ވިހައިގެން އުޅޭ މަންމަ އާއި ތުއްތު ދަރިފުޅަށް ގޮވާލަން ދާން އެންމެން ވެސް ދާން ބޭނުންވެ އެވެ. ކުޑަ ދަރިފުޅަށް ބޭނުންވާނެ ކޮންމެވެސް ހަދިޔާއެއް ވެސް ގެންދާނެ އެވެ. ނެޕީ އާއި ހެދުންކޮޅުތަކާއި ޕްލޭމެޓާއި ސްޓްރޯލާ ފަދަ މުހިންމު ގިނަ ތަކެއްޗެވެ. އެކަމަކު އާއިލާއަކަށް ލިބޭ މިފަދަ އުފަލެއްގައި ބައިވެރިވާއިރު، އަގުބޮޑު ނޫނަސް ނިކަން އަގުހުރި ގިނަ ހަދިޔާތަކެއް ދެވިދާނެ އެވެ.

ވިހައިގެން އުޅޭ މީހަކަށް ޒިޔާރަތްކުރުމަކީ އަހަރެމެންގެ ތެރޭގައި ސަގާފީގޮތުން ކުރަމުން އަންނަ ކަމެކެވެ. މިއީ ދަރިފުޅަށް މަރުހަބާ ކިޔުމާއި އާއިލީ ގާތްކަން ބޭއްވުމުގެ ގޮތުން ކޮންމެހެން ކުރަންޖެހޭ ކަމަކަށް އޮންނަނީ ވެފަ އެވެ. އެހެންވެ، ވިހައިގެން އުޅޭ މައިމީހާއަށް ވީހާ ވެސް ފަސޭހަވާނެހެން މިކަން ކުރުމަށް ފަރުވާތެރިވެވިދާނެ އެވެ. ކުއްލިއަކަށް އެ ގެއަކަށް ދިއުމަށްވުރެ، ދާނެ ގަޑިއެއް ކުރިއާލައި މަޝްވަރާކުރެވިދާނެ އެވެ. އަދި ދަރިފުޅުގެ ސިއްހަތާއި މައިމީހާގެ ދުޅަހެޔޮކަމަށް ބަލައި، ވީހާވެސް ސާފުތާހިރުވެގެން ދިއުން މުހިންމެވެ. އަދި މާ ވަސްގަދަ ސެންޓު ޖެހުން ފަދަ ކަންކަމުން ދުރުވެ، ރޯގާ ނުވަތަ އެ ނޫން ވެސް ބައްޔެއް ހުރި ނަމަ ޒިޔާރަތް ނުކުރުން މާ ރަނގަޅެވެ.

ދެންމެ ދެންމެ ދުނިޔެއަށް މަރުހަބާ ކީ ކުޑަ ދަރިފުޅު ދެކިލުމަށް ހުސް އަތާ ނުދާނެކަން ޔަގީނެވެ. މިފަދަ އާއިލާތަކުގައި ތުއްތު ދަރިފުޅަކީ އަލަތު ދަރިފުޅު ނޫން ކަމަށްވާ ނަމަ އިތުރަށް ވިސްނާލުން މުހިންމެވެ. ދޮށީ ދަރިފުޅުގެ ނުވަތަ ދަރިންގެ ނަޒަރުން ބަލާއިރު އޭނާގެ މުޅި ދުނިޔެ ކުއްލިއަކަށް ބަދަލުވީ އެވެ. މަންމައާ އެކު އަބަދުމެހެން އެ އޮންނަނީ ދެންމެ އައި ކުޑަކުޑަ ކޮއްކޮ އެވެ. ކޮންމެވެސް ވަރެއްގެ ޖަޒުބާތީ އިހުސާސްތަކެއް، ކުޑަޔަސް ބޮޑަސް މި ކުދިންގެ ހިތުގައި ހުންނާނެކަން ޔަގީނެވެ. އަނެއްކާވެސް މަންމައަށް އިތުރު ލުޔެއް ހޯދައިދިނުމަށްޓަކައި ދޮށީ ދަރިފުޅަށް ސަމާލުކަން ދެމާ ހެއްޔެވެ. އޭނާ ހެއްވާލަދީ އުފާކޮށްދޭށެވެ. ހަދިޔާއެއް ގެންދާ ނަމަ އެ ކުއްޖާ ވެސް ބައިވެރިވާނެހެން އެކަން ކުރާށެވެ.

މިއީ ފަހަރެއްގައި އެންމެ މުހިންމު ކަންތަކެވެ. ވިހައިގެން އުޅޭއިރު، ތުއްތު ދަރިފުޅުގެ ރުއިމާއި ނެޕީތަކާއި، ގާތުން ދިނުމާއި މިކަންކަމުގައި ރެ އާއި ދުވާލު ހޭދަވާއިރު، ފެންވަރާލާނެ، އަރާމުކޮށްލާނެ ނުވަތަ ހޫނުކޮށް ހުރި ތާޒާ ކެއުމެއް ކާލާނެ ފުރުސަތު އޮންނާނީ ނުލިބި އެވެ. މިކަމެއްގައި ހޭލަމޭލަ ވެގެން އުޅޭއިރު، ގެއަށް އަންނަ މެހެމާނުންނަށް ހިދުމަތްކުރުންވާނީ ދުލުން ނުބުންޏަސް އިތުރު ބުރައަކަށެވެ. އެހެންވެ، ގެއަށް ދާ ނަމަ އެކަން ދަނެގެން ދާށެވެ. ދަރިފުޅުގެ މަންމައަށް ކަމުދާނެ ދުޅަހެޔޮ ކެއުމެއް ހަދިޔާއެއްގެ ގޮތުގައި ގެންދާށެވެ. ސިންކުތެރޭގައި، ދޮންނަންޖެހިފައި ހުރި ތަށިތަކެއް ހުރި ނަމަ ދޮވެލަދޭށެވެ. ގޭތެރެ ހަޑިކޮށް އޮތް ނަމަ ފޮޅާ ސާފުކޮށްދޭށެވެ. އަސްލު އެހީ އަކީ މި އެވެ. އެންމެ އުފާވާނެ ހަދިޔާއަކީ މިއެވެ.

ޒިޔާރަތްކުރިއަސް، ގުޅިއަސް މެސެޖުކުރިއަސް އެންމެ މުހިންމީ މިކަމަށްދޭ ވަގުތެވެ. ގެއަށްދާ ނަމަ ލަސްނުކޮށް އަނބުރާ އައުމެވެ. މިއީ އެ އާއިލާއަށް ވަރަށް ހައްސާސް ވަގުތުތަކެކެވެ. ލިބުނު ދަރިފުޅުގެ ފަލަކަމާއި ހިކިކަމާއި، ދޮންކަމާއި ކަޅުކަމާއި، މައިމީހާގެ މޫޑާއި، ބުރުސޫރައަކީ މިވަގުތު އެއްވެސް ވަރަކަށް ތިމާގެ ޚިޔާލާއި މަޝްވަރާއަށް ހުޅުވިފައި އޮންނަ ކަމެއް ނޫނެވެ. ވަގުތާއި ހާލަތަށް ބަލައި އެ ދެމައިންނަށް ވެވުނު އެހީތެރިކަމެއް ދީފި ނަމަ އަބަދަށް ވެސް ހަނދާން ހުންނާނެ އެވެ.