ކިރަކީ ދުޅަހެޔޮ ސިއްހަތެއްގައި ހުރުމަށް ކޮންމެ ދުވަހެއްގެ ކެއުމުގައި ހިމެނުން ލާޒިމް އެއް ބާވަތެއްގެ ކާނާ އެވެ. ކަށިތަކުގެ ދުޅަހެޔޮކަމާއި ދަތްޕިލަ ވަރުގަދަކޮށް ބެހެއްޓުމަށާއި ހަށިގަނޑުގައި ހަކަތަ އުފެއްދުމުގެ އިތުރުން ނާރުތަކުގެ މަސައްކަތް ފުރިހަމަވުމަށް އަދި މި ނޫން ވެސް ތަފާތު ކަންކަމަކަށް ކޮންމެ ދުވަހަކު ވެސް ކިރުގެ ކޮންމެވެސް އެއްބާވަތެއް ހިމެނުން މުހިއްމެވެ. ދިވެހި ފުޑް ބޭސްޑް ޑައިޓަރީ ގައިޑްލައިން (ދިވެހީން ކާންވީގޮތުގެ ގައިޑް)ގައި ވާ ގޮތުން ބޮޑު މީހެއްގެ ކެއުމުގައި ދުވާލަކަށް ދެ ސާވިން ކިރުގެ ބާވަތް ހިމަނަން ޖެހެއެވެ. ކިރުގެ ބާވަތުގެ ސާވިން އަކީ 250 މިލި ލީޓަރު ކިރު (ކޮންމެ ބާވަތެއް ވިއަސް)، ނުވަތަ 2 ½ މޭޒުމަތީ ސަމްސާ ހިކިކިރު ނުވަތަ 2/3 ތަށި ޔޯގަޓް ނުވަތަ ދެ ފޮތި ޗީޒާ އެއް މިނަކަށެވެ.