ކެރެޓަކީ ހަންގަނޑު ރީތިކޮށް ބަހައްޓަން މުހިންމު ދައުރެއް އަދާކުރާ އެއްޗެކެވެ. މިއީ ހަމުގެ އިލާސްޓިސިޓީ އިތުރުކޮށްދީ, ބިހި ނެގުން ފަދަ ހަމުގެ މައްސަލަތަކުން ދުރުހެލިކޮށްދީ ހަމުގެ ގްލޯ އިތުރުކޮށްދިނުމުގައި މުހިންމު ދައުރެއް އަދާކުރާ އެއްޗެކެވެ. އަދި ވިޓަމިން އޭ ގިނަ, ކެލޮރީސް މަދު, ފައިބަ ގިނަ ތަރުކާރީއެކެވެ. މިއީ ލޮލުގެ ދުޅަހެޔޮކަމާއި ހަޖަމްކުރުމުގެ ނިޒާމަށާއި އިންފްލަމޭޝަނަށް ވެސް ރަނގަޅު އެއްޗެކެވެ.
މި ކިޔައިދެނީ ކްރިއޭޓަރު ކެސީގެ ވައިރަލްވި ރިބަން ކެރެޓް ސެލެޑް ރެސިޕީއެކެވެ. މިއީ ސްނެކަކަށް ނުވަތަ ސައިޑް ސެލެޑެއްގެ ގޮތުގައި ބަތާއި ނޫޑްލްސް ފަދަ، އާއްމުކޮށް ކާ ވަގުތުތަކުގައި ތައްޔާރުކުރާ ޑިޝްތަކާ އެކު ވެސް ބޭނުން ކުރެވިދާނެ އެއްޗެކެވެ.
މި ސެލެޑަށް ބޭނުން ވާނީ ބޮޑު ތިން ކެރެޓެވެ. މި ސެލެޑަށް ކެރެޓު "ރިބަން" ގޮތަށް ކޮށާލަން، ތޮށިމަށަން ބޭނުންކުރާ ޕީލާއަކުން ކެރެޓު ރިބަން ފަށްތަކެއްހެން ޕީލްކުރަނީ އެވެ. ޕީލާއެއް ނެތިއްޔާ ތުނިކޮށް ކެރެޓު ކޮށާ ވެސް ލެވިދާނެ އެވެ. މި ރެސިޕީގައި ދެން ބޭނުންކުރަނީ އެއް ސްޕްރިންގް އަނިއަން, އެއް މޭޒުމަތީ ސަމުސާ ސެސެމީ އޮއިލް, އެއް މޭޒުމަތީ ސަމުސާ ސޯއިސޯސް އަދި ދެ މޭޒުމަތީ ސަމުސާ ރައިސް ވިނެގާ ބޭނުން ކުރެ އެވެ. އަދި އެއް ސައިސަމުސަލަށް ވާ ވަރުގެ ލޮނުމެދު ގާނާލާފައި މި ރެސިޕީގައި ބޭނުން ކުރެ އެވެ. އަދި ގާތްގަނޑަކަށް އެއް ސައިސަމުސަލުގެ ޗިލީ ކްރިސްޕް ބޭނުންކުރެ އެވެ. ކުޅިކޮށް ކާން ބޭނުންނުވާ ނަމަ ޗިލީ ކްރިސްޕްސްއާ ނުލާ ސެލެޑު ތައްޔާރުކޮށްލެވޭނެ އެވެ. މި ހުރިހާ އެއްޗެއް ބޯތަށްޓެއްގައި އެއްކޮށްލުމުން ސެލެޑު ތައްޔާރުވީ އެވެ.
މި ސެލެޑު މެންދުރު ނުވަތަ ރޭގަނޑުގެ ކެއުމަށް ބޭނުންކުރާ ނަމަ, ޗިކަން ކަހަލަ ޕްރޮޓީންއެއް އެއްކޮށްލުމުން ފިލިން މީލްއަކަށް ވާނެ އެވެ.
