ފާމަސީގެ ކައުންޓަރަށް ބޭސްސިޓީއެއް ދިއްކޮށްލީމާ އޭގައި ލިޔެފައި އޮތް ބޭހެއް ދީފައި އެއަށްވާ ފައިސާ ބަލައިގަތުމަކީ ފާމަސިސްޓުގެ ހަމައެކަނި ޒިންމާ ކަމަށް ގިނަ ބަޔަކަށް އޮންނީ ހީވެފަ އެވެ. އާންމުކޮށް ކިޔާ ގޮތަށް ނަމަ ފިހާރައެއްގެ ސޭޓެކެވެ. ނުވަތަ ކޭޝިއަރެކެވެ. 

އެކަމަކު އެއީ އެހާ ފަސޭހަ ޒިންމާއެއް ނޫނެވެ. 

ކުއްލިއަކަށް ބައްޕަ ބަލިވެ، އާއިލާގެ ހަރަދުތައް ފޫބައްދަން އުނދަގޫވުމުން ފާމަސީގެ ރޮނގުން ޑިޕްލޮމާއަށް ކިޔަވަމުން ވަޒީފާ އަދާކުރަން ފެށި އައިޝަތު ޝުހާ ވެސް މި ތަޖުރިބާކުރި އެވެ. ވިލިމާލެ ފާމަސީގެ ކޭޝިއަރުގެ ޒިންމާތައް އަދާކުރަމުން ދެ އަހަރުގެ ކޯސް ފުރިހަމަކުރި އިރު މި މަސައްކަތާ މެދު އާންމުން ދެކޭ ގޮތް އޭނާއަށް އެނގުނެވެ. 

ކިޔެވުން ނިންމުމަށްފަހު، ގިނަ ފާމަސިސްޓުން އާއްމުކޮށް ހިޔާރުކުރަނީ ބޭސްފިހާރައިގައި މަސައްކަތްކުރާށެވެ. އެކަމަކު، އެ މަގުން ނުގޮސް ޝުހާ ބޭނުންވީ ބޭހުގެ އިދާރީ އަދި ރެގިއުލޭޓަރީ މަސައްކަތަށް ވަންނާށެވެ.

އެމްއެފްޑީއޭގައި ހޭދަކުރި 10 ވަރަކަށް އަހަރުގެ ތެރޭގައި، ރާއްޖެއަށް އެތެރެކުރި ބޭސްތައް ރަޖިސްޓްރީކުރުމާއި ގަވާއިދުތަކަށް ފެތޭކަން ކަށަވަރުކުރުމުގެ މުހިއްމު މަސްއޫލިއްޔަތު އޭނާ އަދާކުރި އެވެ.

ނަމަވެސް، މީގެ 12 އަހަރު ކުރިން ވިލިމާލެ ފާމަސީގައި އުޅުނުއިރު އިވުނު އަޑުތަކާއި ފެނުނު މަންޒަރުން ޝުހާއަށް ގަބޫލުކުރެވުނީ ފާމަސިސްޓުންނަށް ހައްގު އިހުތިރާމް ނުލިބޭ ކަމެވެ. 

ބައެއް މީހުން ދެކޭގޮތުގައި ފާމަސިސްޓުންނަކީ ހަމައެކަނި ސިޓީއަށް ބޭސް ދޫކޮށް، ފައިސާ ބަލައިގަންނަން ތިބޭ ބައެކެވެ. އެކަމަކު، ހަގީގަތަކީ އޭގެ އިދިކޮޅު މަންޒަރެވެ.

ބޭސް ކާންޖެހޭ ގޮތުން ފެށިގެން ބަލި މީހުން ސަމާލުކަންދޭން ޖެހޭ ކަންކަން މި ކިޔައިދެނީ، ފާމަކޮލޮޖީގެ ރޮނގުން ތަމްރީނުވެފައި ތިބޭ ފާމަސިސްޓުންނެވެ. 

