިގެން ކުރިމަތީގައި އެބަ ހުރެ އެވެ. ގްރޫޕް ހަދާލައިގެން އޮލަ ވާހަކަތަކުގައި ތަން ނުދައްކައި ތިބުމުން ލިފްޓުން ނުކުންނަން ތަންކޮޅެއް ދީބަލާށޭ ބުނަންޖެހޭ ވަރު ވުމަކީ ލަދެކެވެ.

ލިފްޓު އައުމުން، މީހުން ނުކުމޭތޯ ބެލިޔަކަސް އަދި އެ ނިމުނީއެއް ނޫނެވެ. ތީރު އިނީ މައްޗަށް ނުވަތަ ތިރިއަށްތޯ ބަލައިލާށެވެ. މައްޗަށް ދާން ބޭނުންވާ މީހަކު ތިރިއަށްދާ ލިފްޓަކަށް އަރައިގެން ހުރުމުން ބޭކާރުގޮތުގައި ލިފްޓުތެރޭ މީހުން ތޮއްޖެހެ އެވެ. ޖެހިގެން ހުރި ފްލޯއަށް އަރަން ބޭނުންވާ މީހާ ވެސް ތިރިއަށްދާ ލިފްޓުގައި އެންމެންނާ އެކު ބުރު ޖަހަން އަރަނީ އެވެ. މި ދަނީ މައްޗަށް ދޯއޭ ހާދަ ލަހޭ މިހެން ކިޔާލަ ކިޔާލަ ތިބެން ޖެހެނީ އެވަރު ނުބަލައި ނުވަތަ ހަމަ ގަސްތުގައި އެޔަށް އެރީމަ އެވެ.

އެންމެންވެސް ލިފްޓަށް އަރައި ހުންނަންވާނީ ދޮރަ ކުރިމަތިލައިގެންނެވެ. ނަމަވެސް ބައެއް މީހުން ލިފްޓަށް އެރުމަށް ފަހު ދޮރަށް ފުރަގަސްދީގެން ހުރެ އެވެ. މިހެން އެންމެން ތިބޭ ނަމަ އެންމެން ލިފްޓް ތެރޭ ތިބޭނީ އެކަކު އަނެކަކަށް ފުރަގަސްދީގެން އެކަކު އަނެނަކަކަށް ނުފެނި އެވެ؛ ހުތުރު ކަމެކެވެ.

ކުރިމަތީ މީހުން ތިބި ނަމަ ގައިގައި ޖެހިފައި ނުވަތަ މީހުން ކޮށްޕާލާފައި ގޮސް ބޭނުންވާ ފްލޯގެ ނަންބަރަށް ފިތަން ވެސް އުޅެ އެވެ. އޭގެ ބަދަލުގައި ލިފްޓުގެ ނަަންބަރުތަކާ އެންމެ ކައިރީ ހުރި މީހާއަށް އަޑު އިވޭވަރަށް، ފިތާލަން ބޭނުންވާ ނަންބަރު ބުނެލާށެވެ. ބައެއް ފަހަރު ކުޑަކުދިން ގޮވައިގެން އަރާ މީހުން އެ ކުދިން ބޭނުންވާ ވަރަށް ލިފްޓުގެ ނަންބަރުތަކަށް ފިތަން ދޫކޮށްލަ އެވެ. އެހެންވެ ލިފްޓުން މީހަކު ފައިބަން ނުވަތަ އަރަން ނެތަސް އެކި ތަންތަނަށް ހުއްޓެމުން ދިޔަޔަސް ހިނި އައިސް އެހެން މީހުންނަށް ޖެހެނީ ތިބޭށެވެ.

