އާ އަހަރަކަށް އަހަރެމެން މި ކުރިމަތިލަނީ އުންމީދުތަކާއި ފޮނި ހުވަފެންތަކަކާ އެކީގަ އެވެ. މިފަދަ ކޮންމެ ވަގުތުކޮޅަކީ ވެސް މަޑުޖެހިލައި ދިރިއުޅުމާއި މުސްތަގްބަލާ މެދު ވިސްނައި ވަޒަންކޮށްލުމަށް ލިބޭ ފުރުސަތެކެވެ. ވޭތުވެމިދާ 365 ދުވަހުގެ ތެރެއިން ކޮންމެ ހިނދުކޮޅަކީ ވެސް އެކި ހަނދާންތަކަކާއި މުހިންމު ފިލާވަޅުތަކުން ފެވިފައިވާ ވަގުތުތަކެކެވެ. ކުރަން ބޭނުންވާ އެތައް ކަމެއް ހާސިލްވެ، އަދި ކިތަންމެ ކަމެއް ބީވެގެން ވެސް ދިޔަ އަހަރެކެވެ. ވެއްޓުނު ކިތަންމެ ވަޅުގަނޑަކުން އަދި މާ ބާރަށް ތެދުވެ، ވެލި ފޮޅާލައި އާ ހިތްވަރެއްގައި 2025 އަށް މަރުހަބާ ކިޔާއިރު، ފަސްދީ ތި ދޫކޮށްލަނީ ކޮންކަމެއް ހެއްޔެވެ.

ކަށީގައި ހިފާފައި ހުއްޓަސް ބައެއް ކަންކަމަކީ ދޫކޮށްލައިގެން މެނުވީ ކުރިއަށް ނުދެވޭނެ ކަންކަމެވެ. ފަހަރެއްގައި އެއީ ހާސްވުމުން ކޮންމެ ފަހަރަކު ތި ކެވޭ ޗޮކުލެޓުތަކަށް ވެސް ވެދާނެ އެވެ. ނުވަތަ ޖީބު ދޮވެލައި، ހަށިގަނޑު ހަލާކުކުރަނިވި ސިނގިރެޓަށް ވެސް ވެދާނެ އެވެ. ކުރިއަރައިދިއުން މަޑު ޖެއްސި ވަޒީފާއަށް ވެސް ވެދާނެ އެވެ. ކޮމްފޯޓް ޒޯނުން ދުރަށް ޖެހިލަން ހުރަހަކަށްވި ނުތަނަވަސްކަމާއި، ދާން ބޭނުންވާ މަންޒިލާއި ހިސާބަަށް ދިއުމަށް ވަގުތު ބޭކާރުކުރި ހުރިހާ އާދަތަކާއި ކަންތައްތަކުން މިއީ ދުރަށްޖެހިލަންވި ވަގުތެވެ.

ކާމިޔާބީ އަކީ އަދި ކޮންމެ ފަހަރަކު ފުރަތަމަ ފިޔަވަޅުން ހާސިލްވެދާނެ ކަމެއް ނޫނެވެ. މިއަދު ކިތަންމެ ފްލައިޓެއް ދުނިޔެ ވަށައި އުދުހިފައި އުޅުނަސް، އެންމެ ފުރަތަމަ މަތިންދާބޯޓު އުފެއްދި ވްރައިޓް ބްރަދާސް އަށް 12 ސިކުންތު ވަންދެން ވައި މަތީގައި ފްލައިޓެއް ބޭއްވުމަށް 4 ނޫނީ 5 އަހަރު ނެގި އެވެ. އެއްވެސް ކަމަކީ "ނުވާނެ" ކަމެއް ނޫނެވެ. އެއީ ވަކި މީހެއްގެ މޫނަކަށް ކަނދުރާއަކަށް ބަލައިގެން ނިންމޭ ކަމެއް ވެސް ނޫނެވެ. ނާކާމިޔާބީ އަކީ ކާމިޔާބީ އަށް އެޅޭ ފުރަތަމަ ފިޔަވަޅެވެ. ނާއުންމީދަކީ، އުންމީދާ ގާތަށް ގެނެސްދޭ އެންމެ ބޮޑު ބާރެވެ. ފަށަން ބޭނުންވާ ވިޔަފާރި، ހޯދަން ބޭނުންވާ ސްކޮލަޝިޕް، ނުވަތަ ބޭނުންވާ ވަޒީފާއެއް ނުލިބުނަސް، ކީއް ހެއްޔެވެ. އަަލުން އަނެއްކާވެސް މަސައްކަތްކުރާނީ ތާ އެވެ.

