ވިހިވިހި ނިމިގެން މިދަނީ ރާއްޖޭގެ މުނިފޫހިފިލުވުމުގެ ދާއިރާގެ އަޑު ކެނޑި، މަސައްކަތްތައް ވެސް މަޑުޖެހިލައިފައި އޮތް އަހަރެއްގެ ގޮތުގަ އެވެ. އެކަން އެހެން އޮތް ނަމަވެސް، ބައެއް ދިވެހި ސެލެބްރިޓީންގެ ޒާތީ ދިރިއުޅުމުގައި މިހާ "ހެޕަނިން" އަހަރެއް އަދި ނާދެ އެވެ. އެ މީހުންގެ ހަޔާތުގެ ބޮޑެތި، މުހިންމު ނިންމުތަކެއް ހާމަކުރި އެވެ. އޭގެ ތެރޭގައި ގިނައީ މުޅިން އާ ޒަވާޖީ ހަޔާތެއް ފެށި ޖޯޑުތަކެވެ. މި އަހަރުގެ މިހާތަނަށް ޖުމްލަ ހަތަރު ސެލެބްރިޓީ ޖޯޑެއް ކައިވެނިކުރި އެވެ. އަދި މީގެ ތެރެއިން ގިނަ ކައިވެނިތަކުގެ ޚަބަރު ލިބުނީ ވެސް ހަމަ ކުއްލިއަކަށެވެ.

މިއީ މި އަހަރުގެ ފުރަތަމަ ސެލެބްރިޓީ ކައިވެންޏެވެ. ފިލްމީ ތަރި ނުޒުހަތު ޝުއައިބު (ނުޒޫ) އާއި އޭނާގެ ލޯބިވެރިޔާ އަބްދުﷲ ޝަފީއު (ރިޗާޑް) ކައިވެނިކުރީ ޖެނުއަރީ 12 ގަ އެވެ. ކައިވެންޏަށް ފަހު "ދޯ" އަށް ދިން އިންޓަވިއުއެއްގައި ނުޒޫ ބުނެފައި ވަނީ އޭނާއާ ރިޗާޑް ދީމާވެ، ދެމީހުންގެ މެދުގައި ހާއްސަ ގުޅުމެއް އުފެދުނީ އޭގެ އަހަރެއްހާ ދުވަސް ކުރިން ކަމަށެވެ.

"ދެމީހުން ދިމާވި ގޮތަކީ ނުޒޫ މިދިޔަ އަހަރު ކުރީކޮޅު ގެ ބަދަލުވެފައި ގަތް އަލަމާރި އެސެމްބުލް ކުރާކަށް ގަތް ފިހާރައަކުން ނައި، އެކަމާއި ރުޅި އައިސްގެން ރައްޓެއްސެއް ކައިރި ބުނެގެން އަލަމާރި އެސެމްބުލް ކުރަން މީހުންތަކެއް ގެނައީ، އެތަނުން ދިމާވީ [ރިޗާޑްއާ]، ދެން ދެމީހުން ވަރަށް ވާހަކަ ދައްކާފައި ދެ މަސް ވީ ފަހުން ރައްޓެހިވީ،" ނުޒޫ ބުނެފައިވެ އެވެ.

ލަވަކިޔުންތެރިޔާ އަހްމަދު އިބްރާހިމް (އައްމަޑޭ) އާއި އޭނާގެ ލޯބިވެރިޔާ ތަހިއްޔާ ޝަރީފް (ތަހީ) ގެ ލަވް ސްޓޯރީ "ދޯ" އިން ގެނެސްދިނީ މިދިޔަ އަހަރު އެވެ. ވަރަށް ގިނަ މީހުން އެ އިންޓިވިއު ކިޔެ އެވެ. އަދި އެއީ މިހާރު އެންމެން ވެސް ދަންނާނެ ވަރަށް ލޯބި ވާހަކައެކެވެ. ވަރަށް ލޯބިން އުޅެމުން އަންނަ މި ޖޯޑު ކައިވެނިކުރީ، އޭގެ ދުވަސްކޮޅެއް ފަހުން، މިއަހަރު ފެބްރުއަރީ 6 ގަ އެވެ.

އައްމަޑޭ ބުނެފައި ވަނީ އެމީހުން ކައިވެނިކުރާނީ ދެމީހުންގެ ގުޅުމަށް އަހަރެއްވީ ދުވަހު ކަމަށެވެ. ފޭސްބުކް މެރިޓަލް ސްޓޭޓަސް އަޕްޑޭޓް ކޮށްލުން ފިޔަވާ ކައިވެނީގެ މާ ބޮޑު ވާހަކަތަކެއް އައްމަޑޭ ސޯޝަލް މީޑިއާގައި ޝެއާކޮށްފައެއް ނުވެ އެވެ. އައްމަޑޭ އާއި ތަހީ ރައްޓެހިވީ ފޭސްބުކުން ދިމާވެގެންނެވެ. އޭރު އައްމަޑޭ ދިޔައީ ފޭސްބުކްގައި އޭނާ ހިތުގައި ތަހީއަށް އޮތް ފުން ލޯބި ބަޔާންކޮށް، ވަރަށް ލޯބި ޕޯސްޓުތަކެއް ޝެއާ ކުރަމުންނެވެ.

