އަންނަ މަހުގެ ދެވަނަ ދުވަހު މިސްޓަ މޯލްޑިވްސް ފެށޭއިރު ބައިވެރިންގެ ހުރިހާ ވަގުތެއް ހުސްކޮށްލައިގެން އުޅެނީ މިފަހަރުގެ ޓައިޓަލް ހޯދާށެވެ. ފިޓްނަސްގެ ދާއިރާގައި މަޝްހޫރު ހުރިހާ އެންމެން ކަހަލަ ގޮތަކަށް މިސްޓަ މޯލްޑިވްސްގައި ބައިވެރިވާނެ އެވެ. ނަމަވެސް މި އަހަރު ވެސް ފާޒިލް އިސްމާއިލް (ފިޓް ފާޒިލް) އެއް މި ސްޓޭޖަކުން ނުފެންނާނެ އެވެ.

މީގެ ހަ އަހަރު ކުރިން ފިޓްނެސްގެ ތެރެއަށް ވަދެ އޭގެ ތެރެއަށް ފާޒިލް ގެއްލުނީ އެވެ. މުޅި މީހާގެ ފިޒީކް ބަދަލުކޮށްލައި މިއަދު މިފެންނަ މޮޑެލް ފާޒިލް އަށް ބަދަލުވީ އެވެ. އެހެންވެ ކޮންމެ އަހަރަކު ވެސް ފާޒިލް އެ ސްޓޭޖުން ފެންނާނެ ކަމަށް އެންމެން ތިބެނީ ގަބޫލުކޮށްގެންނެވެ. ފިޒީކް ކެޓަގަރީގެ ޓައިޓަލް ފާޒިލް ގެންދާތަން ބަލައިލަން ބޭނުންވާތީ އެވެ.

ފާޒިލް ބުނީ މި އަހަރު މިސްޓަ މޯލްޑިވްސްގައި ބައިވެރިވާން ވަރަށް ބޭނުންވި ކަމަށެވެ. ނަމަވެސް ފާޒިލް މާބޮޑަށް ބިޒީވީ އެވެ. އެޑްވަޓައިޒިން ކުންފުންޏެއްގައި ވަޒީފާ އަދާކުރަމުން 10 ކްލަޔަންޓުން ޓްރެއިން ކޮށްދެމުން މޮޑެލް ކުރުމުގަ އެވެ. އަނެއްކާ ވެސް ބޮޑު ޝޫޓިންއަކަށް ވެސް ފާޒިލް އަންނަނީ ތައްޔާރުވަމުންނެވެ.

"ބޭރު ބަޔަކާއެކު ޝޫޓިން އޮތީ. އޮން ކޯލުގައި ހުންނަން ޖެހޭތީ މިސްޓަ މޯލްޑިވްސްގައި ބައިވެރިނުވެވުނީ. އެހާ ބޮޑު ކަމެއްގައި ބައިވެރިވެގެން އުޅެމުން ޝޫޓިން އަށް ދާން ބުންޏަސް ނުދެވޭނެތީވެ." ފާޒިލް ބުންޏެވެ.

ނަމަވެސް އަންނަ އަހަރު މިސްޓަ މޯލްޑިވްސްގެ ސްޓޭޖުން ފާޒިލް ފެންނާނެ އެވެ.

"މިިދޔަ އަހަރުތަކުގައި އަސްލު ބައިވެރިނުވެވުނީ ފިޓްނެސް ކިޔަވަން ވަގުތު ހުސްކޮށްގެން ހުރީމަ. ވަރަށް ބޮޑަށް ކިޔަވައިގެން އޭގެ ތެރެއަށް ވަދެވި މީހުންނަށް ދަސްކޮށްދޭން ފެށީމަ ވެސް ވަރަށް ގިނަ އެއްޗެހި އެބަ ދަސްވޭ. އެހެންވެ 2020 ވަނަ އަހަރު ބައިވެރިވާނަން ފާޒިލް."

އެންމެ ފަހުން މުބާރާތް އޮތް 2017 ވަނަ އަހަރު މިސްޓަ މޯލްޑިވްސް އަކަށް ހޮވުނު މުހައްމަދު ޔާމިން (ޔާމްބެ) ވެސް މި ފަހަރު ސްޓޭޖަކުން ނުފެންނާނެ އެވެ.