މި ފާއިތުވެދާ އަހަރަށް ވިސްނާލަބަލާށެވެ. ކިހާ މީހުންނަށް ކިހާ ވަގުތެއް ހޭދަކުރިން ހެއްޔެވެ. މީހަކު ތިމާއާ ދޭތެރޭ ކަންތައްތައްކުރި ގޮތަކުން, ބުނި އެއްޗަކުން ހިތްމަރުވެފައި ދެރަވެފައި "ހިތުގައި ޖެހިފައި" ހުރިން ހެއްޔެވެ. އެކަމާ ރޮއެ ހިތާމަކުރި ވަގުތުތަކުން އެނގުނީ ކޮން ކަމެއް ހެއްޔެވެ. ތިމާގެ ވަށައިގެންވާ ކޮންމެ ކަމަކުން އަދި, ގުޅުމަކުން އޭގެ ސީދާ އަސަރު ތިމާގެ ނަފްސާނީ ދުޅަހެޔޮކަމަށް ކުރެ އެވެ. އެހެންވެ ހަމަހަމަކަމާ އެކު, ލޯތްބާއި, އިހްތިރާމް އަދި އޯގާތެރިކަމާއި ކުލުނު ނެތް ރަހުމަތްތެރިކަމެއް, ލޯތްބެއް މި ފެށޭ އާ އަހަރަށް ގެންދިއުމުގެ ބޭނުމެއް އެބައޮތް ހެއްޔެވެ. އަންނަ އަހަރަށް ތި ގެންދާ ކޮންމެ ގުޅުމަކީ ވެސް ތިމާގެ ކުރިމަގާއި, ހަޔާތަށް ހެޔޮ އަސަރެއް ކުރާނެ ކަމެއްކަން ޔަގީންކުރާށެވެ.

ޕާފެކްޓް ވުން ނުވަތަ ހުރިހާ ކަމެއް އެންމެ ފުރިހަމައަށް ކުރަން އުޅުމަކީ ކުރިއަރައި ދިއުމުގެ ހަތުރެވެ. ސަބަބަކީ އަހަރެމެން މި ބޭނުންވާ "ޕާފެކްޓް" ދުނިޔެ އަކީ އަސްލަކަށް ނުވުމެވެ. ހުރިހާ ކަމެއް އެންމެ ފުރިހަމައެއް ނުވާނެތާ އެވެ. އެކި މީހުންގެ ނަޒަރުގައި ކަންކަން ފުރިހަމަވުން މިންކުރަނީ ވެސް ތަފާތުކޮށެވެ. އެހެންވެ ހުރިހާ ކަމެއް ޕާފެކްޓް ކުރަން ހަަދައިގެން ގިނަފަހަރު ނުތަނަވަސްކަމާ ގިނަފަހަރު ކުރިމަތިވެ އެވެ. ކުރިއެރުމާއި، އުފެއްދުންތެރިކަމާއި، އަމިއްލަވަންތަކަމާ އެކު ކަންކަން ކުރެވޭނީ މި ހިޔާލާއި ދުރަށް ގޮސްގެންނެވެ.

ކޮންމެ ކަމެއްވެސް ވެ ނިމިދިއުމުން ދެން އޮންނާނީ އެ ނޫންގޮތަކަށް އެކަން ހިނގި ނަމައޭ ހިތަށް އަރައި އެ ހުންނަ އެކިއެކި ރިގްރެޓްސް އެވެ. ކުރިން ހުޅުވާފައި އޮތް ވަޒީފާއަކަށް ކުރިމަތި ލެވުނު ނަމައޭ، އެއްކުރި ލާރިކޮޅުން ޗުއްޓީ އަށް ނުގޮސް ވިޔަފާރި އަށް އިންވެސްޓް ކުރުވުނު ނަމައޭ ނުވަތަ މިއަހަރު ޖިމަށް ދާން ފެށުނު ނަމައޭ، މިކަހަލަ ހިޔާލުތައް އާދޭ ދޯ އެވެ. އާ އަހަރަށް މަރުހަބާ ކިޔާއިރު މި ވިސްނުންތަކުން ދުރަށް ޖެހިލާށެވެ. މިއަހަރު ތަޖުރިބާ ކުރި ހިތްދަތިކަމާއި ހިތާމަތަކަށް ފަސްއަޅާލަށެވެ. މާ ބޮޑަށް ފަސް އެނބުރި ބަލަން ވެއްޖެ ނަމަ، ކުރިއަށް ދެވޭލެއް ލަސްވެފައި ވެއްޓުމުގައި ފުރުސަތު ބޮޑުވާނެ އެވެ.