އަރަބިއްޔާ ސްކޫލުގެ ދަރިވަރު އިބާ އާމިރު އަބްދުﷲ "ދޯ"ގެ އާޓިކަލްއެއްގައި ފުރަތަމަ ފަހަރަށް ފީޗާ ކުރީ މިދިޔަ ޖުލައި މަހު ތެރޭގަ އެވެ. އެ ފަހަރު އެއީ، ދުނިޔޭގެ 66 ގައުމަކުން އެތައް ހާސް ކުދިންނެއް ބައިވެރިވި ކުރެހުމުގެ މުބާރާތަކުން އެންމެ މޮޅު 100 ކުރެހުމުގެ ތެރޭގައި އިބާ އާއި އޭނާގެ ކޮއްކޮ، އަބާން އާމިރު އަބްދުﷲ ގެ ކުރެހުން ހިމެނިގެންނެވެ. އަނެއްކާ ވެސް މިއޮތީ އިބާގެ މޮޅު ކާމިޔާބީއެއްގެ ވާހަކަ އެވެ.

ޖަޕާނުގެ ނެޝަނަލް ފެޑެރޭޝަން އޮފް ޔުނެސްކޯ އިން 2019 އިން 2020 އަށް ޗިލްޑްރެންސް އެނިކީ ފެސްޓާގެ ނަމުގައި ކުރެހުމުގެ ބޮޑު މުބާރާތެއް ބޭއްވި އެވެ. އޭޝިއާގެ 24 ގައުމަކުން ކުދިން މި މުބާރާތުގައި ބައިވެރިވި އެވެ. އޭގެ ތެރޭގައި އިބާ އާއި އަބާންގެ އިތުރުން ރާއްޖޭގެ ކުދިން ވެސް ހިމެނެ އެވެ. އިބާ އަށް ވަނީ މި މުބާރާތުގެ އެއް ވަނަ އަށް ހޮވި، "ގްރޯން ޕްރީ" މެޑެލް ލިބިފަ އެވެ.

"ގްރޯން ޕްރީ" އަކީ އެނިކީ ފެސްޓާގެ އެންމެ ޝަރަފުވެރި އިނާމެވެ. މި އިނާމަށް ހޮވާނީ އެއް ކުއްޖެކެވެ. އިބާ އެއް ވަނައަށް ހޮވުނީ، "އަހަރެންގެ ދިރިއުޅުމުން 5 ދުވަސް" ގެ ނަމުގައި އޭނާ ފޮނުވި ފަސް ކުރެހުން ވެސް މޮޅުވެގެންނެވެ.

"އިބާ އަށް ވަރަށް އުފާވެރި ސަޕްރައިޒަކަށް މި މެޑެލް ވެގެން ދިޔައީ. އިނާމާ އާ ހަވާލުވާން ޖަޕާނުން އިބާއަށް ދައުވަތު ވެސް ފޮނުވި. އެކަމަކު ކޮވިޑްގެ ހާލަތާ ހެދި ރަސްމިއްޔާތު ކެންސަލްކުރަން ޖެހުނީ މި ފަހަރު،" އިބާގެ ބައްޕަ އަދި ކުރެހުންތެރިޔާ އާމިރު އަބްދުﷲ ބުންޏެވެ.

މުޅި މުބާރާތުގެ އެއް ވަނަ އަށް އިބާ ހޮވުނު އިރު، ދެ ވަނަ އަށް ދޭ އެންމެ ޝަރަފުވެރި ޔުނެސްކޯ އެވޯޑަށް ދިވެހި ތިން ދަރިވަރަކު ހޮވުނެވެ. އެއީ ފުވައްމުލަކު ސިޓީގެ، މުހައްމަދު ޖަމާލުއްދީން ސްކޫލުގެ އިބްރާހިމް ޔޫސަމް ސާމިއު އާއި ހަމަ އެ ސްކޫލްގެ އައިޝަތު މިޝީލް ބިންތި އިބްރާހިމް އާއި ހއ.ވަށަފަރު ސްކޫލުގެ ފާތިމަތު ލައިޝަ މުހައްމަދު އެވެ.

އެކްސެލެންސް ހޯދި ކުދިންގެ ތެރޭގައި އިބާގެ ކޮއްކޮ އަބާންގެ އިތުރުން މަޖީދިއްޔާ ސްކޫލުގެ އައިޝަތު ދާނާ އިޔާޒާއި ހުރަވީ ސްކޫލުގެ ޒެއިނާ އަޒްމަތު އަހުމަދުގެ އިތުރުން ފުވައްމުލަކު ސިޓީ، މުހައްމަދު ޖަމާލުއްދީން ސްކޫލުގެ އާމިނަތު ލައިބާ އިހުސާން ހިމެނެ އެވެ.