ކައުންޓަރެއްގެ ފަހަތުގައި ތިއްބަސް އެއީ އާއްމު ސިއްހަތާއި ބަލި މީހުންގެ ރައްކާތެރިކަން ކަށަވަރުކުރުމުގައި މުހިއްމު ދައުރެއް އަދާކުރާ ބައެއް ކަމަށް، ށ. ފޭދުއަށް އުފަން ޒުވާނާ ބުންޏެވެ.

"ކިޔަވާފައި ތިބުމަށް ވުރެ ކޭޝިއާ ލެވެލްއޭ މިއީ. އެ ކަހަލަ ވިސްނުމެއް މުޖުތަމައުގައި ހުންނާތީ ކަންނޭނގެ، ފާމަސިސްޓުން ކުރާ މުހިއްމު މަސައްކަތާމެދު އާންމުން އެހާ ބޮޑަށް ހޭލުންތެރިވެފައި ނުވަނީ،" ދެ ކުދިންގެ މަންމަ ބުންޏެވެ.

"ފާމަސިސްޓުންނަކީ ހަމައެކަނި ކައުންޓަރުގައި ތިބޭ ބައެއް ނޫން. ބޭހުގެ ރައްކާތެރިކަން ކަށަވަރުކުރުމާއި، އިދާރީ ގޮތުން ކުރަންޖެހޭ އެތައް އެތެރޭގެ މަސައްކަތްތަކެއް ސިއްހީ ރައްކާތެރިކަމުގެ މިންގަނޑުތަކާ އެއްގޮތަށް ކުރަނީ ފާމަސިސްޓުން."

މިދިޔަ މަހު ސަރުކާރުގެ ބޭސް ކުންފުނި (ސްޓޭޓް ފާމާ) އާ ގުޅުނު ޝުހާގެ މިހާރުގެ އެންމެ ބޮޑު ޒިންމާއަކީ ބޭހުގެ ކޮލިޓީ ނުވަތަ ފެންވަރު ބެލުމެވެ.

ބަލި މީހުންގެ ފުރާނައާ ގުޅިފައިވާ ބޭހުގެ ރައްކާތެރި ކަށަވަރުކުރަން އެ ރައްކާކޮށްފައި ބަހައްޓާ ގޮތާއި މުއްދަތު ހަމަވާ ތާރީހުތަކާއި ކޮލިޓީ ކޮންޓްރޯލް މިންގަނޑުތައް ބެލެހެއްޓުމަކީ ބޮޑު ރިސްކަކަށް ވިއަސް އާއްމު ސިއްހަތުގައި ފަރުވާ ކުޑަކުރެވޭނެ ކަމެއް ނޫނެވެ. 

މިހާރު ފާމަސީގެ ރޮނގުން ބެޗްލާސް ޑިގްރީއަށް ކިޔަވަމުން އަންނަ ޝުހާގެ އެންމެ ބޮޑު އުއްމީދަކީ، ފާމަސިސްޓުންނަކީ ސިއްހީ ހިދުމަތުގެ ނިޒާމުގެ މައިބަދައިގެ ތެރޭގައި ހިމެނޭ ޑޮކްޓަރުންނާއި ނަރުހުންނެކޭ އެއްފަދައިން ބަލިމީހުންގެ ފުރާނަ ސަލާމަތްކުރުމުގައި މުހިއްމު ދައުރެއް އަދާކުރާ ބައެއްކަން އާންމުން ގަބޫލުކުރުމެވެ.

ސިއްހީ ގޮތުން ބޮޑު މަސްއޫލިއްޔަތަކާއި ރިސްކު ހިމެނޭ ކަމަކަށްވިއަސް މުޖުތަމައުގެ ގަދަރާއި އިހުތިރާމް ލިބޭނަމަ، އެ މަސައްކަތުގައި ހިތްހަމަޖެހުމާއެކު ދެމި ތިބުމުގެ ހިތްވަރު ފާމަސިސްޓުންނަށް ލިބޭނެ ކަމަށް ޝުހާ ގަބޫލުކުރެ އެވެ.