އެކްޓަރު ޖުމައްޔިލް ނިމާލް އޭނާގެ ފޭނުންނަށް އީދު މުބާރިކް ފޮނުވީ އޭނާގެ ނޯޖަވާން ހަށިގަނޑު ދައްކާލާ ފޮޓޯއަކުންނެވެ. މި ފޮޓޯގެ ކެޕްޝަންގައި ޖުމައްޔިލް ހިއްސާކޮށްފައިވާ "ކޯޓް" އެއްގައި ބުނަނީ އެމީހަކު ހޯދާފައިވާ ކާމިޔާބިއާ މެދު އަމިއްލަ ނަފުސާ މެދު ފަހުރުވެރިވާން ވާނެ ކަމަށެވެ. އަދި ހާއްސަކޮށް އެހެން މީހުންނަށް ނުފެނި ތިމާއަށް ލިބޭ ކުރިއެރުމާ މެދު ވެސް މެ އެވެ.

އެކްޓްރެސް މަރިޔަމް އައްޒަ ހިއްސާކުރީ އޭނާގެ ދަރިފުޅު އީތަންއާ އެކު ކުރީ އީދެއްގައި ކުލަ މަޖާގެ ތެރެއިން ނަގާފައިވާ ފޮޓޯއެކެވެ. ފޭނުންނަށް އީދު މުބާރިކް ފޮނުވަމުން އައްޒަ ވަނީ އޭނާގެ ދަރިފުޅު މި ނިމުނު ރޯދަ މަހުގައި 27 ރޯދަ ހިފި ކަމަށް ބުނެފަ އެވެ.

އެކްޓަރު އަބްދުﷲ މުއާޒް (މުއާ) ޕޯސްޓްކުރީ އޭނާގެ އަންހެނުން އެކްޓްރެސް އައްޒައާ އެކު ސެލްފީއެކެވެ.

ނެށުންތެރިޔާ ސުނީތާ އަލީ (ސުނީ) ވެސް ދޫކޮށްލީ ސެލްފީއެކެވެ. އަދި ސުނީގެ އާއިލާގެ ބައެއް ކުދިންނާ އެކު ނަގާފައިވާ ފޮޓޯތަކާއި ސެލްފީ ވީޑިއޯތައް ވެސް އޭނާގެ ސޯޝަލް މީޑިއާގައި ޕޯސްޓްކޮށްފައިވެ އެވެ.

"ރާއްޖޭގެ ލޮބުވެތި އެންމެހާ ރައްޔިތުންނަށް އީދުގެ ތަހުނިޔާ އަރިސްކުރަން،" އެކްޓްރެސް ޝީލާ ނަޖީބްގެ އީދު ތަހުނިޔާގެ މެސެޖުގައި ލިޔެފައިވެ އެވެ. ޝީލާ ހުރީ މާޗު މަހު މިޑް-ޓާމް ބްރޭކްގައި އޭނާގެ ކުދިންނާ އެކު ޗުއްޓީއަށް ބ.ގޮއިދޫ އަށް ދިޔަ ގޮތަށް އަދިވެސް އެ ރަށުގަ އެވެ.

އެކްޓްރެސް ފާތިމަތު ޝަރާ އަޕްލޯޑްކުރީ ޓިކްޓޮކެކެވެ. އިންޑިއާގެ ލަވަކިޔުންތެރިޔާ އާޝާ ބޯސްލޭ ކިޔާފައިވާ "ކޯން އާޔާ ކީ ނިގާހޯން މޭ ޗަމަކް ޖާ އުޓީ" ލިޕް ސިންކު ކޮށްފަ އެވެ.

ލަވަކިޔުންތެރިޔާ ޝަލަބީ އިބްރާހިމް ދޫކޮށްލި ވީޑިއޯގައި ތުއްތު ކުއްޖަކު އީދު މުބާރިކް ބުނެ އެވެ.

ހަސަން އިރުފާން (ޒަކިއްޓެ) އީދު ތަހުނިޔާ ކިޔާލީ އޭނާގެ އަޑުންނެވެ.