އެކި ގައުމުތަކުގައި އުފައްދާ ޓީވީ ޝޯތަކުގެ އަގުވަޒަންކުރުމުގެ ގޮތުން ދެމުން އަންނަ އިންޓަނޭޝަނަލް އެމީ އެވޯޑްސްގެ މިއަހަރުގެ އެވޯޑްގައި އެންމެ ކާމިޔާބު ޑްރާމާ ސީރީޒަކަށް ހޮވުނީ މިދިޔަ އަހަރު ނެޓްފްލިކްސް އިން ގެނެސްދިން އިންޑިއާގެ ކްރައިމް ޑްރާމާ "ޑެލީ ކްރައިމް" އެވެ. މުޅި ދުނިޔެއަށް ވެސް ސިހުން ގެނުވި، އިންޑިއާގެ ވެރިރަށް ދިއްލީގައި 2012 ވަނަ އަހަރު ހިނގި ގޭންގް ރޭޕްގެ ހާދިސާއަށް ބިނާކޮށް ގެނެސްދިން މި ސީރީޒަކީ އާންމުންގެ މެދުގައި ވެސް ވަރަށް މަގުބޫލުވި ޑްރާމާއެކެވެ. ރިޗީ މެހެތާ ޑައިރެކްޓުކުރި، ޖުމްލަ ހަތް އެޕިސޯޑެއް ހިމެނޭ މި ސީރީޒްގެ ލީޑު ރޯލުތައް ކުޅުނީ ޝެފާލީ ޝާހު، ރަސިކާ ދުގާލް، އާދިލް ހުސެއިން އަދި ރާޖޭޝް ތައިލާންގު އެވެ.