ލިފްޓަށް އެރުމަށްފަހު ކައިރީގައި ތިބޭ މީހުންގެ "ޕާސަނަލް ސްޕޭސް" އަށް ބަލާށެވެ. އެހެން މީހުންގެ ގައިގައި ނުޖެހި ނުވަތަ އުނދަގޫވާ ހިސާބުގައި ނުހުންނާށެވެ. ގިނަ ފަހަރު ލިފްޓުތެރޭގައި މިގޮތަށް ކައިރީގައި ހުންނަ އިރު އުނދަގޫވިޔަސް ދުރަށް ޖެހިލާށޭ ބުނާކަށް ނުކެރެ އެވެ. ސަބަބަކީ މި ކުޑަ ގޮޅިތެރޭގައި އޯކްވާޑް ވެދާނެތީ އެވެ. އޮޅިގެން ޖެހިލެވިއްޖެ ނަމަ ވަގުތުން މާފަށް އެދެންވާނެ އެވެ. މީގެ އިތުރުން ލިފްޓުތެރޭގައި ދެކޮޅަށް ހިނގައި ނުވަތަ ދެއަތަށް ކިރި އުޅޭ މީހުންނާ އެކީ ލިފްޓު ދަތުރުތަކުގައި ތާށިވެ ބޮލަށް އުނދަގޫވާ ފަހަރު އާދެ އެވެ.

ތަންތަނަށް ފުރަންދާން ނުވަތަ ގެ ބަދަލުވާން އުޅޭއިރު ނަމަވެސް ބޮޑެތި ސޫޓްކޭސް ނުވަަތަ ފޮށިގަނޑުތައް ހިފައިގެން ލިފްޓަށް އަރާ ބައެއް މީހުން ލިފްޓެއްގެ ތެރެއަށް ވަދެ އެންމެންތައް ކޮށްޕާލައި ތާށި ވެސް ކޮށްލަފާނެ އެވެ. ބައެއް ފަހަރު ބެކްޕެކް އަޅައިގެން އަރާމީހުން ދެކޮޅަށް އެނބުރިލާއިރު ކައިރީގައި ހުންނަ މީހާގެ ގައިގައި ބާރަށް އެބަ ޖެެހެ އެވެ. މިހެން ނުހަދައި، ލިފްޓުން މީހުން މަދުވެލީމާ މިހެން އެއްޗެހި ހިފައިގެން އަރަން އިރުކޮޅަކު މަޑުކޮށްލާށެވެ.

ހެމުން ކެކެމުން ލިފްޓަށް އަރައި ދެން ތިބޭ މީހުންނަށް ބަލައިނުލައި ބާރަށް ހީ ސަކަރާތް ޖަހާ މީހުންނާ ވެސް ދިމާވެ އެވެ. މޯބައިލް ފޯނު ރޭންޖު ލިބޭ ލިފްޓުތަކުގައި ފޯނުން ބާރަށް ވާހަކަ ދައްކައި އެ މީހާގެ ހުރިހާ ވާހަކައެއްގެ ތެރެއަށް އަހަރެމެން އެބަ ދަމައިގަނެ އެވެ. ދެ ރައްޓެހިން އެކުގައި އަރައި އެ މީހުންގެ ސަޅި ހަފްތާބަންދުގެ ޕްލޭންސްތައް ކިޔާލާއިރު މީގައި ތިބޭ އެހެން މީހުންނަށް އަޑު އަހަން ޖެހުމުން އޯކްވާޑްވެ އެވެ. ލިފްޓުން ނުކުމެފައި ދައްކަން އެ ވާހަކަ ބަހައްޓަން މާ ލަސްވަނީ ހެއްޔެވެ؟

މިއީ މިލިސްޓުގައި ހިމެނޭ އެންމެ އޯކްވާޑް އަދި އެންމެ އުނދަގޫވާ ކަމެވެ. ކައިރީގައި ހުއްޓި ހުންނަ އިރު މަތިން ތިރިއަށް މުޅި މީހާ ސްކޭން ކޮށްލާއިރު މި ހުރެވެނީ ނުބައި ފުށަށް ހެދުން އަޅައިގެނޭ ހިތަށް އަރާ ފަހަރުއާދެ އެވެ. ނުދަންނަ މީހަކު މިވަރަށް ބަލަން ހުރުމަކީ ރޫޑް ކަމެއްގެ އިތުރުން ވަރަށް އުނދަގޫވާ ކަމެކެވެ.