މިއަހަރުގެ އެންމެ ބޮޑު ސެލެބްރިޓީ ކައިވެންޏަކަށް ވާނީ ފިލްމީ ތަރިން ކަމަށްވާ، އަބްދުﷲ މުއާޒް އާއި މަރިޔަމް އައްޒަގެ ކައިވެނިކަން ޔަގީނެވެ. އެހެން މި ބުނީ ވަރަށް ގިނަ މީހުން، ވަރަށް ނޫން ކަމަށް ހެދިގެން ވެސް، މި ކައިވެންޏަކަށް ވަރަށް ފާރަވެރިވެ، ހުރިހާ ޚަބަރެއް ދަބަރެއް ވަގުތުން ވަގުތަށް ބަލައިފައި ވާތީ އެވެ. މިއަހަރު "ދޯ" ގައި ލިޔުނު ކައިވެނީގެ ޚަބަރުތަކުގެ ތެރެއިން އެންމެ ގިނަ މީހުން ކިޔާ އަދި ކޮމެންޓުކުރީ ވެސް މި ކައިވެންޏަށެވެ.

ފޭނުން ލޯބިން ކިޔާ ނަމުން ނަމަ "މުއާއްޒަ"، ކައިވެނިކުރީ މިއަހަރުގެ އެންމެ ރީތި ތާރީޚުތަކުގެ ތެރެއިން 2020-02-20 އެވެ.

މުއައްޒަ ލޯބީގެ ގޮތުން ގުޅިގެން އުޅޭ ކަމަށް އެންމެ ފުރަތަމަ އަޑުތައް ފެތުރުނީ 2018 ވަނަ އަހަރުގެ ކުރީކޮޅުގައި މުއާ ޑައިރެކްޓުކޮށް، އައްޒަ ލީޑު ރޯލުން ކުޅުނު "ލީނާ" ފިލްމުގެ ޝޫޓިން ތެރެއިންނެވެ. ނަމަވެސް އޭރު ދެ ތަރިން ވެސް، މިކަމާއި ގުޅޭގޮތުން އެއްވެސް އެއްޗެއް ބުނާކަށް ބޭނުމެއްނުވި އެވެ. އަދި އެކަން ދޮގެއް ވެސް ނުކުރެ އެވެ.

މި ކައިވެންޏަށް އައްޒަ ރަން ކިޔައިފައި ވަނީ މިދިޔަ ފެބްރުއަރީ މަހުގެ ދެވަނަ ދުވަހު އެވެ. ވިލިމާލޭ އަތިރިމަތީގައި އޮތް އެ ހަފްލާގައި އައްޒަ ރަން ކިޔައިފައި ވަނީ 30 ރުފިޔާ އަށެވެ. ރަން ކީ ހަފުލާ ބޭއްވީ، މިހާރު ރަން ކިޔުމުގައި ގިނަ ބަޔަކު ގެންގުޅޭ "ދިވެހި" ސްޓައިލަކަށެވެ. އަދި މި ދެތަރިން ކައިވެނިކުރީ ހުޅުމާލޭގައި ހުންނަ ބްރެޑްމެޓާސް ގްރީން ރެސްޓޯރެންޓުގައި، އާއިލާ އާއި ރައްޓެހިންނާ އެކު ބޭއްވި ކުލަގަދަ ހަފްލާއެއްގަ އެވެ.

ލަވަކިޔުންތެރިން ކަމަށްވާ ޝަލާބީ އިބްރާހިމާއި ޝިފާ އިބްރާހީމްގެ ކައިވެނީގެ ޚަބަރު ލިބުނީ، ބަޔަކަށް ރޭކާ ވެސް ނުލާ ތިއްބާ، ހަމަ ކުއްލިއަކަށެވެ. މި ދެ ފަންނާނުންގެ މެދުގައި ހާއްސަ ގުޅުމެއް އޮންނަ ކަމުގެ އަޑުތައް މާ ކުރިން ވެސް ފެތުރިފައި އޮތް ނަމަވެސް، ކުރިން ރަސްމީކޮށް އެކަން ކަށަވަރުވެފައެއް ނުވެ އެވެ. ކުއްލިއަކަށް އިވުނީ ކައިވެނީގެ ޚަބަރެވެ.

އެކަމަކު "ދޯ" އަށް އެނގިފައިވާ ގޮތުގައި ޝަލަބީ އާއި ޝިފާ ކައިވެނިކުރީ ލޯބީގެ ގޮތުން ގުޅިގެން އުޅޭތާ ދޮޅު އަހަރެއްހާ ދުވަސް ވީ ފަހުންނެވެ. އެ ވީ ދުވަސްތަކުގައި ދެ ފަންނާނުން އެކީގައި ވަރަށް ގިނަ ޝޯތަކުން ފެނިފައިވެ އެވެ. އަދި ޝަލަބީގެ ހާއްސަ އިވެންޓުތަކުން ވެސް ޝިފާ ފެނެ އެވެ.

އޯގަސްޓް 20 ގައި ޝަލަބީ އާއި ޝިފާ ކައިވެނިކުރީ، އެ ދުވަސްވަރު ކޮވިޑް-19 އާ ހެދި އާންމު އުސޫލުތަކަށް ބަދަލު ގެނެސްފައި އޮތުމުން، ވީޑިއޯ ކޮންފަރެންސް ކޯލް މެދުވެރިކޮށެވެ. ޝަލަބީ އާއި ޝިފާގެ ކައިވެނި ހަފުލާ ބޭއްވީ ދިވެހި ގޮތަކަށެވެ. އެކަމަކު ކައިވެނި ޕާޓީ ބޭއްވީ، މިހާރު ވަރަށް ގިނަ ދިވެހިންނަށް ވެސް ކަމުދާ އިތުރު ސްޓައިލެއް ކަމަށްވާ، އިންޑިއަން ވެޑިން ތީމަކަށެވެ. އަދި މި ކައިވެނިން ގިނަ ބައެއް ސަމާލުކަން އެންމެ ބޮޑަށް ލިބުނު އެކައްޗަކީ ވެސް ވީ މި ވެޑިން ތީމެވެ.