ސައިކަލުގެ ފުރޮޅުގައި ހުންނަންޖެހޭ ވަރަށް ވައި ހުރުމަކީ ތެޔޮ އިގްތިސާދު ކުރުމަށާއި ދުއްވާއިރު ސަލާމަތީގޮތުން ވަރަށް މުހިންމު ކަމެކެވެ. ވައި މަޑުން ހުރުމުގެ ސަބަބުން، ދުއްވާއިރު އިންޖީނަށް ބާރު ބޮޑުވެ، ތެޔޮ ހިނގާ މިންވަރު އިތުރުވެ އެވެ. އަދި ފުރޮޅު އަވަހަށް ހަލާކުވާން ވެސް މެދުވެރިވާނެ އެވެ. އަނެއްކޮޅުން، ވައި މާ ގަދަޔަށް ހުރުމަކީ ސައިކަލު ކޮންޓްރޯލް ކުރުމަށް އުނދަގޫވެ، ނުރައްކާތަކާ ކުރިމަތިވެދާނެ ކަމެކެވެ. އެހެންވެ، އެ ސައިކަލެއްގައި ފުރޮޅަށް ވައި ޖަހަން ޖެހޭ ވަރަށް ވައި ޖަހާފައި ބަހައްޓާށެވެ.

ސައިކަލަށް ބަރުވުމަކީ ތެޔޮ ހިނގާ މިންވަރު އިތުރުވާނެ ކަމެކެވެ. ސައިކަލް ފަހަތަށް މީހަކު އަރުވައިގެން ދުއްވުމުން، އެކަނި ދުއްވާއިރަށް ވުރެ އިތުރަށް ތެޔޮ ހަރަދުވާނެ އެވެ. މީހާގެ ބަރުދަން މާބޮޑަށް ބަރުކޮށް ހުރުމަކީ ވެސް ސައިކަލްގެ ތެޔޮ ހަރަދު ބޮޑުވާނެ ކަމެކެވެ.

ސައިކަލްގައި މުދާ އުފުލާ މީހުން ވެސް މަދެއް ނޫނެވެ. އެހެންވެ މިފަދަ ކަންކަމަށް ބަލައި، އިންޖީނަށް ބާރު ބޮޑުނުވާ ގޮތަށް ސައިކަލް ލުއިކޮށްލާށެވެ.

ކުއްލިކުއްލިއަށް ބާރަށް ދުއްވުމާއި، ކުއްލިކުއްލިއަށް ބުރަކި ޖެއްސުމާއި އަދި މާ ބާރަށް ދުއްވުމަކީ ތެޔޮ ގިނައިން ހިނގާ ކަންކަމެވެ. އެއްވަރެއްގައި މަޑުމަޑުން ރޭސް ދީގެން ދުއްވަން އާދަކުރާށެވެ. ކުރިއަށް އޮތް ޓްރެފިކަށް ބަލައިގެން ހަމަޖެހިގެން ދާށެވެ. ކިތަންމެ ބާރަށް ދިޔަޔަސް ކުރިއަރައިގެން ދެވެން ނެތް ނަމަ އަދި އަމުދުން ބާރަށް ދިއުމުގެ ބޭނުމެއް ކޮބައިހެއްޔެވެ؟

މިއީ ތެޔޮ އިގްތިސާދުވުމުގެ އިތުރުން އިންޖީނާއި ސައިކަލުގެ އެހެން ބައިތަކުގެ އުމުރު ވެސް ދިގުކުރަން ވިސްނަންޖެހޭ ކަމެކެވެ.

ސައިކަލު އަބަދުވެސް ރަނގަޅު ހާލަތުގައި ބަހައްޓާށެވެ. އިންޖީނު ތެޔޮ ބަދަލުކުރުމާއި، އެއާ ފިލްޓަރު ބަދަލުކުރުމާއި، ސްޕާކް ޕްލަގް ޗެކްކުރުން ފަދަ ކަންކަން، މެނުއަލްގައި ބުނާ ގޮތަށް ގަވައިދުން ކުރާށެވެ. ރަނގަޅަށް ބަލަހައްޓާ ސައިކަލެއްގެ އިންޖީނުގެ ހިނގުން ފުރިހަމަވާނެ އެވެ. އަދި ތެޔޮ އެންދުން މަދުވެ، މެކޭނިކަލް މައްސަލަތައް ވެސް މަދުވާނެ އެވެ.